Menya icyo Bushari na Josua biteze mu gitaramo Ijoro rya Kigali Festival

  • MUTETERAZINA SHIFAH
  • Werurwe 7, 2024
  • Hashize ukwezi 1
Image

Biteganyijwe ko abahanzi batandukanye bazatarama mu gitaramo ijoro rya Kigali, aho bamwe muri bo batangaje icyo biteze muri icyo gitaramo kizaba ku itariki 9 Werurwe 2024.

Ijoro rya Kigali Festival ni iserukiramuco ryateguwe na Ole Entertainment Ltd, rigamije gufasha abahanzi bo mu kiragano cya cyera gusangiza abo mu kiragano cy’ubu uko ijoro ry’Abanyarwanda bo hambere ryabaga rimeze.

Abahanzi barimo abasizi, abaririmba gakondo, ababyinnyi, abanyarwenya bazitabira icyo gitaramo, bavuga ko biteze kurushaho kumenyana, bikazanabafasha gukora neza.

Bushari umenyerewe cyane mu njyana zigezweho, akaba n’umwe mu bazataramira abazitabira icyo gitaramo, avuga ko biteze kuzakora ibintu byiza.

Ati: “Icya mbere twiteze ni ugukora ibintu byiza bikanyura abazaba baje, ikindi ni uguhurira hamwe nk’abahanzi b’ingeri zitandukanye, ni ibintu byiza, ntabwo badusetsa cyangwa ngo twe tubakubite imidundo tutaziranye, dukeneye kumenyana tugahuza ubuhanzi, kuko ibintu dukora si ibyacu, biba ari iby’igihugu, tugomba guhuza, tukazamura igihugu nkuko basanzwe babitwigisha.”

Ibi bivugwa na Bushari, abihurizaho n’abanyarwenya barimo Joshua, uvuga ko kimwe mubyo iki gitaramo kizabafasha harimo kumenya byisumbuyeho, birusheho kuborohereza mu kazi kabo ka buri munsi.

Yagize ati “Ni igikorwa cyiza n’abandi bategura ibitaramo babyigiraho ntekereza ko impano nk’izingizi kuzihuza n’urwenya (comedy), ari bwo buryo bwiza bwo gukora Comedy live n’abahanzi runaka tujya duteraho urwenya ugasanga babifashe nabi, iyo turuteye turi kumwe na bo, ntekereza ko bibanyura cyane kurushaho bakabona ko natwe dufite impano nk’izindi.”

Kuri Audia Intore, ngo iki gitaramo gishimangira ko abakobwa bashyigikiwe kuko hambere babaga ari abo mu gikari gusa.

Ati: ”Iki gitarambo nanjye nishimiye guhura n’impano zitandukanye icyarimwe, indi shusho kinyereka ni iy’uko abakobwa bafatwaga mu binyejena byabanje, bitandukanye n’uyu munsi, kuko nk’ubu hari abasore bavanga imiziki benshi, ariko hatumiwe Dj Ira, natwe turahari, rero binyereka ko abakobwa kuri ubu bahabwa umwanya wo kugaragaza ibyo bashoboye mu muryango nyarwanda. Kera babaga ari abo mu bikari gusa ariko ibaze ko muri iki gitaramo turi abakobwa barenze umwe! ni ukurushaho kwigirira icyizere tugakora birushijeho, kuko turashyigikiwe.”

Umuyobozi ushinzwe imitegurire y’ibitaramo muri Ole Entertainment Ltd, Jean Claude Niyomugabo, avuga ko bifuza ko kizaba igitaramo gihoraho, bakajya batumiramo abahanzi batandukanye hagamijwe guhuza impano zose.

Ati: ”Kuri iyi nshuro ni ugufungura iserukiramuco ku mugaragaro kuko ni igitaramo twifuza ko twazajya dutumira abahanzi batandukanye, kandi simbijeje ko kizaguma cyitwa ‘Ijoro rya Kigali’, kuko ntabwo amajoro yo mu Rwanda yabaga ari amwe, icyo nshatse kuvuga ni uko uyu mushinga ari munini cyane, ku buryo abahanzi, abafatanyabikorwa, twifuza ko twazagerana kure na bo abazitabira bazaryoherwa.”

Biteganyijwe ko mu ijoro rya Kigali Festival hazataramamo abahanzi bafite amazina akomeye mu njyana gakondo mu Rwanda barimo Mariya Yohana, Audia Intore, hamwe n’abandi bakora injyana zigezweho nka Ariel ways, Dj Ira umenyerewe cyane mu kuvanga imiziki, Bushari, umunyarwenya Babu Joe, Manzi mbaya, umusizi ABC, Carine n’abandi.

Biteganyijwe ko kizabera Kicukiro tariki 9 Werurwe 2024, aho abazitabira bazaririmbirwa, bakabyinirwa, bakumva ibisigo, ndetse n’urwenya.

  • MUTETERAZINA SHIFAH
  • Werurwe 7, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE