Ruhango: Ababagiraga ingurube mu bikari banyuzwe n’ibagiro rigezweho begerejwe

  • AKIMANA JEAN DE DIEU
  • Mutarama 3, 2024
  • Hashize amezi 2
Image

Ibagiro ry’ingurube rya kijyambere rya Kirengeli ryuzuye mu Murenge wa Byimana, Akarere ka Ruhango, ryishimiwe cyane n’ababagiraga mu bikari ayo matungo akenera kubaganwa ubwitonzi kugira ngo atagira ingaruka ku bakunzi b’inyama zayo ziswe Akabenzi.

Bavuga ko kubagira muri iryo bagiro ryuzuye ritwaye miliyoni zisaga 126 z’amafaranga y’u Rwanda, babyitezeho kongera ubuziranenge bw’inyama y’ingurube ikunzwe n’abatari bake mu Karere ka Muhanga n’ahandi hose mu Gihugu.

Iri bagiro ryatangiye gutanga inyama zibaganywe ubuhanga, bigabanya izaturukaga mu bikari no mu nsi y’ibiti zitujuje ubuziranenge bivugwa ko zanaribwaga zidapimwe n’abaganga b’amatungo.

Bamwe mu babagiraga mu mu bikari baravuga ko nubwo bakora urugendo rurerure baza kuri iri baguro baba bizeye ko bagiye kugurisha imyama zujuje ubuziranenge.

Gakwaya Sylvestre usanzwe acuruza inyama z’ingurube mu Gasanteri ka Mpanda, yemeza ko kuva bahabwa iri bagiro yahisemo kujya azana ingurube yaguze bakazimubagira agatwara inyama zapimwe neza.

Yagize ati: “Njyewe nsanzwe mbaga ingurube nkazibagira iwanjye mu rugo, ariko kuva baduha ibagiro nahisemo kujya ngura aya matungo ku ibagiro rigezweho batwubakiye bakazibaga zikahava zipimwe na muganga ubizi neza. Kuko mbere twahitaga tuzigurisha zidapimwe mbese ubuziranenge bwari hasi.”

Gakire Valens avuga ko yishimiye ko iri bagiro ryatangiye kubagirwamo ingurube kuko mbere byakorerwaga ahantu hatizewe isuku.

Yagize ati: “Turishimira ko iri bagiro ryatangiye kutubagira ingurube abenshi bazi ku izina ry’Akabenzi. Byari biteye ikibazo kuko twabagiraga ahantu hatari isuku, ahenshi mu mashyamba tukangiza ibidukikije, mu bikari by’aho dutuye ndetse no munsi y’ibiti ku miharuro yacu. Ni ahantu hatizewe ubuziranenge bwazo zishobora kwangiza ubuzima bw’abaziriye.”

Inyama y’ingurube muri Ruhango

Uwizeyimana Dieudonne, Umuyobozi Mukuru wa Kompanyi ya Gafunzo Agroprocessing Center (GAPC Ltd) yatsindiye isoko ryo gucunga iri bagiro ry’ingurube rya Kirengeli, avuga ko bamaze kubona umubare w’abantu benshi bacuruza inyama z’Ingurube  bemeye ko bazajya bazana amatungo bakababagira.

Yavuze ko bakiri mu biganiro  n’Utubari duciriritse, utwisumbuye ndetse n’amahoteli yo mu Ntara yacu ndetse nabandi b’i Kigali basanzwe bazitwara.

Yagize ati: “Tumaze ibyumweru 2 dutangiye ariko twabanje kuganiriza abantu basanzwe bazwiho kubaga ingurube tubasaba ko baza tugakorana, kandi barabitwemereye bamwe banatangira kuzizana.

Ariko ntabwo baraba benshi cyane ku rugero twumva tubyifuzaho, kandi twanaganiriye n’abafite utubari dutandukanye kugira ngo bajye baza gutwara inyama ku ibagiro bizeye aho zivuye kandi zapimwe neza.”

Yongeyeho ko barimo kwagura isoko rikagera mu mahoteli yose yo mu Ntara y’Amajyepfo ndetse n’ay’i Kigali yatangiye kubagana ngo baje bayatungayiriza inyama y’ingurube.

Uwizeyimana avuga ko bagiye gukora umushinga uhamye wo kwegera abasanzwe bafite ibiraro byororerwamo ingurube kugira ngo zororwe neza kandi zitange inyama nziza.

Anongeraho ko bazakorana n’abahinzi b’umuceri mu gishanga cya Gafunzo, bakabashakira icyororo cy’ingurube cyiza kibaha ifumbire ndetse bakazanabona amafaranga bagurishije izikuze.

Umuyobozi w’Akarere ka Ruhango Habarurema Valens, avuga ko iri bagiro ryatangiye gukora mu byumweru bishize,  kandi rikora buri munsi, agakangurira abasanzwe bacuruza inyama z’ingurube kurikoresha kuko ari bo ryubakiwe.

Yagize ati: “Ibagiro ryubatse mu Murenge wa Byimana mu Kagali ka Kirengeli ryaruzuye dutegereza ibikoresho byari bitaraboneka ariko twarabishatse ndetse rimaze ibyumweru bibiri rikora kandi rikora buri munsi. Ahubwo turasaba abacuruza izi nyama z’ingurube ko bajya bazana aya matungo bakayabagirwa ku buryo bugezweho kandi tugiye gushyiraho ahantu heza hazajya hagurirwa izi nyama hariya i Kirengeli”.

Iri bagiro rifite ubushobozi bwo kubagirwamo ingurube zigera kuri 50 ku munsi; gusa mu byumweru bibiri bitambutse ubuyobozi bwaryo buvuga ko bwakoze ubukangurambaga mu bari basanzwe babaga, bakaba bakira nibura ingurube ziri hagati 5 na 8 ku munsi.

Ryubatswe ku bufatanye n’Akarere ka Ruhango n’umushinga PRISM uteza imbere uruhererekane rw’ibikomoka ku matungo magufi ushyirwa mu bikorwa n’Ikigo cy’Igihugu gishinzwe Ubuhinzi n’Ubworozi (RAB).

  • AKIMANA JEAN DE DIEU
  • Mutarama 3, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE