Ndagijimana Léonard yagizwe Umuvugizi w’Ihuriro ry’Imitwe ya Politiki mu Rwanda

Depite Ndagijimana Léonard yagizwe Umuvugizi w’Ihuriro ry’Igihugu Nyunguranabitekerezo ry’Imitwe ya Politiki (NFPO) yemewe mu Rwanda naho Senateri Murangwa Hadidja Ndangiza agirwa Umuvugizi Wungirije.

Kuri uyu wa 24 Nzeri 2026, mu Nama Rusange y’Ihuriro ry’Igihugu Nyunguranabitekerezo ry’Imitwe ya Politiki yemewe mu Rwanda, ni bwo hashyizweho abagize Biro y’Ihuriro

Iyi nama yasize Depite Ndagijimana Léonard wo mu Ishyaka Riharanira Demokarasi Ihuza Abanyarwanda (PDC) ari we ugizwe Umuvugizi, asimbura Dr. Frank Habineza wo mu Ishyaka riharanira Demokarasi no Kurengera Ibidukikije, DGPR, wari uwuriho kuva muri Werurwe 2026.

Umuvugizi wungirije watowe ni Senateri Murangwa Hadidja Ndangiza wo mu Ishyaka ry’Abademokarate Intangarugero (PDI), asimbuye Ingabire Neema Eugénie wo mu ishyaka UDPR riharanira ubumwe bw’Abanyarwanda na demokarasi.

NFPO yemeje ko izohereza indorerezi zayo mu gukirikirana imigendekere y’amatora y’abayobozi b’inzego z’imitegekere y’Igihugu zegerejwe abaturage n’ab’Inama z’Igihugu ateganyijwe mu Ukwakira uyu mwaka.

Aba bose bafite manda y’amezi atandatu nk’uko amategeko y’Ihuriro abiteganya.

NPFO igizwe n’imitwe ya politiki 11 ikorera mu Rwanda: FPR Inkotanyi, PL, UDPR, PDI, PSD, PPC, PDC, PSR, PSP, P.S Imberakuri na DGPR.