Muyango yangiwe kuva ku rubyiniro n’abo yamurikiye umuzingo w’indirimbo

  • KAMALIZA AGNES
  • Ukuboza 25, 2023
  • Hashize amezi 5
Image

Ubwo yamurikaga Umuzingo (Album) we wa kane Imbanzamyambi, umuhanzi umenyerewe mu njyana gakondo Jean Marie Muyango, yangiwe kuva ku rubyiniro n’abakunzi be bari bitabiriye icyo gitaramo. 

 Ni igitaramo cyabaye ku mugoroba wo ku Cyumweru tariki 24 Ukuboza 2023, i Kigali muri Kigali Conference and Exhibition Village ahazwi nka Camp Kigali, mu gihe hirya no hino mu gihugu ndetse no ku Isi  muri rusange abenshi bari batangiye kwizihiza no kwishimira ibirori  by’umunsi mukuru wa Noheli. 

Ni umuzingo wa mbere Muyango Jean Marie yari amurikiye abakunzi be ku giti cye, kubera ko itatu yawubanjirije yari afatanyije n’Itorero Imitari.

Igitaramo cyatangiye ahagana saa mbiri z’umugoroba, urubuga rufungurwa n’umuhungu we witwa Inkindi Muyango uzwi nka Inki, wagaragarije abitabiriye igitaramo ko atewe ishema no kuba agiye guhurira n’umubyeyi we ku rubyiniro.

Yagize ati: “Ni amahirwe akomeye kuba ngiye guhurira n’umubyeyi wanjye ku rubyiniro, uyu mugabo mwaje kureba ndamufana.”

Yaririmbye indirimbo ze zitandukanye ageze ku yitwa “Million” yafatanyije na Ruti Joel abantu bizihirwa kurushaho.

Nyuma ye, Itorero inganzo Ngari zakomerejeho zinjirira mu ndirimbo Abariboye, igitaramo kirushaho kunyura abari bacyitabiriye babyinnye nyinshi zirimo, Intore, Ikondera rirabaye, Urusamaza, na Mbe bakobwa.

Ryagaragarije abitabiriye ko bakiri inganzo Ngari koko, ni igitaramo bavuga ko ari icya kabiri bataramyemo nyuma yo kubura uwari Umuyobozi wa bo umaze Ukwezi kurenga yitabye Imana.

Ntibyatize uwari utegerejwe na benshi muri iki gitaramo yaje guseruka aherekejwe n’abahanzi bakiri bato bamenyerewe mu njyana gakondo barimo Itsinda rya Ange na Pamela.

Yaririmbye indirimbo zinyuranye ziri ku muzingo wa Imbanzamumyambi ari na wo yamurikaga zirimo  Indahiro, Umwiza wanjye yafatanyije na Nirere Shanel, uzwi nka Miss Shanel, indirimbo avuga ko yayikoze kubera abantu bakunze kumubaza impamvu mu ndirimbo ze nta y’urukondo ibamo.

Nyuma y’iyo ndirimbo Miss Shanel wagaragarijwe ko yari akumbuwe n’Abanyarwanda yaririmbye indimbo ze 3, zirimo Ndarota yishimiwe cyane n’abari aho yanatumye bahaguruka, asoreza ku ndirimbo yise Atura, avuga ko yakoze kugira ngo atange umusanzu mu gushishikariza abaceceka bahuye n’ihohoterwa rikorerwa mu ngo.

 Ati: “Ni ibibazo biba hirya no hino mu miryango rero mbona ari umusanzu wa buri muhanzi kubyandikaho.”

Amaze kuririmba Muyango n’itsinda Imitari bahise bajya ku rubyiniro baririmba indirimbo nka Musaniwabo na Sabizeze, zishimiwe cyane, ziranabyinwa biratinda.

 Nyuma Muyango yaririmbye “Karame uwangabiye” Indirimbo yakoreye Umukuru w’Igihugu, aho yayifatanyije n’abahanzi biganjemo ab’injyana gakondo. 

Kubera uburyo yanyuze abitabiriye igitaramo, bamusabye kuyisubiramo, ndetse byarangiye basabye ko yongera ikaririmbwa inshuro ya kabiri. 

Ni indirimbo yasubiwemo n’abarimo Masamba intore, Jules sentore, Mani Maritin, Yvan Muzik, Miss Shanel, Juno Kizigenza, Yvan Ngenzi, Bukuri, n’Isonga Familly.

Muyango yishimiye cyane kumva ukuntu iyi ndirimbo yasubiwemo neza aranabigaragaza, avuga ko nta kintu yabona afite yabaha.

Ati: “Nkaba bantu koko wabaha iki?, ntacyo mfite nabaha, ariko igihugu kirabafite, kirabareba, mbahaye igihugu.”

Umubyeyi Mariya Yohana wari wafatanyije na bo kuyiririmba ku rubyiniro na we aramusubiza ati “nawe turagufite”; nuko bakomerezaho baririmbana Intsinzi indirimbo y’uwo mubyeyi yanyeganyeje amarangamutima y’abari aho bose.

Ubwo basozaga iyi ndirimbo agira ngo basezere bave ku rubyiniro abitabiriye ku bw’umunezero batangiye kuririmba indirimbo zinyuranye za Muyango n’Imitari bagira ngo na zo ziririmbwe, agerageza kubabwira gutuza, Muyango abonye batamwumva aravuga ati “Reka tubatege amatwi.”

Bamaze kuziririmba  abasaba kumubwira iyo bifuza ko yaririmba, bamugaragariza ko bifuza zose, abasaba guhitamo imwe, abaririmbira iyitwa Gisa shyingiro ry’Intwari ari na yo yasoje igitaramo. 

Muyango yasabye abitabiriye ko bazahurira mu kindi gitaramo giteganyijwe.

Yagize ati: “Muri abantu beza cyane, mu kwiye ikindi gitaramo, kandi tuzagikora.”

Byari biteganyijwe ko igitaramo cyo kumurika umuzingo Imbanzamumyambi gitangira saa kumi n’ebyiri z’umugoroba, ariko gitangira saa mbili z’umugoroba.

Byageze ahagana saa tatu n’igice ushinzwe kurebera inyungu za Muyango akaba n’Umuyobozi wa Kanani Connection, Didier Kananura, asaba abitabiriye ko babihanganira kubera ko igitaramo kiri burangire kare ku bw’impamvu z’uburwayi zatunguranye. 

Yabijeje ko mu umwaka utaha hateganyijwe ikindi gitaramo kandi ko ufite ticket y’igitaramo Imbanzamumyambi we azemererwa kwinjira nta kindi kiguzi bimusabye.

  • KAMALIZA AGNES
  • Ukuboza 25, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE