Ruhango: Huzuye ibagiro ry’ingurube rya miliyoni 126 Frw

  • Imvaho Nshya
  • Nzeri 19, 2023
  • Hashize amezi 8
Image

Hashize igihe abaturage bo mu Mirenge ihana imbibi n’Umurenge wa Byimana mu Kagali ka Kirengeri bategereranyije igishyika ibagiro ry’Ingurube (Akabenzi) ryuzuye ritwaye miliyoni 126 z’amafaranga y’u Rwanda ryubatswe n’Akarere ka Ruhango.

Biteganyijwe ko iryo bagiro riherereye i Kirengeli rizatahwa mu gihe cya vuba, rikazagabanya urugendo abakunzi b’Akabenzi bakoraga bajya gushaka izo nyama zirahirwa na benshi ko zinurira.

Mu kiganiro n’Imvaho Nshya, abo baturage bavuze ko bishimiye iki gikorwa remezo kizagabanya indwara abarya izi nyama bari kuzanduzwa n’izabagiwe aho batazi ntizinapimwe n’abaganga babifitiye ubushobozi n’uburenganzira.

Mugiraneza Thomas w’imyaka 33, avuga ko bategereje ko kuritaha rigatangira gutanga serivisi ku bashakaga inyama z’ingurube bakazirya batazi iyo zabagiwe.

Yagize ati: “Turashimira Leta yacu yatekereje ko natwe dukwiye kubakirwa ibagiro ry’ingurube kuko mu Karere kose nta handi habaga irindi bagiro ry’ingurube kuko akenshi n’abazishakaga baziguraga ariko batazi aho zabagiwe kuko abenshi bajyaga kuzigura kure”.

Umubazi w’ingurube Rukundo Pacifique, avuga ko bishimishije yajyaga abaga akazijyana i Kigali rwihishwa akavuga ko ubu bigiye kumworohera, akazajya azijyana i Kigali mu tubari yajyaga azigemurira rwihishwa kuko azashaka ibyangombwa by’aho zabagiwe ndetse zanapimwe n’umuganga ubyemerewe.

Yagize Ati: “Nsanzwe ndi umubazi w’ingurube ariko najyaga nzibagira ahantu hihishe nashaka no kuzitwara i Kigali nkazijyana nihishe kuko nta cyangombwa ngira cyo kuzibaga, ariko ngiye gukoresha aya mahirwe duhawe y’iri bagiro njye nzohereza nibura hari ahantu hazwi zabagiwe kandi zapimwe hizewe ubuziranenge bwazo”.

Umuyobozi w’Akarere ka Ruhango, Valens Habarurema avuga ko bajya gutekereza iri bagiro ry’Akabenzi batekereje ku Mirenge ya Mbuye, Byimana, Ruhango na Mwendo kubera ko abantu bo muri iyi Mirenge bafite ubworozi bw’aya matungo ku kigero cyo hejuru akemeza ko bazabasha kujya bazigurishiriza hafi ku ibagiro aho kujya muyandi masoko atabegereye.

Yagize ati: “Tujya gutekereza kubaka iri bagiro ryatwaye amafaranga y’u Rwanda miliyoni 170, ni uko twabonaga ko muri iyi Mirenge yegeranye n’Umurenge wa Byimana bafite ubworozi buteye imbere ku bijyanye n’ingurube, bityo rero niba twubatse iri bagiro haraba hari n’isoko ryazo abantu bazajya bazanamo amatungo n’abayagura nibashaka bahite bayababagira batware inyama”.

Yongeyeho ko usibye abazajya bava ahandi n’umuturage uzaba afite itungo rye ashaka inyama azajya arizana yishyure amafaranga make maze nabo bahabwe serivisi yo kuribabagira rihite ripimirwa aho bajyane inyama zaryo banizeye ko nta kibazo zifite ariko kandi bizanagabanya abantu bajyaga babagira iyo mu mibyuko no mu ntoki rwihisha ugasanga abaturage bacu banahawe inyama zirwaye zidakwiye kuribwa.

Yanavuze ko iki gice cya Kirengeli kimaze igihe harubatswe isoko risanzwe rinamaze igihe ridakoreshwa uko bikwiye ariko ubu turifuza ko hongera hakagira agashyuhe kandi murabizi ko ari ku muhanda mugari ukorerwaho ingendo za Butare -Nyanza – Ruhango -Muhanga -Kigali.

Hari kandi ingendo zambukiranya imipaka zerekeza  mu bindi bihugu birimo u Burundi na Repubulika iharanira Demokarasi ya Congo, ariko kandi twanatekereje ku bindi bice by’Igihugu byagemurwamo inyama z’akabenzi kandi bizafasha umworozi kwibuka ko agomba kubikora neza bikamuha amafaranga yo kumufasha kwikenura akava mu bukene.

Iri bagiro ryuzuye ritwaye amafaranga asaga miliyoni 170 rikazafasha abarozi korora ingurube bazigurishe biteze imbere ndetse banabashe kurya inyama z’ingurube (Akabenzi) zabagiwe ahantu hazwi kandi zigapimwa neza byizewe.

AKIMANA JEAN DE DIEU

  • Imvaho Nshya
  • Nzeri 19, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE