Muyoboke Alex asanga abafana bakwiye gushyigikira abahanzi nyarwanda

  • MUTETERAZINA SHIFAH
  • Mata 17, 2024
  • Hashize ukwezi 1
Image

Muyoboke Alex umenyerewe cyane mu kuba umujyanamana wihariye w’abahanzi batandukanye, yasabye abakunzi b’umuziki nyarwanda gushyigikira abahanzi b’Abanyarwanda bakamenyekanisha ibihangano byabo, aho kugira ngo bamenyekanishe iby’ahandi.

Yabigarutseho kuri uyu wa Gatatu tariki 17 Mata 2024, mu kiganiro yagiriye kuri televiziyo ikorera kuri murandasi, ubwo yari akomoje ku ntambara y’amagambo yakunze kuba hagati ya The Ben abereye umujyanama na Bruce Melodie, ugasanga abafana babo babyijandikamo, kandi bidakwiye.

Ati: “Abafana bakunda umuziki nyarwanda ntimukarebe biriya bintu biba byavuzwe ngo mwumve ko ari ukuri bitume ureka gufana umuhanzi wawe, uko umukunda uko ari ko kose ntukwiye kubangamira undi muhanzi mugenzi we.”

Akomeza agira ati: “Abafana kandi mwumve ko ari inshingano kurushaho gukunda, kuryoherwa no kumenyekanisha ibihangano by’umuhanzi wawe.”

Agaruka ku ruhare abafana bakwiye kugira mu kumenyekanisha ibihangano by’abahanzi, Muyoboke yakanguriye Abanyarwanda by’umwihariko bakiri bato, kwibanda ku kumenyekanisha indirimbo z’abahanzi nyarwanda kurusha iz’ahandi.

Ati: “Nabonye muri Kenya bumva umuziki wacu kandi tugenda biguruntege, hari abakobwa beza bacu usanga bambariye abageni barimo kubyina indirimbo z’ahandi, ariko nufata indirimbo ya Kevin Kade, Marina cyangwa undi ukayishyira ku mbuga nkoranyambaga zawe, ukayimenyekanisha bizafasha umuziki wacu kuzamuka.[…] Ariko nufata indirimbo y’umuhanzi w’ahandi umaze kugira aho agera, uramenyekanisha indirimbo ya Burna Boy, mpamagara ngo aze mu gitaramo akanca miliyoni y’idolari kandi wenda nta n’Umunyarwanda batumira iwabo ushaka iki.”

Yongeraho ati: “Kugira ngo umuziki wacu uzaryohe ni uko tugomba kuwukunda, tukawukundisha Abanyamahanga.”

Muyoboke avuga ko Inzego zibishinzwe zikwiye kubirebaho kuko nko muri Trace Awards, abahanzi nyarwanda bagombye kubahwa, ntibanyuzwe mu bikari babyigana n’abafana.

Ati: “Davido naza amenye ngo uyu ni Juno, Ariel Ways, n’abandi. Ahure na bo agende azi ko bahari, azi nabo ari bo, abahanzi bacu ntibaze bishyura babacisha mu bikari babyigana n’abafana, tunishimire ko umuziki wacu watangiye kugera ku isoko mpuzamahanga kandi dushyigikirane.”

Akomeza agira ati: “Urugero naguha Omareh wo muri Nigeria yagiye muri Uganda baramufunga yarenze ku mabwiriza ya Covid- 19, ariko buri muhanzi wese wo muri icyo gihugu, bose bikomye Uganda bakoresha imbuga nkoranyambaga zabo, bamenyesha Umukuru w’Igihugu cya Uganda kugeza igihe umuhanzi wabo yarekuriwe, ubwo bumwe ni cyo kintu dukeneye.”

Muyoboke yagiriye inama abahanzi ko igihe cyose bashyira hamwe bagashyigikirana, byatuma ibihangano nyarwanda bimenyekana ku rwego rw’Isi, ndetse bikanatuma bishoboka ko banagira n’Umudepite ubahagarariye mu Nteko Ishinga Amategeko, anashimira Leta kuba yarashyizeho Minisiteri ifite Iterambere ry’Ubuhanzi mu nshingano.

Tariki 14 Mata 2024, Muyoboke Alex yahawe igihembo nk’umujyanama mwiza w’abahanzi mu Karere k’Afurika y’Iburasirazuba, mu bihembo bya East Africa Arts Entertainment Awards, nyuma y’imyaka 18 amaze muri ako kazi.

  • MUTETERAZINA SHIFAH
  • Mata 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE