Mu gihe ibiganiro bikomeje, u Burusiya bwateye Umurwa Mukuru wa Ukraine

  • Imvaho Nshya
  • Werurwe 15, 2022
  • Hashize imyaka 2
Image

I Kyiv mu Murwa Mukuru wa Ukraine, harashwe igisasu ku nyubako igeretse inshuro 16 gihitana abantu babiri ako kanya, mu gihe inzego z’ubutabazi zatabaye abagera kuri 27 muri iki gihe bimwe mu bice by’uyu mujyi bikomeje kugabwaho ibitero n’ingabo z’u Burusiya.

Ibyo bibaye mu gihe ibiganiro hagati y’abayobozi b’u Burusiya n’aba Ukraine byitezwe ko bisubukura kuri uyu wa Kabiri.

Ku wa Mbere, abantu basaga 40,000 bafashijwe kuva mu mijyi wa Ukraine yibasiwe n’ibitero by’u Burusiya nk’uko byatangajwe na Minisitiri w’Intebe wungirije wa Ukraine Iryna Vereshchuk.

Minisitiri w’Intebe Vereshchuk arashinja ingabo z’u Burusiya kurasa ibisasu ku basivili batuye mu Mujyi wa Kyiv n’indi mijyi yibasiwe n’ibitero byazo.

Perezida wa Ukraine Volodymyr Zelenskyy yatangaje ko igisirikare gikomeza kuyobora Igihugu mu yindi minsi  30 uhereye ku ya 24 Werurwe 2022.

Mu gihe Leta Zunze Ubumwe z’Amerika ziyamye u Bushinwa kuba bwagira inkunga butanga yo kugaba ibitero kuri Ukraine,  u Bushinwa bwo buravuga ko budashaka kugirwaho ingaruka n’ibihano byafatiwe u Burusiya.

Minisitiri w’Ububanyi n’Amahanga w’u Bushinwa Wang Yi, ni we wavuze ko igihugu cye kidashaka kugirwaho ingaruka n’ingaruka z’ibihano by’ubukungu byahawe u Burusiya,  nk’uko itangazamakuru rya Leta y’icyo gihugu ryatangaje.

Ni mu gihe Beijing ikomeje kotswa igitutu ngo ireke gutera inkunga Moscow. Minisitiri Wang Yi aganira kuri telephone na mugenzi we wa Esipanye Jose Manuel Albares, yagize ati: “U Bushinwa ntibufite uruhare muri iki cyago, kandi ntishaka kuba yagirwaho ingaruka n’ibihano.”  

Hagati aho Ingabo za Ukraine zivuga ko zasubije inyuma ibitero byo gufata umujyi wa Mariupol, umaze iminsi uraswaho bikomeye.

  • Imvaho Nshya
  • Werurwe 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE