Mu basaga 1 200 bahatanira kuyobora Uturere, hagarutse 8 basanzwe bayoboye 

Komisiyo y’igihugu y’Amatora, yashyize ahagaragara urutonde  rw’agateganyo rw’abakandida bemerewe kwiyamamariza umwanya w’Umujyanama mu Nama Njyanama y’Akarere, barimo abayobozi umunani bongeye gutanga kandidatire zo guhatanira kongera kujya mu nama Njyanama z’Uturere, ari na bo bazatorwamo abazajya muri Komite Nyobozi z’Uturere.

Kuri urwo rutonde rw’agateganyo rwashyizweho umukono na Pereziza wa Komisiyo y’igihugu y’amatora ODA Gasinzigwa, hari abandi bayobozi bahoze muri Komite Nyobozi z’Uturere batagaragaye ku rutonde rw’Abakandida bemejwe na NEC, nubwo bamwe muri bo bari bagifite uburenganzira bwo kongera kwiyamamaza, dore ko muri bo harimo abari basoje manda imwe yonyine.

Abari muri Komite Nyobozi z’Uturere basanzwe bari mu nshingano baje kuri urwo rutonde rw’gateganyo, barimo abayobozi b’Uturere twa Gakenke, Karongi, Kirehe, Ngoma, Nyamasheke, Rubavu na Rusizi, hamwe n’Umuyobozi w’agateganyo w’Akarere ka Kayonza ko mu Ntara y’Iburasirazuba.

Nkuko bigaragara kurutonde rwa NEC, abayobozi umunani bongeye gutanga kandidatire hakurikiwe nomero n’Akarere bayobora, ni Mukandayisenga Vestine uyobora Akarere ka  Gakenke waje kuri nomero 126, mu gihe Muzungu Gerald wa Karongi afite nomero 434, Hategekimana Fred uyoboraKayonza (by’agateganyo)  ari kuri nomero 490, Rangira Bruno        wa Kirehe      akaba kuri 523, Niyonagira Nathalie wa Ngoma     653 Mupenzi Narcisse wa Nyamasheke    ari kuri 876 Mulindwa Prosper        wa Rubavu       uri kuri nomero 979 na Sindayiheba Phanuel       w’Akarere ka Rusizi uri kuri nomero 1 111.

Muri rusange, bose uko bagaragazwa n’urutonde rwa NEC bafite icyemezo cya “YEGO”, bivuga ko kandidatire zabo zemejwe byagateganyo na Komisiyo y’Igihugu y’Amatora.

Icyo itegeko rivuga ku kongera gutorwa kwa Meya

Ingingo ya 41 y’Itegeko N° 065/2021 ryo ku wa 9 Ukwakira 2021 rigenga Akarere iteganya ko abagize Komite Nyobozi y’Akarere batorerwa manda y’imyaka itanu ishobora kongerwa.

Iryo tegeko rigena ko abagize Komite Nyobozi y’Akarere badashobora kurenza manda ebyiri zikurikirana, gusa, hari umwihariko ku muntu watorewe gusimbura umwe mu bagize Komite Nyobozi wavuye mu nshingano mbere y’uko manda irangira.

Iyo umuyobozi asimbuye undi mu gihe hasigaye igihe kitarenze umwaka umwe ngo manda irangire, amategeko ateganya ko umusimbura aba afite uburenganzira bwo kwiyamamaza ku zindi manda inshuro ebyiri zikurikirana.

Ingingo igaragaza impamvu kumenya igihe Umuyobozi yatangiriye inshingano n’igihe yasoreje manda ari ngombwa mu kureba niba yemerewe kongera kwiyamamaza.   Hagati aho Komisiyo y’Igihugu y’Amatora ikaba yatangaje ko urutonde ntakuka rw’abakandida bemerewe kwiyamamaza ruzatangazwa ku itariki ya 30 Ukwakira 2026.