Rwamagana: Umuganda watunganyije umuhanda ugana ku Rwibutso rwa Mwulire

Abaturage bo mu Karere ka Rwamagana bazindukiye mu muganda usoza ukwezi kwa Werurwe 2022, ku rwego rw’Akarere umuganda wakorewe mu Murenge wa Mwulire ahatunganyijwe umuhanda ugana ku rwibutso rwa Jenoside yakorewe Abatutsi mu 1994 rwa Mwulire.

Depite Kanyange Foïbe na Depite Nyabyenda Damien bari kumwe na Meya Mbonyumuvunyi, Visi Meya ushinzwe iterambere ry’Ubukungu Nyirabihogo Jeanne d’Arc abagize Inama Njyanama y’Akarere n’abahagarariye inzego z’umutekano, bifatanyije n’abaturage b’Umurenge wa Mwulire mu muganda, hatungwanywa umuhanda n’ubusitani bw’urwibutso rwa Jenoside rwa Mwulire.

Umuyobozi w’Akarere ka Rwamagana Mbonyumuvunyi Radjab yavuze ko muri uyu muganda hitawe ku bikorwa bijyanye no kwitegura kwibuka ku nshuro ya 28 Jenoside yakorewe Abatutsi muri Mata 1994; kandi ko imyiteguro izakomeza kuko kwibuka abazize Jenoside bireba buri Munyarwanda wese.

Mu butumwa bwatanzwe nyuma y’umuganda Depite Nyabyenda Damien yabwiye abaturage ko icyo Perezida Kagame ashaka ari ukugira u Rwanda rutuwe n’umunyarwanda ushoboye kandi uri mu muryango utekanye uteye imbere; ari nayo mpamvu yabashyiriyeho gahunda ya Ejo Heza igamije kubafasha gutegura amasaziro yabo.

Yanasabye abaturage kujyana abana mu ishuri, bakabaha n’ibikoresho by’ishuri, bagashyigikira gahunda yo gufatira ifunguro ku ishuri, kandi bakirinda gukoresha abana imirimo ivunanye ibabuza kujya kwiga kuko uzabikora amategeko abimubaza.

Depite Nyabyenda yibukije abaturage ko mu gihe Leta ibagejejeho amashanyarazi n’amazi meza hafi y’ingo zabo, na bo baba bagomba kuyageza mu ngo zabo kandi bakabibyaza umusaruro nk’uko bikwiye.

Yakanguriye abaturage kubungabunga ibikorwa remezo bagejejweho n’Umukuru w’Igihugu birimo: imihanda yatunganyijwe, amashuri yubatswe, imiyoboro y’amazi meza, imiyoboro y’umuriro w’amashanyarazi,

Mu Murenge wa Mwulire ingo zivoma amazi meza zigeze kuri 68%, ingo zifite amashanyarazi ni 71.38%, hari icyanya cy’inganda kirimo inganda 10 zikora n’izindi enye zimaze kuzura, kandi hatunganyijwe imihanda ifite uburebure bwa Km 5,1.

Depite Nyabyenda Damien abasabye kwirinda amakimbirane yo mu ngo kuko ari yo ateza ibibazo byinshi birimo imirire mibi n’igwingira ry’abana; bakabyara abo bashoye kurera, bakizigamira muri koperative yo kubitsa no kugurizanya UMURENGE SACCO.

Depite Kanyange Foibe yasabye abaturage kurushaho kugira no kwimakaza umuco w’isuku aho batuye, ku myambaro, mu itegurwa ry’amafunguro n’ibindi kandi bakirinda kubana n’amatungo mu nzu kugira ngo birinde indwara ziterwa n’umwanda.

Meya Mbonyumuvunyi yibukije abaturage ko COVID-19 igihari, bityo abakangurira gukomeza kuyirinda bubahiriza amabwiriza yashyizweho kandi bitabira igikorwa cyo kwikingiza byuzuye.

Yashimiye Abadepite ku byumweru bibiri bagiye kumara basura abaturage bo mu Mirenge igize Akarere ka Rwamagana kandi banaganira nabo, aho bamaze gusura Imirenge 11 harimo n’Umurenge wa Mwulire bakoreyemo umuganda.

Nyuma y’umuganda, Depite Kanyange Foïbe na Depite Nyabyenda Damien basuye urwibutso rwa Jenoside yakorewe Abatutsi mu 1994 rwa Mwulire; bunamira inzirakarengane 26,927 ziharuhukiye.