U Bwongereza: Umwamikazi Elizabeth II yanduye COVID-19

  • Sedar Sagamba
  • Gashyantare 21, 2022
  • Hashize imyaka 2
Image

Umwamikazi Elizabeth II yanduye COVID-19, akaba agaragaza ibimenyetso byoroheje. Umwamikazi Elizabeth yaba yarandujwe n’umuhungu we, Igikomangoma Charles, kuko ku wa 10 Gashyantare ari bwo byamenyekanye ko Charles yanduye COVID-19, nyuma y’iminsi ibiri ahuye na nyina.

Nk’uko bitangazwa n’Umunyamakuru wa Radiyo mpuzamahanga y’u Bufaransa Émeline Vin uri mu murwa mukuru w’u Bwongereza i Londres, ngo umwamikazi azakomeza gukora imirimo yoroheje, azaba akorera i Windsor. Ikindi ni uko abakozi benshi b’ibwami na bo banduye COVID-19.

Mu gihe cy’iminsi 10, ibwami byari mu ibanga rikomeye ko umwamikazi yaba yari arwaye, nta tangazo ryatanzwe rivuga ko yaba yari yanduye COVID-19.

Mu by’ukuri Umwamikazi Elizabeth II yagaragaye ku wa Kabiri yakira mu buryo bw’ikoranabuhanga kuri videwo (visioconférence) impapuro zemerera Ambasaderi wa Estonia guhagararira igihugu cye mu Bwongereza.

Iryo tangazo rivuga ko Umwamikazi Elizabeth uzuzuza imyaka 96 muri Mata,  yanduye COVID-19 ryatunguranye kuko yongeye kugaragara mu ruhame mu ntangiriro z’uku kwezi nyuma yo kuba yaravuzweho  uburwayi mu mpera z’umwaka ushize mu Kwakira.

Abanyapolitiki n’abandi bantu bakomeye babinyujije ku mbuga nkoranyambaga bifurije Umwamikazi Elizabeth kurwara ubukira.

Yanditswe na NYIRANEZA JUDITH

  • Sedar Sagamba
  • Gashyantare 21, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE