Nyarugenge: Urubyiruko rwasabwe gukoresha ikoranabuhanga rusakaza amakuru y’ubwiyunge

  • NTAWITONDA JEAN CLAUDE
  • Mata 11, 2022
  • Hashize imyaka 2
Image

Umuyobozi w’Umujyi wa Kigali Rubingisa Pudence yasabye urubyiruko gukoresha imbuga nkoranyambaga rugasakaza amakuru yo kwiyunga n’ay’iterambere u Rwanda rwagezeho.

Yabivugiye mu gikorwa cyo kwibuka ku nshuro ya 28 Jenoside yakorewe Abatutsi mu 1994 cyabereye mu Murenge wa Kanyinya, mu Karere ka Nyarugenge, uyu munsi ku wa 11 Mata 2022.

Umuyobozi w’Umujyi wa Kigali Rubingisa yagizeati: “Rubyiruko uko butakwira mutarebye ku mbuga nkoranyambaga, ni na ko bidakwiye kwira mudasakaje amakuru nyayo, amakuru yo kwiyunga, amakuru y’iterambere, byose bigamije kubaka u Rwanda rushya ruzira amacakubiri”.

Yanihanganishije abarokotse Jenoside bo mu Murenge wa Kanyinya no mu gihugu hose ndetse ashimira Ingabo zahagaritse Jenoside. Ati: “Kuba turi hano ni uko amateka atagomba gusibangana.”

Yasabye kandiabazi ahari imibiri y’abazize Jenoside itarashyingurwa ko batanga amakuru kugira ngo na yo ishyingurwe mu cyubahiro.

Ati: “Ndibutsa ko gutanga amakuru y’ahari imibiri y’abishwe muri Jenoside yakorewe Abatutsi ari uburyo bwo kubaka ubumwe n’ubwiyunge kandi tukibuka bitari ukurangiza umuhango ahubwo biturimo koko”.

Karamage Jean Damascene warokokeye ku musozi wa Kana mu Murenge wa Kanyinya  yasangije abitabiriye kwibuka ubuhamya bw’uko  ubuyobozi bwariho icyo gihe bwatereranye abicwaga bukabashuka ko bagiye gusangishwa Inkotanyi ahubwo bakicwa.

Kwibuka byabanjirijwe no gushyira indabo mu mugezi wa Nyabarongo, mu Nzove aharoshywe Abatutsi batagira ingano. Hakurikiyeho kunamira no gushyira indabo ku rwibutso ruri ku musozi wa Kana, ahiciwe Abatutsi bari baturutse i Jali na Shyorongi nyuma yo gukoreshwa inzira y’umusaraba bavanwa aho bari barahungiye ku biro bya Segiteri ya Kanyinya.

Hanashyizwe indabo mu rugo rwa nyakwigendera Mukarumanzi ahiciwe Abatutsi batwitswe bari bahahungiye baturutse Shyorongi, Rutonde na Jali bizeye kuhabona ubuhungiro kubera ko bahasengeraga ariko bicwa urwagashinyaguro.

Nk’uko byagarutsweho, Abatutsi bicwaga bagahita barohwa muri Nyabarongo akaba ari yo mpamvu muri uyu murenge nta byobo byinshi byakuwemo imibiri ngo ishyingurwe mu cyubahiro nk’ahandi.

  • NTAWITONDA JEAN CLAUDE
  • Mata 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE