Perezida wa Guinea Bissau yasoje uruzinduko rw’iminsi 3 mu Rwanda

  • Imvaho Nshya
  • Werurwe 9, 2022
  • Hashize imyaka 2
Image

Mu gitondo cyo kuri uyu wa Gatatu, ku Kibuga cy’Indege Mpuzamahanga cya Kigali, Minisitiri w’Intebe Dr. Edouard Ngirente yaherekeje Perezida wa Repubulika ya Guinea-Bissau Gen. Umaro Sissoco Embaló wasoje uruzinduko rw’iminsi itatu yagiriraga mu Rwanda.

Uruzinduko rw’uyu Mukuru w’Igihugu yarutangiye ku wa Mbere, aho yakiriwe na Perezida wa Repubulika y’u Rwanda Paul Kagame hagasinywa n’amasezerano y’ubufatnye bw’ibihugu byombi mu rwego rw’ubukungu n’ubucuruzi, mu burezi, ubukerarugendo, inama z’ubucuruzi no kubungabunga ibidukikije.

Uwo munsi ni na bwo yanasuye Urwibutso rwa Jenoside rwa Kigali, yunamira abazize Jenoside yakorewe Abatutsi mu 1994.

Ku munsi wa kabiri w’uruzinduko, Perezida Umaro Sissoco Embaló yasuye icyanya cyahariwe inganda i Masoro mu Mujyi wa Kigali (Kigali Special Economic Zone/KSEZ), aho yasuye uruganda ruteranyiriza imodoka za Volkswagen mu Rwanda n’urutunganya amafu yujuje intungamubiri rwa Africa Improved Food.

Perezida Umaro Sissoco Embaló yanasuye Carnegie Mellon University, Kaminuza mpuzamahanga yigisha ikoranabuhanga ikorera mu gace ka “Kigali Innovation City” na ko kari mu cyanya cyahariwe inganda.

Muri uru rusinduko, yashishuye ko igihugu cye gifite ubushake bwo guhanahana ubunararibonye n’u Rwanda mu nzego zitandukanye, ndetse ashishimangira ko hari byinshi Guinea Bissau yakwigira ku Rwanda.

  • Imvaho Nshya
  • Werurwe 9, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE