Minisitiri Amb. Nduhungirehe yatangiye uruzinduko rw’akazi muri Mali 

Minisitiri w’Ububanyi n’Amahanga n’Ubutwererane Amb. Olivier Jean Patrick Nduhungirehe, yatangiye uruzinduko rw’akazi muri Mali rugamije kongerera imbaraga umubano uri hagati y’u Rwanda n’icyo gihugu.

Ni uruziko rwatangiye ku wa 12 Ukwakira 2026, aho yagiranye ibiganiro na mugenzi we wa Mali, Abdoulaye Diop, byibanze ku mubano usanzwe hagati y’u Rwanda na Mali, hanarebwa amahirwe yo kurushaho kwagura ubufatanye mu nzego zifitiye inyungu ibihugu byombi.

Minisitiri Amb. Nduhungirehe kandi yabonanye na Minisitiri Ushinzwe Amahoro, Ubumwe n’Ubwiyunge bw’Abaturage muri Mali, Lieutenant General Ismaël Wagué.

Baganiriye ku bikorwa byo kwimakaza ubumwe n’ubwiyunge mu baturage b’icyo gihugu, imbogamizi z’umutekano n’amahoro, ndetse n’amahirwe yo gusangira ubunararibonye no kurushaho gushimangira umubano n’ubufatanye hagati y’u Rwanda na Mali.

U Rwanda na Mali bisanganywe imikoranire mu ngeri zitandukanye ndetse muri Werurwe 2024, ibihugu byombi byasinye amasezerano 19 arimo ay’ubufatanye mu rwego rw’ubuzima, umutekano, ubuhinzi, ikoranabuhanga, umuco no guteza imbere ishoramari.

Mu mwaka wa 2022 na bwo, abayobozi b’ingabo za Mali baje mu Rwanda bagamije kwigira ku bunararibonye bw’Ingabo z’u Rwanda ndetse bemeranya ko mu gihe gito ubufatanye bushyirwa mu masezerano.

Mali yafunguye Ambasade yayo mu Rwanda muri Gashyantare 2017 mu gihe Ambasaderi w’u Rwanda muri Mali, Festus Bizimana afite icyicaro i Dakar muri Senegal.