Paris: Umunyamakuru ushinjwa guhakana Jenoside yakorewe Abatutsi yagizwe umwere

  • Imvaho Nshya
  • Gicurasi 22, 2022
  • Hashize imyaka 2
Image

Urukiko rw’i Paris mu Bufaransa rwahanaguyeho umunyamakuru Natacha Polony icyaha yari akurikiranyweho cyo guhakana Jenoside yakorewe Abatutsi mu 1994, nubwo amagambo yakoresheje yari yuzuye ibitutsi no kutemera ko Ingabo za FPR zabohoye u Rwanda zikarokora Abatutsi bicwaga.

Ku wa Gatanu taliki 20 Gicurasi ni bwo Urugereko rwa 17 rw’Urukiko rw’i Paris rukiko rwanzuye ko kubona mu magambo ya Polony “guhakana ko Jenoside yabayeho” ari “ukumugerekera ibyo atavuze mu magambo ye” nk’uko byatangajwe n’Ibiro Ntaramakuru by’Abafaransa (AFP).

Taliki ya 18 Werurwe 2018 kuri Televiziyo France Inter, ni bwo Natacha Polony, uyobora Ikinyamakuru “Marianne”, yagarutse kuri Jenoside yakorewe Abatutsi mu Rwanda mu mvugo zikakaye zisa nk’izigaragaza ko Isi itagakwiye guta umwanya kuri iyo Jenoside yakozwe “n’ibigoryi (salauds) byari bihanganye n’ibindi bigoryi.”

Mu magambo ye yagize ati: “… ni ingenzi gusobanura ibyabaye muri icyo gihe, usanga ku iherezo udashobora gutandukanya abagome n’abagiraneza.”

Yongeyeho ati: “Ikibabaje ni uko tuvuga ku bwoko bw’ikibazo cy’aho ibigoryi byari bihanganye n’ibindi bigoryi […] Bivuze ko njye numva nta muntu wari ku ruhande rw’abeza cyangwa urw’abagome muri aya mateka.”

Uyu munyamakurukazi yavuze ayo magambo mu gihe guhera muri Mutarama 2017 mu Bufaransa hariho itegeko rigenga ubwisanzure bw’itangazamakuru rihana igikorwa cyo guhakana, gupfobya  cyangwa gutesha agaciro Jenoside zose zemewe mu Bufaransa, atari iyakorewe Abayahudi gusa.

Nyuma y’amagambo ya Natacha, Umuryango Ibuka uharanira inyungu z’abarokotse Jenoside yakorewe Abatutsi, watanze ikirego mu butabera bw’u Bufaransa ndetse gishyigikirwa cyane n’umuryango mugari w’Abanyarwanda baba mu Bufaransa ku bufatanye na sosiyete sivile.

Mu mpera z’umwaka wa 2020 ni bwo Umushinjacyaha yohereje icyo kirego mu rukiko, agishyira mu byaha byibasiye inyokomuntu. Mu ntangiriro z’uku kwezi ni bwo uyu munyamakurukazi uri mu bubatse izina rikomeye mu Bufaransa yagejejwe imbere y’ubutabera.

Mu kwisobanura kwe, Natacha yavuze ko amagambo akakaye avanzemo n’ibitutsi yayakoresheje avuga ku bayobozi gusa, ngo ntaho ahuriye n’abaturage bicwaga muri Jenoside.

Mu bisobanuro bye, hagaragara ko atemera ko Ingabo za FPR zateye u Rwanda zigamije kurubohora kuko yemeza ko zakoze ibyaha bitandukanye ari na byo byatumye u Bufaransa butabasha gusobanukirwa byimbitse itegurwa rya Jenoside ryakozwe n’abayobozi bari ku butegetsi bw’u Rwanda.

Ibitangazamakuru binyuranye byatangaje ko Ibuka yo yagaragaje ko amagambo yakoreshejwe na Madamu Polony w’imyaka 47 yateje urujijo rukomeye cyane, rushyigikira n’ingengabitekerezo y’uko habayeho Jenoside ebyiri mu Rwanda ikunze kuzamurwa n’abagize uruhare muri Jenoside yakorewe Abatutsi bahungiye mu mahanga.

Umwe mu batangabuhamya bari ku ruhande rw’abarokotse Jenoside yakorewe Abatutsi Espérance Mutuyisa-Brossard, yagize ati: “Ntushobora gushyira mu gatebo kamwe abahigi n’umuhigo, kuko ntibihura.”

Natacha Polony ari imbere y’ubutabera nyuma y’aho guhera mu mwaka wa 2021, umubano w’u Rwanda n’u Bufaransa wongeye gusubira ku murongo nyuma y’uruzinduko rwa Perezida Emmanuel Macron muri Gicurasi uwo mwaka.

Perezida Macron yifatanyije n’abarokotse Jenoside yakorewe Abatutsi anabasaba imbabazi mu izina ry’Igihugu ayoboye, ndetse ashimangira ko abagize uruhare muri ayo mahano yatwaye ubuzima bw’abasaga miliyoni mu minsi 100 bacyidegembya mu Bufaransa bagomba kubiryozwa.

Ikibazo cy’abakurikiranyweho ibyaha bya Jenoside yakorewe Abatutsi bidegembya mu Bufaransa cyarahagurukiwe, ku buryo imanza nyinshi zari zaradindiye zongeye gusubukurwa kugira ngo inzirakarengane zazize Jenoside zibone ubutabera bwuzuye.

Nyuma yo guhanagurwaho ibyaha ku wa Gatanu, Madamu Polony yakomeje kugaragaza imvugo zisa no guhangana n’amateka yanditswe n’Ingabo zahoze ari iza RPF Inkotanyi bisa nk’aho hari undi mugambi wihishe inyuma y’ibyo yiyemeje gutangaza nk’uko bitahwemye kugaragara no mu bindi bitangazamakuru bitandukanye bishyigikira ingengabitekerezo y’abahunze u Rwanda bagerageza kubiba urwango n’amacakubiri cyane cyane mu rubyiruko.

  • Imvaho Nshya
  • Gicurasi 22, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE