Perezida wa Uganda, Yoweri Kaguta Museveni, yitabiriye Inama y’Abakuru b’Ibihugu na Guverinoma bihuriye mu Muryango w’ibihugu bikoresha Ururimi rw’Icyongereza (CHOGM2022) iri kubera i Kigali, aho yinjiye ku butaka bw’u Rwanda anyuze ku mupaka wa Gatuna umaze atanu wongeye gufungurwa nyuma y’imyaka igera kuri itatu wari umaze ufunzwe.
Mu gitondo cyo kuri uyu wa Kane, ni bwo yafashe indege ya kajugujugu yamugejeje hafi y’umupaka wa Katuna ku rugande rwa Uganda, agafata imodoka yamuzanye ikambuka Umupaka wa Gatuna yerekeza i Kigali.
Perezida Museveni yaherukaga mu Rwanda mu 2017 ubwo habaga ibirori byo kurahira kwa Perezida Kagame. Ni na rwo ruzinduko rwa mbere Museveni agiriye mu Rwanda nyuma y’izahuka ry’umubano warwo na Uganda, bigizwemo uruhare n’umuhungu we akaba n’Umugaba w’Ingabo za UPDF zirwanira ku Butaka, Gen. Muhoozi Kainerugaba.
Umubano wa Uganda n’u Rwanda wazahutse wari umaze imyaka itanu urimo agatotsi. Guhera muri Gashyantare 2022, ibimenyetso byo kuwubyutsa byaragaragaye ku ruhande rwa Uganda binyuze kuri Gen Muhoozi.
Taliki 22 Mutarama 2022, ni bwo Gen Muhoozi yasesekaye i Kigali agirana ibiganiro na Perezida Kagame, byatanze umusaruro ufatika kuko umupaka wa Gatuna wahise ufungurwa nyuma y’icyumweru kimwe gusa.
Ku ya 14 Werurwe 2022, ni bwo Gen Muhoozi yagarutse mu Rwanda yakirwa na Perezida Kagame, aho baganiriye ku gukemura ibibazo byari bikibogamiye umubano w’u Rwanda na Uganda.
Taliki ya 22 Mata, Perezida Kagame yitabiriye ubutumire bwa Gen Muhoozi wari wizihije isabukuru y’amavuko y’imyaka 48, unaba umwanya wo guhura kwe na Perezida Museveni.
Izahuka ry’umubano w’u Rwanda na Uganda ryaje rikenewe, nubwo hari bamwe babihombeyemo batifuzaga ko ibihugu byombi byasubira kongera kugenderana
Imwe mu mitwe y’iterabwoba yakunze kuvugwa cyane muri icyo Gihugu, ndetse mu myaka yashize byanagiye bitangazwa ko yagiye ibona ubufasha butandukanye bwanatumye bamwe mu Banyarwanda badafitanye ikibazo n’Igihugu cyabo bahohoterwa muri icyo Gihugu gifitanye n’u Rwanda amateka maremare.
arakaza neza