Niyo Bosco yashyize ahagaragara EP yise New Chapter

  • MUTETERAZINA SHIFAH
  • Gashyantare 16, 2024
  • Hashize amezi 2
Image

Nyuma y’igihe adakora ibihangano bishya, Niyokwizerwa Bosco uzwi nka Niyo Bosco mu ruhando rwa muzika, yashyize ahagaragara EP y’indirimbo eshanu yise New Chapter.

Nyuma yo gutandukana na MIE yarebereraga inyungu z’umuziki we akajya muri MetroAfro na ho ntahatinde, ahubwo agahigamo gukorana na Kikas Music, Niyo Bosco yahise ashyira hanze EP y’indirimbo ze eshanu, mu rwego rwo kwerekana imbamutima ze.

Avuga ko ubu ari ahantu yishimiye kandi hamunyuze, ku buryo agiye gukora akazi ke mu buryo buruseho. Indirimbo ziri kuri iyo EP ya Niyo Bosco zirimo Ndabihiwe, Smile n’izindi.

Mu kiganiro yagiranye n’itangazamakuru ku wa Kane tariki 15 Gashyantare 2024, Niyo Bosco yavuze ko kuba ari muri Kikas Music ari ibintu yishimira, kubera ko ari abantu asanzwe azi cyane.

Yagize ati: “Claude twari dusanzwe dukorana mu buryo butandukanye, haba mu birori nagiye ntaramiramo, no mu bindi bikorwa nagiye nkora bijyanye n’umuziki, rero  yari asanzwe ari inshuti yanjye aho yabimfashagamo ntashobora kubyifasha, rero byabaye intandaro yo kuba twakorana New Chapter igizwe n’indirimbo eshanu.”

Yongeyeho ati: “Umwe mu mirongo dufite wa EP ni uko igomba kuba intangiriro y’urugendo rwacu mu mikoranire, haba muri iki gihugu, yewe no mu bindi bihugu, rero byarangiye dukoranye kandi icyo nkundira iyi label ni nk’umuryango, jye nyita umuryango, kuko birenga gukorana nk’akazi tugakorana nk’umuryango.”

Uretse kuba Niyo Bosco abarizwa muri Kikas Music, afite n’umufasha wa buri munsi (Daily Manager) w’umwihariko mu bijyanye n’umuziki, akaba ari umukozi uhoraho uhembwa na Kikas Music.

Akomeza agira ati: “Umuziki ni ikintu cyagutse; hari ukuwigisha, kuwuririmba no kuwandika. Ibyo byose ni ibintu byakwinjiriza gusa nk’umuntu ukunda  abantu bangiriye icyizere bakankunda nkaba mfite abafana nk’abo mfite nanjye nkabakunda, kubabara ntibyabura kugira ngo nzagaruke imbere yabo mfite ibintu bigaragara byo kubaha.”

Niyo Bosco avuga ko izina New Chapter rya EP y’indirimbo ze, rivuze ko ibihe bibi bagiye kubivamo, ahubwo ubu ari gukora cyane, kandi ko indirimbo ziriho ntaho amazina yazo ahuriye n’ubuzima arimo gucamo kuko ari amazina gusa.

Agaruka ku mubano we na Murindahabi Irene washinze MIE Empire, Niyo Bosco avuga umubano wabo uguhagaze neza nta kibazo kirimo.

Ati: “Irene turavugana, turaganira, turakorana ibyavuzwe byose bitandukanye n’umubano dufitanye kuko kugeza ubu nta kibazo kiri hagati yacu.”

Niyo Bosco ashyize ahagaragara EP ye, nyuma y’igihe gito yemeje urukundo rwe n’umukobwa witwa Keza Nabrizza, kuko aheruka gusangiza abamukurikira  ku rukuta rwa Instagram ifoto y’uwo mukobwa, yaherekesheje amagambo y’urukundo.

 Uretse umuhanzi Niyo Bosco, Kikas Music inakorana na Bwiza, uherutse gushyira hanze umuzingo (Album) wagizwemo uruhare runini na Niyo Bosco.

Niyo Bosco yamenyekanye anakundwa mu ndirimbo zirimo ubigenza ute, Piyapuresha, Ishyano, Seka n’izindi.

  • MUTETERAZINA SHIFAH
  • Gashyantare 16, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE