Michelle Obama yatsindiye igihembo cyatumye anganya n’umugabo we

  • MUTETERAZINA SHIFAH
  • Gashyantare 6, 2024
  • Hashize amezi 4
Image

Michelle Obama, umugore w’uwahoza ari Perezida wa 44, wa Leta Zunze Ubumwe z’Amerika (USA) Barack Obama, yatsindiye igihembo cya Grammy Award ku nshuro ya kabiri, ahita anganya n’umugabo we ibyo bihembo.

Ni igihembo yatsindiye ku mugoroba wa tariki 04 Gashyantare 2024, i Los Angeles mu birori byo gutanga ibihembo bya Grammy Awards byatangwaga ku nshuro yabyo ya 66, abikesha igitabo cye cyitwa “The Light We Carry: Overcoming in Uncertain Times” cyashyizwe mu majwi, aho ukiguze acyumva aho kugisoma, ibizwi nka Audiobook.

Nubwo aho ibihembo byatangirwaga Michelle Obama ubwe atari ahibereye, ariko yari mu cyiciro cy’igitabo cyashyizwe mu majwi gihiga ibindi (Best Audiobook) yahatanagamo n’umukinnyi wa filime Merly Streep, Senateri Bernie Sanders, William Shatner na Rick Rubi.

Si ubwa mbere Michelle Obama atsindiye igihembo muri iki cyiciro, kuko n’icyo aheruka yagitsindiye ku gitabo cye cya mbere yise Becoming.

Gutsindira Grammy Award bwa kabiri kwa Michelle Obama, byatumye ahita anganya ibyo bihembo n’umugabo we, kuko Barack Obama yatsindiye ibihembo bya Grammy ku bitabo bye yanditse byitwa Dreams From My Father hamwe na The Audacity of Hope: Thoughts on reclaiming the American Dream.

Umwaka ushize Michelle na Barack Obama bahataniye ibihembo bya Emmy, aho Michelle Obama yahatanaga mu cyiciro kimwe n’umunyamakuru w’umuherwe Oprah Winfrey cy’uhiga undi mu gutegura ibiganiro (Best Host) mu gihe Barack Obama wahatanaga muri ibyo bihembo ku nshuro ya kabiri, yari mu cyiciro cy’amajwi yakoreshejwe mu nkuru mbarankuru (docuseries) ya Working: What we do all day.

Muri ibyo birori byo gutanga ibihembo bya Grammy Awards ku nshuro ya 66, umuhanzi Burna Boy nubwo atigeze yegukana igihembo na kimwe muri bine yari ahataniye, ariko yakoze amateka yo kuba ari we muhanzi wa mbere w’Umunyafurika, by’umwihariko uririmba injyana ya Afrobeats wataramiye abari bitabiriye ibyo birori.

  • MUTETERAZINA SHIFAH
  • Gashyantare 6, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE