Perezida Kagame yamaganye icuruzwa ry’abakobwa muri Miss Rwanda

  • NTAWITONDA JEAN CLAUDE
  • Gicurasi 1, 2022
  • Hashize imyaka 2
Image

Itabwa muri yombi ry’Umuyobozi w’Ikigo Rwanda Inspiration Back kimaze imyaka 8 gitegura irushanwa rya Miss Rwanda, Ishimwe Dieudone wamenyekanye nka Prince Kid, riri mu byihariye ibitangazamakuru muri iki cyumweru kirimo gusozwa.

Perezida wa Repubulika y’u Rwanda Paul Kagame, yamaganye ibikorerwa abana b’abakobwa muri iri rushanwa, anavuga ko iyo mico mibi itazihanganirwa na gato.

Nyuma yo gufatwa n’Urwego rw’Igihugu rw’Ubugenzacyaha (RIB) akekwaho guhohotera abakobwa bitabiriye Miss Rwanda mu bihe bitandukanye, ni bwo amakuru yagiye acicikana arimo n’agaragaza ibihamya by’uko Prince Kid hari abo yahohoteye yitwaje umwanya arimo nk’Umuyobozi w’icyo kigo gifite ububasha bwo kwimika Nyampinga w’u Rwanda.

Perezida Kagame, asanga ibikorwa muri Miss Rwanda ari icuruzwa ry’abana b’abakowa kuko ritagiraga gikurikirana ugasanga n’abacuruzwa barabihomberamo mu gihe ababacuruza binjiza agatubutse bakongeraho no guhohotera abana b’abakobwa bamaze no kubyaza inyungu z’ibifatika.

Yabigarutseho mu mpanuro yagejeje ku bitabitiye Inteko Nkuru y’Umuryango RPF-Inkotanyi ku wa Gatandatu, agira ati: “Hari umuntu wafashwe wafunzwe, njye najyaga numva bavuga Miss Rwanda, nkagira ngo nyine koko ni ukurata ubwiza… usibye ko na byo, hari ibintu umuntu yihorera kubera ko ntacyo bitwaye ariko nta n’icyo bitanze. Ariko ikibi cyaje kuvamo numva gitumye mbivuga, ni uko abangaba babigize umwuga atari bo babyungukiragamo ahubwo bikungukira ababiteguye bakabishyiraho. Usanga abagabo babiri inyuma, bikaza kuvamo gucuruza abo bana b’abakobwa, kubacuruza cyangwa se na bo ubwabo bakabahohotera.”

Perezida Kagame yakomeje yibaza uko icyo kintu kireba uburanga bw’abantu cyabayeho, niba kigira amategeko akigenga, kitagira abagikurikirana ku buryo umuntu ashobora guhanga umurimo, “agahuza abakobwa, akabashukisha utuntu, mbere y’uko abacuruza akabanza we ubwe akabakoresha ibyo abakoresha.”

Yakomeje asaba abana b’abakobwa kwanga guhohoterwa mu buryo ubwo ari bwo bwose, cyane ko no kugira ngo uwafunzwe muri iki cyumweru afatwe byaturutse ku mukobwa umwe mu bahatanye basaga 10 bahohotewe wabyanze ahubwo akabimenyesha inzego z’ubutabera atitaye ku kuba na bagenzi be baramuteraga ubwoba ko kwanga ibyo asabwa bishobora kumuviramo kubura amahirwe.

Perezida Kagame kandi yanavuze ko ingeso yo guhohotera abantu itagarukira muri Miss Rwanda gusa kuko igera mu nzego zitandukanye aho, bamwe babona imirimo cyangwa bakazamurwa mu ntera ari uko bamaze gutanga ruswa y’imibiri yabo.

Ati: “Ni ibintu bibi cyane, ibyo bintu mubyirinde ni imico mibi. Nucika Leta ntikumenye ngo iguhane, n’Imana izaguhana. Ariko dushake uburyo twajya tubimenya, kugira ngo ibiducika bibe bike, ibitaducitse tubihane. Rwose kuko si umuco nyarwanda, si umuco w’abantu.”

Icuruzwa ry’abantu biganjemo Abanyarwandakazi ku Isi na ryo rireze

Perezida Kagame yanavuze ko uretse icyo cyaha cyo gucuruza abantu mu buryo bw’amayeri cyagaragaye mu gihugu, hari n’abantu bakomoka mu Rwanda biganjemo abagore n’abakobwa, bagenda bamenyekana ko bacurujwe mu mahanga bagahindurwa inkoragahato n’ibikoresho by’ubusambanyi (sex slaves) cyangwa bagakurwamo zimwe mu ngingo z’umubiri zikagurishwa.

Yakomoje kuri raporo zitandukanye ahabwa ziturutse muri Polisi y’u Rwanda zigaragaza uruhererekane rw’ubufatanye rw’abanyabyaha bari mu Rwanda n’ibindi bihugu butuma abantu bamwe bashimutwa bizezwa ibitangaza bakisanga mu maboko y’ababacuruza badafite kirengera.

Bimwe mu bihugu yakomojeho byoherezwamo abantu bacuruzwa bavuye mu Rwanda hario u Bushinwa, Oman, Ibigobe bya Peresi n’ahandi.

Ati: “Hari Abanyarwanda benshi bagenda, cyane cyane baba ari abakobwa ariko n’abahungu barimo, rimwe tukazagira gutya Polisi ikabona amakuru ko hari umuntu wabonye uwo atuma aramubwira ati turi aha turi abakobwa 12, twaje dutya nimudutabare. Uko yagiye ntawubizi, ariko agezeyo nyine asanga ibyo yasanze bitoroshye, bamwe babagize nk’abacakara, abandi bakabagira ibikoresho by’ubusambanyi, bakabahohotera gusa bakaba ari cyo babereyeho, b’Abanyarwanda.”

Perezida Kagame yasabye inzego zose guhaguruka zikarwanya ibyo byaha, ariko anashishikariza abahohoterwa gutinyuka gutanga amakuru kugira ngo n’ababikora babihanirwe by’intangarugero.

Ati: “Si mbona impamvu abantu batinya kwirenganura bitabira inzego, keretse niba batinya kujya mu nzego cyangwa inzego zacu bavuga bati ariko se uraregera nde? Uraregera umeze atyo? Icyo muzacyirinde, aho abantu bashobora gutinya kugira uwo bagana ngo bamusabe kurenganurwa kubera ko bazi ko na we ari uko ameze cyangwa ntacyo yakora mu kurenganura umuntu. Icyo cyaba ari ikintu gikomeye.”

Yongeye gushimangira ko icyo abantu bakeneye ari ukubahana hatitawe ku itandukaniro ribaranga, bagaharanira kubana, kuzuzanya ndetse amategeko y’umuryango n’indi mibanire bikubahirizwa ntibihere mu magambo gusa.

  • NTAWITONDA JEAN CLAUDE
  • Gicurasi 1, 2022
  • Hashize imyaka 2
TANGA IGITEKEREZO
Dr Venant IYAKAREMYE says:
Gicurasi 2, 2022 at 9:24 am

Murasobanutse. Byose mwabishyizemo

Andika igitekerezo

AMATEGEKO AGENGA IYANDIKA RY'IGITEKEREZO CYAWE