Patricia Scotland yanyuzwe n’aho u Rwanda rugeze rwitegura CHOGM2022

  • NTAWITONDA JEAN CLAUDE
  • Gicurasi 2, 2022
  • Hashize imyaka 2
Image

Kuri uyu wa Mbere taliki ya 2 Gicurasi 2022, Umunyamabanga Mukuru w’Umuryango w’Ibihugu bikoresha Ururimi rw’Icyongereza (Commonwealth) Patricia Scotland, yageze i Kigali ashima uburyo uyu muryango ufitiye icyizere gikomeye ko u Rwanda mu kuzakira neza Inama y’Abakuru b’’Ibihugu na Guverinoma muri Commonwealth (CHOGM) yitezwe mu cyumweru kizatangira taliki ya 20 Kamena.

Madamu Scotland yabigarutseho nyuma yo guhura n’abayobozi barimo Minisitiri w’Ububanyi n’Amahanga n’Ubutwererane Dr. Biruta ndetse nyuma akanakirwa na Perezida wa Repubulika Paul Kagame.

Mu butumwa yanyujije ku mbuga nkoranyambaga, Madamu Scotland yavuze ko yishimiye kugaruka mu Rwanda kandi ko ari igihugu afitiye icyizere n’ibyishimo by’uko mu kwezi gutaha Kigali izaba yakiriye Abakuru b’Ibihugu na Guverinoma baturutse mu bihugu bigize uru muryango.

Yagize ati: “Ndashima Guverinoma n’abaturage b’u Rwanda ku kwiyemeza n’ubwitange bidasanzwe bashyize mu kuzakira inama ya CHOGM y’intangarugero.”

Yakomeje agira ati: “Iyi ni yo nama ya mbere ya CHOGM igiye kubera muri Afurika nyuma y’imyaka isaga 10 kandi ndashimira Abanyarwanda bose ubumuntu n’ubutwari bashyize mu myiteguro irambuye kugira ngo habeho CHOGM itekanye, itanga umusaruro kandi iganisha Umuryango mu cyerekezo kizima muri ibi bihe bigoye.

Iyi nama yari kuba yarabaye hagati ya taliki 22 na 27 Kamena 2020 iza gusubikwa kubera icyorezo cya COVID19 cyari kimeze nabi Isi yose igihanganye no gushaka ibisubizo byo kugabanya ubukana cyari gifite.

Madamu Scotland yaherukaga mu Rwanda mu kwezi kwa Werurwe 2021 aho yari aje kureba aho imyiteguro yo kwakira iyo nama igeze, avuga ko “u Rwanda rwiteguye bya nyabyo” kuyakira.

Mu kwezi kwa Mata 2021, Minisitiri w’u Bwongereza ushinzwe Commonwealth Tariq Ahmad na we yagiriye uruzinduko mu Rwanda, mu rwego rwo kuganira n’abayobozi aho imyiteguro igeze ngo iyo nama ibe mu buryo butekanye.

Nubwo Ubunyamabanga Bukuru bwa Commonwealth bufatanyije  n’abashinzwe gutegura iyi nama mu Rwanda bari bafashe icyemezo ko yasubukurwa hagati ya taliki ya 16 na 21 Kamena 2021, yongeye gusubikwa nanone kubera ubwiyongere bwa COVID-19.

Nk’uko byari byarateguwe mbere, iyi nama izabera i Kigali, Umurwa Mukuru w’u Rwanda, ikaba yitezwemo ibihugu 54 bibarirwa muri Commonwealth.

Imibare igaragaza ko ibi bihugu bituwe n’abantu bangana na miliyari 2.4, aho muri abo 60% ari urubyiruko ruri munsi y’imyaka 30.

Inama ya CHOGM ubusanzwe iba rimwe mu myaka 2, ikaba ari urwego rukomeye rugishwa inama rugahuza abafata ibyemezo kuri politiki zinyuranye.

Madamu Scotland ari i Kigali aho yitabiriye inama ya 12 y’iminsi ine, ihuza Abayobozi b’Ibigo birwanya ruswa mu bihugu bigize Umuryango w’Ibihugu bikoresha Ururimi rw’Icyongereza (Commonwealth) ku Mugabane w’Afurika izaba guhera taliki ya 3 kugeza ku ya 6 Gicurasi 2022.

  • NTAWITONDA JEAN CLAUDE
  • Gicurasi 2, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE