Mu Rwanda hagiye kubera Iserukiramuco rihuriza hamwe abakora injyana gakondo n’ab’izigezweho

  • MUTETERAZINA SHIFAH
  • Werurwe 4, 2024
  • Hashize amezi 2
Image

Abatuye n’abagenda Umujyi wa Kigali ku nshuro ya mbere bateguriwe iserukiramuco ryiswe Ijoro rya Kigali Fest, rizahuza abahanzi bakora injyana ya gakondo bo hambere ndetse n’abakiri bato bakora iyo njyana hamwe n’abandi bakora izigezweho.

Iri serukiramuco ryateguwe na Ole Entertainment Ltd, rigamije gufasha abahanzi bo mu kiragano cya cyera gusangiza abo mu cy’uyu munsi uko ijoro ry’Abanyarwanda bo hambere ryabaga rimeze .

Kijyana Peter Yves ni umwe mu bagize Ole Entertainment Ltd, avuga ko intego y’iryo serukiramucyo ari ukugarura Abanyarwanda ku gicumbi cy’umuco.

Ati: ”Intego y’iri serukiramucyo ni ukugarura Abanyarwanda ku gicumbi cy’umuco, hanyuma tukicara ku gicaniro cy’impanuro, tugahurira hamwe nk’Abanyarwanda muri rya joro ryacu ryuje umutuzo n’amahoro, tugatarama, tugasangira, tugasabana, tukamenyana, tukibukiranya indangagaciro na kirazira by’Abanyarwanda, bakongera bakagaruka mu gitaramo aho bungukira ubwenge bakibukiranya icyo bagomba Igihugu.”

Iri serukiramuco rizafasha Abanyamahanga batuye n’abagenda mu Rwanda gutaramana n’Abanyarwanda, bakarushaho kumenya no gusobanukirwa uko Abanyarwanda babagaho.

Ati: ”Twifuza ko abanyamahanga baba mu gihugu baza tugataramana, tukababwira u Rwanda, bakamenya uko ijoro ry’Abanyarwanda ryabaga ryifashe, tukabikora duhuza ibiragano byombi, bagakora mu nganzo, bakaririmba, bakizihirwa, byatumaga umuryango nyarwanda ugira imbaraga, bakagira ubumwe, intego n’ishyaka, ariko uyu munsi wa none abato babuze gihanura, rero turashaka tubone ibya cyera n’iby’uyu munsi, hanyuma twerekane ko tudataye ibyacu dushobora kubifatanya n’ibihari, tugakuramo ibitubereye, tugatarama tudasigaye inyuma mu mateka.”

Agaruka ku mpamvu igitaramo cyiswe Ijoro rya Kigali, avuga ko Kigali ifite imico itandukanye, kubera ko ari umujyi ufite abaturage bavuye mu bice bitandukanye by’Igihugu no hanze yacyo, ku buryo abazitabira bahishiwe udushya twinshi nkuko kijyana abisobanura.

Ati: ”Abazaza bitegure gutaha bishimye, kuko hazaba harimo umukino wo kubaza ibibazo bigamije kwigisha, kandi bigakorwa mu buryo bwo kwidagadura, guhuza abahanzi b’ingeri zose, bizatuma babona byose bakunda, kandi babibonere rimwe, harimo imikino y’ibibazo bazabazwa bahembwe, hari uburyo abantu bazahuzwa bagataha bamenyanye, hazabaho umwanya w’abitabiriye batange ibibarimo, bizihirwe, abifuza kuririmba baririmbe, cyangwa n’abifuza kubinyuza mu zindi nganzo.”

Biteganyijwe ko muri icyo gitaramo hazagaragaramo abahanzi bo hambere bafite amazina akomeye mu gihugu barimo Mariya Yohana, ndetse n’abandi bamenyerewe mu njyana gakonda nka Audia Intore, baziyongeraho ab’injyana zigezweho nka Bushari, Ariel Wayz, na Dj Ira umenyerewe cyane mu kuvanga imiziki, hanyuma umunyarwenya Babu Joe, akazayobora igitaramo.

Muri iri serukiramuco hazanagaragaramo umunyarwenya Josua, Manzi Mbaya, Koffi Wallet, umusizi Carine, umusizi ABC ndetse Mr HU hamwe n’abandi.

Bikaba biteganyijwe ko rizaba tariki 9 Werurwe 2024 , rikazabera muri Kaso Kicukiro, Hakagaragaramo inganzo zitandukanye, indirimbo, ubusizi, urwenya, kuvanga imiziki, hamwe n’imbyino.

Nubwo ari ku nshuro ya mbere iri serukiramuco rigiye kuba, ariko biteganyijwe ko rizajya riba Kabiri mu mwaka.

  • MUTETERAZINA SHIFAH
  • Werurwe 4, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE