Niyonkuru Florence yegukanye umudali muri Shampiyona y’Isi 

Umunyarwandakazi Niyonkuru Florence, yegukanye Umudali w’Umuringa mu mikino yo gusiganwa ku maguru ya Shampiyona y’Isi ya 2026 ikomeje kubera mu Mujyi wa Copenhagen muri Danemark.

Ni imikino yiswe ‘World Athletics Road Running Championships’ itegurwa n’Ishyirahamwe ry’Imikino yo gusiganwa ku maguru ku Isi (World Athletics) iri kuba ku nshuro ya kabiri mu mateka. 

Uyi mukinnyi yabigezeho kuri iki Cyumweru tariki ya 20 Nzeri 2026, abakinnyi bakoze ibilometero 21 (Half Marathon), mu bagore.

Niyonkuru Florence, Emeline Imanizabayo na Ibishatse Angelique ni bo bahagarariye u Rwanda muri iri rushanwa.

Muri aba bose, Niyonkuru ni we witwaye neza akoresha isaha imwe, iminota itandatu n’amasegonda atanu, asiganwa na Agnes Jebet Ngetich wabaye uwa mbere na Veronica Loleo wabaye uwa kabiri, bombi bo muri Kenya.

Minisitiri wa Siporo, Nelly Mukazayire, yashimiye uyu mukinnyi abinyujije ku mbuga nkoranyambaga, ati: “Umukobwa wacu Florence Niyonkuru akomeje kwandika amateka atwara imidali. Uyu munsi yegukanye umwanya wa gatatu mu mikino y’Isi y’abiruka ku muhanda ya World Athletics Road Running Championships’2026. Ni uko ni uko mwana w’u Rwanda, komereza aho kandi ibyiza biracyaza”.

Niyonkuru w’imyaka 25 aherutse kuba uwa gatatu mu Mikino ya Commonwealth, aho yatwaye umudali w’Umuringa mu gusiganwa mu ntera ya metero 10 000, ari na wo wa mbere Igihugu cyari kibonye muri iyi mikino. 

Yatwaye kandi umudali wa Zahabu mu gusiganwa metero ibihumbi 10 muri ‘TCS World 10K Bengaluru’ yabereye mu Buhinde, n’umudali wa Feza muri Shampiyona Nyafurika y’Imikino yakiniwe i Accra muri Ghana.