Perezida Kagame yatuye Abajyanama b’Ubuzima igitaramo cya Move Afrika

  • NTAWITONDA JEAN CLAUDE
  • Ukuboza 7, 2023
  • Hashize amezi 3
Image

“Mbega uburyo bwiza bwo gusoza umwaka! Turyoherwa n’umuziki, dufite imbaduko n’icyizere. Mpereye ku nsanganyamatsiko y’ubuzima, ubuzima ni umutungo w’agaciro gakomeye. Ndagira ngo uyu mwanya nywuture Abajyanama b’Ubuzima badahwema kutubungabungira amagara no gutuma dutekana.”

Ubwo butumwa bwatanzwe na Perezida wa Repubulika y’u Rwanda Paul Kagame, mu butumwa yagejeje ku bihumbi byitabiriye igitaramo Move Afrika cyateguwe n’Umuryango Global Citizen, kizazenguruka mu bihugu binyuranye by’Afurika gihereye i Kigali.

Gahunda y’Abajyanama b’Ubuzima yatangiye mu Rwanda guhera mu mwaka wa 1995 nyuma y’uko Igihugu cyari kikiva muri Jenoside yakorewe Abatutsi aho ibikorwa remezo by’ubuzima byinshi byari byarasenyutse ndetse n’abaganga benshi barapfuye n’abandi barahunze Igihugu.

Uko imyaka yagiye ihita ni ko iyo gahunda yagiye ivugururwa kugeza ubwo Abajyanama b’Ubuzima bageze ku rwego rwo guhabwa inshingano zo kuvura indwara zoroheje, gukora ubukangurambaga mu rwego rw’ubuzima n’izindi nshingano.

Uyu munsi mu Rwand habarurwa Abajyanama b’Ubuzima barenga 45,000 batanga serivisi zirimo gusuzuma no gutanga ubujyanama ku babyeyi batwite n’abonsa, kugenzura imikurire y’abana, kuvura malariya yoroheje, ndetse bamaze kumenyekana ku rwego mpuzamahanga nk’umusemburo w’iterambere ry’u Rwanda n’intsinzi rwagize mu kugera ku Ntego z’Ikinyagihumbi (MDGs).

Mu mwaka wa 2022-2023 abaturage 59% barwaye Malaria mu gihugu hose bavuwe n’Abajyanama b’Ubuzima.

Igitaramo cya Move Afrika cyabaye mu ijoro ryo ku wa Gatatu, kikaba cyayobowe n’umuhanzi w’icyamamare akaba n’umwanditsi w’indirimbo w’Umunyamerika Kendrick Lamar, ariko kinaririmbamo n’abandi bahanzi nka Bruce Melodi, Ariel Wayz na Zuchu wo muri Tanzania.

Perezida Kagame yanejeje cyane abafana bitabiriye icyo gitaramo, ku buryo ijambo yabagejejeho ryose ryasoje kumvikana amajwi aranguruye yavugaga ati: “Ni wowe! Ni wowe!…, mu rwego rwo kumwereka ko bamushyigikiye mu miyoborere yimakaza iterambere ry’umuturage.

Perezida Kagame yagaragaje ko ibikorwa bya Global Citizen bije gushyigikira gahunda y’Afurika yo gushyira hamwe mu gukemura ibibazo byayo, by’umwihariko mu rwego rw’ubuzima.

Yaboneyeho gushimangira ko ibihugu by’Afurika byiyemeje gushyira 15% by’ingengo y’imari yabyo mu rwego rw’ubuzima mu avugurura agamije kongera imbaraga zishyirwa mu kugeza serivisi z’ubuzima ku baturage bose.

Perezida Kagame yaboneyeho guhishura ko yishimiye kuba “intangarugero mu gukusanya inkunga zijya mu buzima ku rwego rw’Umuryango w’Afurika Yunze Ubumwe (AU).”

Yakomeje agira ati: “Hari ibintu byinshi twakemura dufatanyije. Mu gukorera hamwe, umugabane wacu uhagarara ushikamye kandi ushobora kwikemurira byinshi mu bibazo duhura na byo.

Twiteguye kujya twakira Global Citizen buri mwaka, hano i Kigali, binyuze muri Move Afrika. Twiteguye gukorana na buri wese kandi twizera ko mwaje mwisanga mwese, ndetse twizeye kuzongera kubabona mu gihe kiri imbere.”

Yafashe umwanya wo kwifuriza abitabiriye icyo gitaramo cyari imbaturamugabo kuzagira iminsi mikuru myiza isoza umwaka wa 2023 n’itangira uwa 2024, ati: “Ndabashimiye kandi ndabifuriza Noheli Nziza n’Umwaka Mushya Muhire.”

Ibitaramo bitegurwa na Global Citizen birenze kuririmba no kubyina gusa, kuko biba bifite intego zigamije guhuza abatuye Isi no gukora ubukangurambaga bwo kurwanya ubukene, guharanira uburezi kuri bose, kwimakaza uburinganire n’ubwuzuzanye byose bigamije kugera ku ntego z’iterambere rirambye.

Intego ya mbere y’ibyo bitaramo ni iyo gushishikariza urubyiruko n’abahanzi kugaragaza ubushobozi bwabo bwo guhanga udushya binyuze mu mpano zabo bagafasha gushyira mu bikorwa intego z’iterambere ku Isi muri rusange.

Amafoto: Urugwiro Village

  • NTAWITONDA JEAN CLAUDE
  • Ukuboza 7, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE