Perezida Kagame mu mwiherero wa ba Guverineri ba Nigeria ubera i Kigali

  • NTAWITONDA JEAN CLAUDE
  • Kanama 23, 2023
  • Hashize amezi 9
Image

Perezida wa Repubulika y’u Rwanda Paul Kagame, ari mu banyacyubahiro bategerejwe mu mwiherero w’iminsi itatu wa ba Guverineri ba Leta (Intara) zitandukanye za Nigeria. 

Igihugu cya Nigeria gifite Leta cyangwa Intara 36 n’Umurwa Mukuru. Buri Ntara muri izo yitwa Leta kuko ifite inshingano zihariye za Politiki ariko abayobozi bazo bakagira n’inshingano bahuriraho n’ubuyobozi bukuru bwa Repubulika ya Nigeria.

Mu Nama itegerejwe i Kugali guhera ku wa Kane taliki ya 24 Kanama 2023, biteganywa ko abo ba Guverineri bazagirana ibiganiro ku hazaza ho guharanira ubumwe bw’Afurika ndetse no kwihuza k’Umugabane mu guhindura Isi. 

Uretse Perezida Kagame, bivugwa ko ibyo biganiro bizitabirwa na Uhuru Kenyatta wabaye Perezida wa Repubulika ya Kenya ndetse na Jakaya Kikwete wabaye Perezida wa Tanzania. 

Abo bayobozi bari mu bagiye bagaragaza ukutadohoka mu gushishikariza Abanyafurika guhuka bagatangira gusoroma ku mbuto zo gusenya imipaka ibatandukanya bagakorera hamwe nk’abasangiye umurage w’Afurika. 

Urugendo rwo kwihuza kw’Afurika mu rwego rwa Politiki, urw’ubukungu, guhererekanya umuco n’ubusabane bw’Abanyafurika rwitezweho gutanga umusanzu ukomeye mu mpinduramatwara  zikenewe ku Banyafurika ndetse no ku Isi yose. 

Ukwihuza kw’Afurika kwatuma Abanyafurika bakorera hamwe bakabyaza umusaruro amahirwe bihariye ataboneka ku yindi migabane. 

Muri yo harimo kuba hejuru ya 60% by’Abanyafurika ari urubyiruko, bikaba bitanga amahirwe menshi y’abakozi bafite imbaraga kandi bashobora guhanga udushya. 

Binyuze mu Isoko Rusange ry’Afurika (AfCFTA), bivugwa ko Abanyafurika bategura gukora isoko rya mbere rigari ku Isi rihuriramo abaguzi n’abagurisha barenga miliyari 1.3 batuye ku Mugabane.

Kuri ubu Umuryango w’Afurika Yunze Ubumwe ukora nk’Urubuga rwa Politiki rushinzwe guhuza ibikorwa biganisha ku kwihuza kuzuye kw’Afurika aho ibihugu 55 bihuriye muri uwo Muryango bifite icyerekezo cyo gukorera hamwe. 

Nubwo hari intambwe imaze guterwa kugeza ubu, impuguke mu bya Politiki zivuga ko hakenewe guhindura imyumvire n’ubushake bwa Politiki ku bayobozi bamwe na bamwe, kugira ngo uko kwihuza kuzuye gushoboke. 

Buri gihugu mu bihuriye muri AU gisabwa kurenga kwishyura imisanzu no gushyigikira inzego z’uwo Muryango, ahubwo bigatangira gushyira mu bikorwa ibisabwa byose kugira ngo abantu barusheho kugenderana batazitiwe n’imipaka yaciwe n’Abakoloni.

Leta zisabwa kandi kureka bimwe mu byo zifata nk’ubusugire mu guharanira inyungu rusange z’Afurika. 

Nko mu mezi abiri ashize, Perezida Kagame yanenze abayobozi badindiza Isoko Rusange ry’Afurika ngo bararinda ubusugire, avuga ko hari aho ibyo bibazo byabaye nk’umurage.

  • NTAWITONDA JEAN CLAUDE
  • Kanama 23, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE