Suwede yohereje mu Rwanda Micomyiza ukekwaho Jenoside yakorewe Abatutsi

  • NTAWITONDA JEAN CLAUDE
  • Mata 27, 2022
  • Hashize imyaka 2
Image

Umunyarwanda witwa Jean Paul Micomyiza bakundaga kwita Mico ukurikiranyweho uruhare yagize muri Jenoside yakorewe Abatutsi mu yahoze ari Perefegitura ya Butare, yoherejwe kuburanishirizwa mu Rwanda akaba yakiriwe n’Ubushinjacyaha i Kigali mu gitondo cyo kuri uyu wa Gatatu.

Ni nyuma y’aho taliki ya 21 Ukuboza 2021, Urukiko rw’Ikirenga muri Suwede rwemeje ko nta mpamvu n’imwe yahagarika kuba Jean Paul Micomyiza w’imyaka 50 yakoherezwa mu Rwanda akaburanishwa ku byaha cyane ko nta mbogamizi yemewe n’amategeko yo kohereza mu Rwanda aho aregwa kugira uruhare muri Jenoside yakorewe Abatutsi mu 1994.

Mico yatawe muri yombi taliki 17 Ugushyingo 2020, amakuru yanyuze mu bitangazamakuru bitandukanye yemeza ko abamwunganira mu by’amategeko, Thomas Bodström na Hanna Larsson Rampe, barwanyije icyemezo cy’urukiko bavuga ko ubutabera bwo mu Rwanda bufite intege nke nk’uko bidahwema kugarukwaho n’abakurikiranyweho ibyaha bakoreye mu Rwanda bakaba barabihungiye mu mahanga.  

Micomyiza ni umuhungu w’umugabo witwa Ngoga, Jenoside yakorewe Abatutsi ikaba yarabaye ari umunyeshuri muri Kaminuza Nkuru y’u Rwanda (UNR) aho yaremye agatsiko k’urubyiruko rwiganjemo urwakomokaga mu Burundi kishe Abatutsi mu gihe cya Jenoside.

Ako gatsiko ngo kashinze bariyeri i Cyarwa hafi yo ku Mukoni ari na ho umuryango we wari utuye, ubu  ni mu Murenge wa Tumba mu Karere ka Huye. Iyo bariyeri kandi ngo yayibagaho na we na barumuna be.

Se yakoraga kuri Perefegitura, nyina akaba yari umwarimu ku mashuri y’i Tumba ahitwa ku Ikori. Uretse kuba yari umunyeshuri wigaga mu mwaka wa Kabiri mu ishami ry’Ubumenyi muri Kaminuza Nkuru y’u Rwanda, Mico yari n’umwe mu bagize icyiswe “Comité de Crise” cyagize uruhare rukomeye muri Jenoside yakorewe Abatutsi.

Micomyiza yabaga ari kumwe n’Abarundi n’abandi basore bo muri ako gace, ari na bo bafatanyaga mu bwicanyi no mu bugizi bwa nabi. Mu byo ashinjwa harimo no kugira uruhare mu iyicwa ry’imbaga y’Abatutsi mu Majyepfo y’u Rwanda, by’umwihariko abanyeshuri  bo muri Kaminuza Nkuru y’u Rwanda dore ko yari anahaturiye, abenshi abazi.

Ibimenyetso byakusanyirijwe mu iperereza byerekana ko by’umwihariko Mico akurikiranyweho ibyaha bya Jenoside byakorewe mu yahoze ari Komini Ngoma muri Perefegitura ya Butare (ubu ni mu Karere ka Huye), muri Kaminuza no mu nkengero zayo.

Micomyiza yasabye ubwenegihugu bwa Suwede arabwimwa kubera ko yakomeje kwijandika mu bya Politiki ijyanye no gushaka guhirika ubutegetsi bw’u Rwanda.

Ubushinjacyaha Bukuru bw’u Rwanda burashimira byimazeyo inzego z’Ubutabera za Suwede zohereje Mico ngo aburanishirizwe mu Rwanda, n’ubufatanye impande zombi zikomeje kugaragaza mu guharanira ko abakekwaho Jenoside bose bacyihishe muri icyo gihugu bagezwa imbere y’ubutabera.

Mu mwaka wa 1972 ni bwo Mico yavukiye muri Serile y’Agasengasenge, Segiteri ya Cyarwa-Sumo, Komini ya Butare, ubu ni mu Karere ka Huye mu Ntara y’Amajyepfo.

  • NTAWITONDA JEAN CLAUDE
  • Mata 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE