Ngoma: Inzu 19 zasambuwe n’umuyaga hegitari 420 zangizwa n’urubura

Ibiza birimo inkubi y’umuyaga n’urubura byangirije abaturage b’Umurenge wa Jarama mu Karere Ka Ngoma, ahasambutse inzu 19 ndetse na hegitari 420 z’imyaka y’abaturage zirangirika.

Abaturage bo mu Kagali ka Kibimba ari nako kibasiwe cyane bavuga ko batunguwe n’imvura mbi yaguye irimo umuyaga ukabasenyera, hanagwamo n’urubura rwinshi rwangije igihingwa cy’umuceri.

Kakuze Epiphania agira ati: “Haguye amahindu tubona inzu ziragurutse. Ibintu byari mu nzu byangiritse ndetse ku buryo hari n’ibyo tutaramenya aho byarengeye. Ikindi ni uko mu mirima habaye ubutayu aho umuyaga wangije imyaka yacu yiganjemo ibigori.”

Rukundo Seleman we yagize ati: “Tubasaba ko ubuyobozi butuba hafi bukarengera abagizweho ingaruka n’ibi biza. Hari abari ku gasozi bakeneye ko bafashwa gusubira mu nzu zabo, ariko turanikanga ko dushobora guhura b’ikibazo cy’inzara kuko imyaka yangiritse iri hafi kwera.”

Ubuyobozi bw’Akarere ka Ngoma bwatangarije Imvaho Nshya ko buri gukurikiranira hafi ingaruka iki kiza cyateje ndetse hanakorwa ibikorwa byo gufasha abo byagizeho ingaruka.

Mapambano Nyiridandi Umuyobozi w’Akarere wungirije ushinzwe Iterambere ry’Ubukungu yagize ati: “Ni byo, imvura yaguye nabi irimo umuyaga n’urubura yangije byinshi birimo no gusenyera abaturage bacu. Abasenyewe n’iyi mvura twabashakiye aho kuba dufatanyije n’abaturage, ubu tukaba turi kuvugana na Minisiteri ishinzwe Ibikorwa by’Ubutabazi kugira ngo hashakwe isakaro inzu zabo zitunganywe.

Akomeza agira ati: “Imyaka yangiritse, ubu tumaze kwegeranya raporo zose, bigaragara ko ibigori biri kuri hegitari 400 zagushijwe n’umuyaga ariko kuko byari bikuze ubu twatangiye gukoresha umuganda mu kubyegura kuko byari byagiye birambarara hasi ariko ntibyavunagurika. Hegitari 20 z’umuceri nazo zangijwe n’urubura, ariko amahirwe ni uko abahinzi b’umuceri bari barawufatiye ubwishingizi.”

Uretse Akagali ka Kibimba kibasiwe cyane n’ibyo biza, byanazahaje utundi Tugari tubiri tw’Umurenge wa Jarama.