Mu myaka 10, abanywi b’inzoga bariyongereye mu Rwanda

  • NTAWITONDA JEAN CLAUDE
  • Kamena 30, 2023
  • Hashize amezi 11
Image

Imibare mishya yatangajwe na Minisiteri y’Ubuzima igaragaza ko abanywi b’inzoga mu Rwanda bavuye ku kigero cya 43.3% bagera kuri 48.1% mu mwaka wa 2022, abagabo bakaba ari bo bagaragaye ko ari benshi banywa inzoga ku buryo buhoraho kurusha abagore.

Iyo mibare yatangajwe kuri uyu wa Gatanu taliki ya 30 Kamena, ubwo hatangazwaga ubushakashatsi bwa kabiri bwakozwe ku myitwarire itera ibyago byo kwibasirwa n’indwara zitandura (NCDs) mu Rwanda.

Ubwo bushakashatsi bwakozwe ku baturage 5,676 bafite imyaka iri hagati ya 16 na 69, bakaba bagizwe na 62.5% b’abagore ndetse na 37.5% b’abagabo. Imibare yerekana ko abagabo 61.9% ari bo bagaragayeho kunywa inzoga mu minsi 30 ubwo hakorwaga ubushakashatsi, mu gihe abagore ari 34.3%.

Hafi icya kabiri (48.1%) bavuze ko basomye ku gasembuye mu gihe cy’iminsi 30 ishize uhereye ubwo babazwaga, bakaba bariyongereye ugereranyije n’imibare yo mu 2013 igaragaza ko biyongereye ku kigero cya hafi 7%.

Iyi mibare kandi igaragaza ko Intara y’Amajyaruguru iza imbere mu kugira abanywi benshi bari ku kigero cya 56.6%, igakurikirwa n’Intara y’Amajyepfo ifite abanywi b’inzoga bangana na 51.6%, iy’Uburengerazuba 46.5%, Intara y’Iburasirazuba 43.9%, na ho Umujyi wa Kigali ukagira abantu bake banywa inzoga bari ku kigero cya 42.0%.

Ku rundi ruhande, Minisiteri y’Ubuzima igaragaza ko abanywa inzoga ku buryo bukabije bagabanyutse muri iyo myaka kuko bavuye ku kigero cya 23.5% bakagera ku kigero cya 15.2%. Ibyo bishimangira ko abanywa inzoga nyinshi cyane bagabanyutse ku kigero cya 8% ugereranyije n’ubushakashatsi bwa 2013.

Intara y’Iburengerazuba ni yo ibamo abasinzi bakabije benshi bari ku kigero cya 19.1%, igakurikirwa n’iy’Amajyaruguru ifite 15.8%, iy’Amajyepfo ifite 15.1%, Intara y’Iburasirazuba ifite 13.8% ndetse n’Umujyi wa Kigali ufite 10.5%.

Abanywi b’itabi bagenda bagabanyuka

Ubwo bushakashatsi kandi bugaragaza ko  abanywa itabi mu Rwanda bagabanyutseho 5% kuko bavuye ku kigero cya 12.9 % mu 2013 bakagera ku kigero cya 7.1% mu mwaka wa  2022. Abagore bangana na 3.7% ni bo banywa itabi mu gihe 10.4% by’abagabo ari bo barinywa mu Gihugu.

Intara y’Amajyepfo ni yo ifite abatu benshi banywa itabi bari ku kigero cya 9.6%, igakurikirwa n’iy’Iburasirazuba ifite 8.8%, Umujyi wa Kigali ufite 6.9%, Amajyaruguru 5.0%, n’iy’Uburengerazuba ifite 4.2%.

Inzoga n’itabi, kudakora imyitozo ngogoramubiri no gufata amafunguro mu buryo butaboneye, ni bimwe mu bituma abantu bibasirwa n’indwara zitandura nk’umuvuduko w’amaraso, kanseri zitandukanye, indwara y’umutima n’izindi.

Ubu bushakashatsi bunagaragaza ko imibare y’Abanyarwanda bitabira kurya imboga n’imbuto bihagije ukiri hasi kandi na bo ugasanga babifata ku kigero cyo hasi, mu gihe abarya ibyatunganyirijwe mu nganda bo bakomeza kwiyongera.

Ku birebana no kwita ku isuku yo mu kanwa mu kwirinda indwara zitandura zishamikiraho, iyo mibare yerekana ko 57.1% batigeze babona serivisi zo kwita ku menyo, mu gihe 19%  ari bo bonyine basukura amenyo nibura kabiri ku munsi.

  • NTAWITONDA JEAN CLAUDE
  • Kamena 30, 2023
  • Hashize amezi 11
TANGA IGITEKEREZO
Alice says:
Kamena 30, 2023 at 4:24 pm

Ni ikibazo gihangayikishije kuko abantu bakwiriye kumenya ikibazo cy’ingano y’uburozi buba mu nzoga no kumenya koko ingano y’inzoga buri wese yemerewe kutarenza agereranije n’ingano y’ibihumanya biyirimo.

Minisante nitange ubutumwa busobanurira abantu ububi bw’inzoga mu buryo busobanutse neza.
Atari ukubwira abantu ngo inzoga ni mbi byonyine.

Andika igitekerezo

AMATEGEKO AGENGA IYANDIKA RY'IGITEKEREZO CYAWE