U Bushinwa: Umujyi ukomeye wa Shangai wugarijwe  na COVID-19

Icyorezo cya COVID-19 gikomeje gufata intera muri Shangai, umujyi ukomeye mu rwego rw’ubukungu wo mu Bushinwa, aho ubu abaturage bawutuye bagera kuri miliyoni 26 bari muri Guma mu rugo. 

Yashyizweho hateganywa ko yamara iminsi 4 ariko yongerewe kubera ko hakomeje kugaragara abandura benshi. Igihe izarangirira nticyatangajwe. 

Amakuru aturuka mu nzego z’ubuzima zo muri kiriya gihugu avuga ko uyu munsi handuye abasaga ibihumbi 20. 

Ubu bwiyongere  bukabije bw’icyorezo buraterwa na virusi yihinduranyije ya Omicron izwiho kwandura vuba nk’uko byatangajwe n’inzego z’ubuzima. Mu bice bitandukanye by’uyu mujyi amavuriro n’izindi nyubako zikoreramo inzego z’ubuzima zuzuyemo abanduye n’abakekwaho ko bahuye n’abanduye, aho byabaye ngombwa no kwitabaza za sitade.

Umwe mu bari muri uyu mujyi  akaba ari umunyamakuru wa  France 24, yagize  ati: “Ubu nta muntu wemerewe gusohoka imihanda irimo Polisi gusa n’imodoka zitwara ibicuruzwa by’ibanze”. Yakomeje avuga ko aho ari mu igorofa mu kato, imyanda na yo itaboroheye kuko abakozi bashinzwe kuyitwara batarimo gukora.

Guhaha na byo ntibyoroshye kuko amasoko menshi manini afunze, afunguye makeya kuyahahiramo biragoye kubera ubwinshi bw’abakeneye ibiribwa n’ibikoresho by’ibanze nk’uko yakomeje abivuga.

 “Ubwoba ni bwose, abantu bageze n’aho barwana bapfa  ibiribwa  n’ibindi bikoresho by’ibanze”. Ubu ni bumwe mu butumwa bwatanzwe muri videwo yakwirakwijwe ku mbuga nkoranyambaga igaragaza ko mu burasirazuba bw’uyu mujyi hari ikibazo gikomeye cy’ibura ry’ibiribwa n’ibindi by’ibanze.

Uyu mujyi ufatwa nk’izingiro ry’ubukungu mu Bushinwa ni ubwa mbere ufatiwe ingamba zikomeye nka ziriya zo gukumira ikwirakwira rya COVID-19 kuva yagaragara muri iki gihugu mu mpera za 2019. 

Abaturage bo bavuga ko muri politiki y’u Bushinwa yo kurwanya ubwandu bukagera kuri zeru  harimo icyuho bitewe n’ iki cyorezo gikomeje kwiyongera.