Rwanda Day mu mboni ya Kamichi ugiye kuyitabira ku nshuro ya kabiri

  • MUTETERAZINA SHIFAH
  • Gashyantare 1, 2024
  • Hashize ibyumweru 3
Image

Mu gihe habura amasaha make ngo Abanyarwanda batuye imbere mu gihugu bahurire muri ‘Rwanda Day’ n’abatuye mu bice bitandukanye by’Isi, Adolphe Bagabo uzwi nka Kamichi asanga ari umwanya mwiza wo kongera guhura n’abakunzi be.

Bitenganyijwe ko Rwanda Day y’uyu mwaka ibera i Washington DC, muri Leta Zunze Ubumwe z’Amerika (USA) guhera tariki 02 kugera 03 Gashyantare 2024, aho Abanyarwanda n’inshuti z’u Rwanda  batuye mu bice bitandukanye by’Isi, baganira kuri gahunda zitandukanyue zigamije guteza imbere u Rwanda n’Abanyarwanda.

Nyuma y’igihe adataramira Abanyarwanda batuye imbere mu gihugu, umuhanzi Kamichi uheruka kuyitabira mu gihe cy’imyaka icumi ishize, kuri ubu akaba umwe mu bazataramira abazitabira Rwanda Day ya 2024, mu kiganiro cyihariye yagiranye n’Imvaho Nshya, yavuze ko ari amahirwe kuri we yo kongera gutaramira abakunzi be.

Yagize ati: “Haba hari abantu benshi bizihiwe, bakumva kandi bakumvwa, ni ikirori kinini, ni amahirwe meza kuri jye yo kongera kwegera abantu bene wacu, no kuramukanya, ‘meet and greet’ irasanzwe, no kubaha ibihangano byanjye.”

Ku rundi ruhande ariko, Kamichi avuga ko nta gihe kinini kirashira adataramira Abanyarwanda kuko uretse kuba wenda adaheruka gutaramira ababa imbere mu gihigu ariko akenshi ataramira abo hanze yacyo.

Ati: “Njya mbwira abantu ko amafaranga nkorera muri Amerika nkura muri uyu muziki, ari yo andyohera kurusha ayo nakoreye ndi i Kigali bakagira ngo ni ugukabya cyangwa ikindi kintu, ariko ni ukuri, kuririmbira Abanyarwanda bari hano biraryoha cyane, kandi usibye no kuba ari amafaranga aje, ntanaririrmba kenshi, ntanashoye kenshi mu muziki, n’amafaranga aza ari menshi kurusha ayo nakoreraga igihe cyose, nakoreshaga imbaraga nyinshi mu muziki, ndimo guhemberwa ibyo nakoze mbere.”

Kamichi yiteguye gutaramira abitabira Rwanda Day, abaririmbira indirimbo ze bakunze n’inshyashya

Nyuma y’imyaka 20 atangiye umuziki, Kamichi ashimangira ko Rwanda Day ya 2024 yongeye kumwereka ko agikenewe mu muziki, kubera ko atagize uruhare mu kiyitegura ariko akaba yaratumiwe nk’umwe mu bagomba gususurutsa imbaga y’Abanyarwanda bazitabira icyo gikorwa.

Yagize ati: “Natangiye umuziki mu 2004, ubu turi muri 2024, baracyantumira kugira ngo ibirori bigire ireme, ndi umuberabirori, mbere byari nk’inzozi, kwari ukugerageza, ariko kano kanya ndatumirwa mu bitaramo bikomeye, ndashimira Imana kugeza kano kanya.”

Kimwe mu byo abazitabira igitaramo bagomba kwitega kuri Kamichi, ni ukumva indirimbo batigeze bamwumvaho nkuko yabibwiye Imvaho Nshya.

Yagize ati: “Abazitabira igitaramo reka mbasezeranye ko nzabaririmbira indirimbo batarumva na rimwe, mfite indirimbo nakoranye na Kenny Sol, nyimaranye iminsi, yarangiye cya gihe ari muri Canada, dutegereza ibyo gukora videwo (video), gukorera hano na we ari mu Rwanda tugahuza amashusho, urugendo rwe rwo muri Canada rwatumye muha umwanya kugira ngo abanze akore ibye, tuzabone gukora indirimbo dusohore amashusho.”

Yemeza ko bizaba ari amahirwe yo kuyerekana no kureba uko izakirwa, gusa kuri we yizeye ko izakundwa.

Agaruka ku bijyanye n’aho abona umuziki w’u Rwanda ugeze, Kamichi asanga warakuze cyane cyane mu bijyanye n’aho uteguyrirwa, kuko ishuri ryo ku Nyundo rimaze kugira uruhare runini mu kuzana abahanzi benshi kandi b’abahanga mu ruhando rwa muzika, byanatumye abawukora batarawize hari ibyo babigiraho.

Ati: “Ugereranyije n’igihe cyacu twakoraga kubera ko tubikunze, nta siyansi bifite, kwari ukwirwariza, kuko ibyo twari tuzi ni ibyo twiyigishije, abantu baradukunda. Ab’ubu bafite siyansi ituma bamenya umuziki barimo gukora mu gihe barimo kuwukora, mu gihe twe twawiyigishaga, bafite imbuga nkoranyambaga zibafasha kumenyekana kurushaho uko twe byari bikivuka, bagira uko bakura amafaranga mu muziki wabo kurusha uko twe twari dufite ubumenyi muri icyo kintu.”  

Uretse Kamichi uzataramira Abanyarwanda mu gitaramo cyateguwe na Salax Entertainment kizaba ku wa Gatandatu tariki 03 Gashyantare, biteganyijwe ko hazagaragamo n’abandi bahanzi barimo Bad Rama kikazayoborwa na Ally Soudy.

  • MUTETERAZINA SHIFAH
  • Gashyantare 1, 2024
  • Hashize ibyumweru 3
TANGA IGITEKEREZO
Tim says:
Gashyantare 1, 2024 at 6:07 pm

Kamichi, one of the best of his generation. Can’t wait 🔥🔥🔥

Andika igitekerezo

AMATEGEKO AGENGA IYANDIKA RY'IGITEKEREZO CYAWE