Perezida Kagame na Madamu Jeannette Kagame bitabiriye ibirori bya Move Afrika

  • NTAWITONDA JEAN CLAUDE
  • Ukuboza 7, 2023
  • Hashize amezi 3
Image

Perezida wa Repubulika y’u Rwanda Paul Kagame na Madamu Jeannette Kagame, bifatanyije n’ibihumbi by’abafana ba muzika mu gitaramo cya Move Afrika cyabereye muri BK Arena mu ijoro cyo ku wa Gatatu, cyaririmbywemo umuhanzi w’icyamamare mpuzamahanga akaba n’umwanditsi w’indirimbo, Kendrick Lamar.

Ni ibirori bya mbere bibereye muri Afurika by’ubu bwoko bitegurwa na Global Citizen bikaba bizakomeza kuzenguruka no mu bindi bihugu by’Afurika mu myaka itanu iri imbere.

Ibyo birori byari bibereye ijisho, ariko ubwitabire bwa Perezida Kagame bwabaye akarusho kuko bwatumye birushaho kuryoha, ndetse abafana bakaba bishimiye kumva ubutumwa bugufi yabagejejeho.

Inyubako ya BK Arena yakira abarenga 8,000 yari yakubise yuzuye abafana baryohewe no gutaramirwa n’abandi bahanzi barimo abo mu Rwanda n’abandi baturutse mu bice bitandukanye by’Afurika.

Abahanzi bo mu Rwanda bafashe umwanya wo kuririmba muri iki gitaramo cy’imbaturamugabo ni Bruce Melodie, Ariel Wayyz, umuhanga mu kuvanga umuziki DJ Toxxxyk, umubyinnyi Sherrie Silver, ndetse n’umuhanzi wo muri Tanzania Zuchu.

Ibi bitaramo birenze kuririmba no kubyina gusa, kuko biba bifite intego zigamije guhuza abatuye Isi no gukora ubukangurambaga bwo kurwanya ubukene, guharanira uburezi kuri bose, kwimakaza uburinganire n’ubwuzuzanye byose bigamije kugera ku ntego z’iterambere rirambye.

Intego ya mbere y’ibyo bitaramo ni iyo gushishikariza urubyiruko n’abahanzi kugaragaza ubushobozi bwabo bwo guhanga udushya binyuze mu mpano zabo bagafasha gushyira mu bikorwa intego z’iterambere ku Isi muri rusange.

Ibirori by’ubwo bwoko byaherukaga kuba byabereye ahitwa Great Lawn, Central Park mu Mujyi wa New York muri Leta Zunze Ubumwe z’Amerika (USA) tariki ya 24 Nzeri 2022, bikaba byarafashije gukusanya miliyari 2.4 z’amadolari y’Amerika yo gufasha mu kurwanya ubukene.

Mu nkunga yakusanyijwe, Umuryango Global Citizen watangaje ko harimo miliyoni zisaga 440 z’amadolari y’Amerika yagenewe by’umwihariko gushyigikira imishinga yo kurwanya ubukene bukabije ku Mugabane w’Afurika.

Ni mu bukangurambaga bwashyigikiwe n’abayobozi batandukanye ku Isi bwiswe: “Duhagarike Ubukene uyu munsi”. Ibihugu byafashe iya mbere muri uwo mwaka birimo Canada, u Bubiligi, Denmark, Komisiyo y’Umuryango w’Ubumwe bw’u Burayi, u Budage, Ghana, Lithuania, Luxembourg, Malta, u Buholandi, Norway, Slovenia, USA n’ Umuryango w’Abibumbye.

Uyu ni umwaka wa 11 ibirori by’ubwo bwoko bibaye, agashya kakaba ari uko ari bwo bwa mbere bikorewe ku mugabane w’Afurika.

Kuri ino nshuro, intego ni iyo kugaragaza impinduka no gushyigikira ubucuruzi bwatangijwe n’abagore, kwimakaza serivisi z’ubuzima kuri bose no gushyigikira ba rwiyemezamirimo b’urubyiruko bo mu bice bitandukanye by’Afurika.

By’umwihariko, muri iki gitaramo cyabereye i Kigali, Global Citizen  yahaye akazi urubyiruko rw’u Rwanda rurenga 1000 mu bikorwa byateguwe kuri uyu munsi.

Muri uyu mwaka, Umuryango Global Citizen uvuga ko wakoze ibikorwa birenga miliyoni 3.3 byakusanyijwemo amamiliyoni y’amadolari y’Amerika yo gushyigikira ibikorwa byo guteza imbere uburezi, uburinganire, kubungabunga ibidukikije ndetse no kurwanya inzara ku Isi.  

Kendrick Lamar yishimiye gutaramira i Kigali
  • NTAWITONDA JEAN CLAUDE
  • Ukuboza 7, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE