MOCA, Iserukiramuco mpuzamahanga rigiye kubera mu Rwanda ku nshuro ya 7

  • NTAWITONDA JEAN CLAUDE
  • Werurwe 3, 2022
  • Hashize imyaka 2
Image

MOCA ni Iserukiramuco rigiye kuba ku nshuro yaryo ya karindwi mu Rwanda ku bufatanye na  “Africa In Colors” rikaba ryahawe ikaze na Minisiteri y’Urubyiruko n’Umuco.

AIC (African In Colours) ni ikigo nyafurika cyashinzwe na Raoul Rugamba, kikaba gifite icyicaro gikuru i Kigali mu Rwanda, kikaba cyubakiye ku nkingi yo kuba umusemburo utuma inganda z’umuco n’ubuhanzi zishobora kurema imirimo kandi bikinjiriza ababikora.

Mu kiganiro n’imvaho Nshya, Umuyobozi wa AIC, Raoul Rugamba yavuze ko banyuzwe n’ibiganiro bagiranye na Minisiteri y’Urubyiruko n’Umuco ndetse abashimira ko bakiranye urugwiro iby’iri serukiramuco.

Ati : “Ibiganiro byagenze neza, twari twagiye kubereka gahunda dufite tunabasobanurira icyo iserukiramuco ryacu rigamije, icyiza kurushaho ni uko ibiganiro byagenze neza cyane.”

Kimwe mu byo ubuyobozi bwa  “Africa In Colors” n’ubwa MOCA baganiriye na Minisiteri y’Urubyiruko n’Umuco ni ukubamurikira gahunda yose y’iri serukiramuco rizabera mu Rwanda kuva ku wa 30 Kamena  kugeza 03 Nyakanga 2022.

Ni iserukiramuco rizamara iminsi ine y’ibikorwa birimo ibiganiro, amahugurwa, ubumenyi ku ikoranabuhanga nshushanyakuri (virtual reality) n’imikino y’amashusho, imyidagaduro, imurikabikorwa, ingendo ndetse n’ibindi.

MOCA ni urubuga rwibanda ku nganda z’umuco n’ubuhanzi muri Afurika ndetse n’umuryango Nyafurika uba mu mahanga, rwashinzwe na Alain Bidjeck i Paris.

MOCA ihuza abagira inshingano muri uru ruhurirane, abahanzi, ba rwiyemezamirimo n’abafata ibyemezo, kugira ngo basangire ubunararibonye, bashake ibisubizo ku ngingo z’ingenzi ndetse bateze imbere amahirwe ahari.

Umunyamabanga wa Leta muri Minisiteri y’Urubyiruko n’Umuco, Bamporiki Edouard aganira na Alain Bidjeck uyobora MOCA

Iyi mishinga yose iri gukorera mu nkingi eshatu z’ingenzi ari zo uburezi, ubufatanye no kubasha kugera ku mari.

Iyi mishinga ifatanyije yubatse umuyoboro mpuzamahanga w’ibihugu 50 mu Isi, harimo 35 byo ku mugabane w’Afurika na 15 byo hanze y’umugabane.

Muri 2020,  Raoul Rugamba wibanda ku mugabane w’Afurika ndetse na Alain Bidjeck ukorera hanze yawo bahuje imbaraga mu bufatanye ngengamikorere bugamije ku kongera gutekereza ku ruhurirane rw’ubuhanzi Nyafurika bw’ejo hazaza, kugira ngo habeho impinduka, mu buryo burambye haba imbere ku mugabane ndetse no ku Isi yose.

Rugamba yagize ati : “Nk’intumbero yacu, twagize u Rwanda umushyitsi mukuru mu nama ya MOCA ku nshuro ya 6 yabereye i Paris mu mwaka wa 2021. Rwari ruhagarariwe n’abantu 12 b’ingenzi bitabiriye ndetse bakamenyekanisha u Rwanda nk’izingiro ry’ubuhanzi.”

Umunyamabanga wa Leta muri Minisiteri y’Urubyiruko n’Umuco, Bamporiki Edouard, Umuyobozi wa MOCA, Alain Bidjeck hamwe na Raoul Rugamba uyobora Africa In Colors

Yakomeje avuga ko muri abo harimo Umuyobozi w’Umujyi wa Kigali Pudence Rubingisa, Umuyobozi Mukuru wungirije muri RDB Zephanie Niyonkuru, Jean De Dieu Tugirimana, umuyobozi w’ikigo cy’igihugu gishinzwe abanditsi, Carole Karemera, Nirere Shanel ndetse na Judo Kanobana.

Mu bantu 5,000 bazaza mu Rwanda baturutse muri Afurika ndetse n’ahandi ku Isi bazitabira iserukiramuco, hazaba harimo abanyeshuri, ba rwiyemezamirimo, abahanzi, ibyamamare ku mbuga nkoranyambaga, abahanga udushya, abafata ibyemezo, ibigo by’itangazamakuru bitandukanye by’imbere mu gihugu no hanze, ndetse n’abandi bafite uruhare mu nganda z’umuco n’ubuhanzi ku Isi yose.

AIC na MOCA bafite abafatanyabikorwa mu nzego zitandukanye, inzego za Leta n’izigenga mu Rwanda, muri Afurika n’ahandi hasigaye mu Isi.

MOCA Iserukiramuco mpuzamahanga rigiye kubera mu Rwanda ku nshuro ya 7
  • NTAWITONDA JEAN CLAUDE
  • Werurwe 3, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE