Prosper Nkomezi ntakozwa ibyo guterera umukobwa ivi

  • MUTETERAZINA SHIFAH
  • Gashyantare 19, 2024
  • Hashize amezi 2
Image

Umuhanzi w’indirimbo zo kuramya no guhimbaza Imana Prosper Nkomezi, avuga ko atemera ibijyanye n’umuco wiharajwe n’abasore, wo guterera umukobwa ivi umusaba ko yazakubera umugore.

Muri iyi minsi usanga abenshi mu basore cyane cyane abatuye mu bice bifite aho bihuriye n’umujyi, mbere yo gushaka umukobwa babana nk’umugore n’umugabo, habaho ibyo bita guterera umukobwa ivi.

Aha ni igihe usanga umusore amaranye igihe akundana n’umukobwa hanyuma mu rwego rwo kumusaba kubana akaramata, akamutungura bitewe n’uko yabiteguye ubundi akamupfukama imbere afite impeta, akamubwira ati “ese uremera kuzambera umugore?”

Ariko abenshi bakaba bakunda gukoresha ururimi rw’amahanga bagira bati “Will you Marry me”, n’uko umukobwa agasubiza, hakaba hari igihe abyemera cyangwa akabihakana.

Mu kiganiro yagiranye n’imwe muri television zikorera mu Rwanda cyatambutse ku mugoroba wa tariki 18 Gashyantare 2024, mu magambo macye Prosper Nkomezi yavuze ko atazigera atera ivi.

Yagize ati: “Ntabwo ivi ndyemera, nta nubwo nzaritera.”

Ku bijyanye n’ubuzima bwe bw’urukundo, Nkomezi avuga ko nta mukunzi w’umwihariko afite.

Ati: “Nemera urukundo kubera ko n’Imana ari urukundo, ariko nta ndabo natanze, urukundo rwa Kirisitu nduhoramo, abakunzi ndabafite, hari abantu Imana iba yaraduhaye, nta mukunzi w’umwihariko mfite.”

Agaruka kubyo ateganyiriza abakunzi be, uyu muhanzi avuga ko yateguye igitaro azataramiramo Abanyarwanda.

Ati: “Ni igitaramo nise nzakingura Live Concert, nacyitiriye indirimbo yanjye yitwa Nzakingura, iri kuri Album yanjye ya kabiri, nayikoze nyuma ya album yanjye ya mbere nise Sinzahwema, nasohoye mfite indirimbo 7, nkora igitaramo ntazi ko abantu bari buze.”

Avuga ko ubwitabire bw’abantu mu gitaramo cye yamurikiyemo Album ya mbere bwamuteye imbaraga zo gukora cyane bikaba byaramugejeje ku bikorwa bitandukanye.

Ati: “Byanteye imbaraga zo gukora n’izindi ndirimbo, zirimo iyitwa nzakingura, nitiriye Album ya kabiri, irimo iyitwa warakoze, Aleluya n’izindi nyinshi cyane, ndetse nyuma yaho nakoze indi Album yitwa Nyigisha, bivuze ko mur’iki gitaramo nzamurika album ebyiri, iyitwa Nzakingura na Nyigisha.”

Nkomezi avuga ko hari zimwe mu ndirimbo ziri kuri iyi mizingo zizasohoka mbere y’igitaramo, kuko bagiye gutangira kuzifatira amajwi n’amashusho muri iki cyumweru, ahasigaye bakazataramana n’abakunzi babo, nyuma y’igihe kinini cyari gishize adataramira Abanyarwanda.

Umuramyi Prosper Nkomezi azwi mu ndirimbo nka Humura, Sinzamuvaho, Ibashagukora, Warakoze n’izindi.

Uyu muhanzi ukunzwe mu njyana zo kuryamya no guhimbaza Imana, amaze igihe kitari gito akorera ibitaramo mu bihugu birimo Kenya, Uganda, Dubai n’ahandi.

Kuba agiye kongera gutaramira Abanyarwanda, Nkomezi avuga ko igitaramo cye kizaba gikomeye cyane, kuko amaze imyaka igera kuri ine agitegura.

Biteganyijwe ko igitaramo cya Prosper Nkomezi kizaba tariki tariki 12 Gicurasi 2024, bakazatangaza nyuma aho aho kizabera.

  • MUTETERAZINA SHIFAH
  • Gashyantare 19, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE