U Rwanda na Chypre byatangije imikoranire mu by’ingendo zo mu kirere

U Rwanda na Chypre byashyize umukono ku masezerano y’ubwikorezi bwo mu kirere, azwi nka ’Air Service Agreement (ASA),agamije kongera no kunoza ingendo zo mu kirere hagati y’ibihugu byombi.

Aya masezerano yashyiriweho umukono i New York muri Leta Zunze Ubumwe za Amerika, ku wa Kabiri tariki ya 22 Nzeri 2026, hagati ya Minisitiri w’Ububanyi n’Amahanga w’u Rwanda, Amb. Olivier J. P. Nduhungirehe na mugenzi we wa Cyprus, Constantinos Kombos.

Mu bindi baganiriye harimo kunoza ubufatanye hagati y’ibihugu byombi, banaganira ku ngingo zirebana n’Akarere ndetse n’ibibazo mpuzamahanga. 

Aya masezerano yasinywe hagati y’impande zombi n’indi ntambwe yo gushimangira ubufatanye mu nzego zitandukanye.

Chypre iherereye ku mugabane w’u Burayi, mu Burasirazuba bw’Inyanja ya Méditerranée, ikagira Umurwa Mukuru witwa Nicosia, igahana imbibi na Turikiya mu Majyaruguru, igice gisigaye kikaba inyanja. Imibare iheruka igaragaza ko iki gihugu gituwe na miliyoni imwe n’ibihumbi birenga 300.