Rumaga yashyize ahagaragara igisigo kivuga ko ntawutagira impano 

  • MUTETERAZINA SHIFAH
  • Gashyantare 11, 2024
  • Hashize ibyumweru 3
Image

Umusizi uri mu bakomeye mu Rwanda, Rumaga Junior yashyize igisigo kivuga ko ntawutagira impano, kiri mu muzingo we wa kabiri yise ‘Igihango cy’Ubushuti’.

Mu kiganiro cyihariye yagiranye n’Imvaho Nshya, Rumaga yavuze ko igisigo yashyize hanze muri iki cyumweru, yacyanditse agamije kumenyesha abantu ko ntawutagira impano.

Yagize ati: “Igisigo cyanjye kigaruka ku buzima bw’uko nta muntu utagira impano muri iy’Isi, ahubwo bitandukana bitewe n’impano igezweho muri iyo minsi, ukaba wakeka ko udafite impano y’ubwarimu kuko tugeze mu kiragano gikeneye abaganga, ukaba wakeka ko udafite impano yo kuriririmba kuko hakenewe abakina teyatire, umuntu ni igiti cy’impano zose aho iyo ufumbiye ari yo igutunga.”

Rumaga avuga ko igitekerezo cy’igisigo cye, cyashibukiye ku muzingo (Album) we wa kabiri, uvuga ku buzima bwa buri munsi bwa muntu by’umwihariko ubwo mu mutwe.

Ati: “Ibibazo by’ubuzima bwo mu mutwe bituruka ku kuba umuntu yavuga ko nta mpano afite, akaba yagira depression, akaba yagira ikibazo avuga ngo yabaho ate, mu Isi tubona igezweho y’Impano, nshaka kwereka mbere ya byose ko buri muntu ko afite impano, ahubwo impano ye ntabwo azi ngo yayifumbiza ibiki ngo ibashe gukura imutunge.”

Kuri Rumaga asanga umwaka washize wari uw’ubusizi.

Ati: “Ni umwaka wabayemo igitaramo cy’ubusizi mu buryo butari bumenyerewe, ni umwaka nasohoyemo album yanjye nanayimuritsemo, twabonyemo ibisigo byinshi kandi byiza, bikoze mu buryo bwa kijyambere, ku buryo n’umwaka twabonyemo itara nanone ry’ubusizi ryongeye kwaka.”

Igisigo  Imbuto y’Impano  Rumaga yakigeneye buri wese, ariko by’umwihariko abana bato n’abagore batwite.

Kimwe mu byo abakunzi ba Rumaga by’umwihariko abakunda ibisigo bye bakwiye kwitega muri uyu mwaka,  ngo ibyiza byinshi bikubiye mu muzingo we wa kabiri arimo gutegura.

Ati: “Ibyiza kuri jye, burya ibyo mwabonye biba ari bito kuruta ibisigaye, mpora nshaka icyiza naha abantu banjye kuruta icyabanje.”

Rumaga ni umwe mu basizi bayoboye mu Rwanda, wavukiye i Mutakara na Nyamagana kwa Nangingare mu Ruhango.

Nyuma umuryango we uza kwimukira mu Marangara i Muhanga, ari na ho uyu munsi utuye. Gusa uyu musore aba i Kigali kubera impamvu z’ibyo akora.

Uretse Igisigo Imbuto y’Impano Rumaga yashyize ahagaragara, muri iki cyumweru hashyizwe ahagaragara ibindi bihangano birimo Valentina ya Safi Madiba, C’est La Vie ya Yvanny Mpano ft Social Mula, Tambuka ya Victor Rukotana n’izindi.

  • MUTETERAZINA SHIFAH
  • Gashyantare 11, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE