Kwibuka28: Bizimana yahishuye ko umwana w’imyaka 10 yakoze Jenoside

  • NTAWITONDA JEAN CLAUDE
  • Mata 16, 2022
  • Hashize imyaka 2
Image

Mu gihe cy’iminsi 100 mu 1994 Abatutsi basaga miliyoni barishwe. Iyo hasobanuwe cyangwa ukumva ubuhamya bw’abarokotse Jenoside uhita wumva ubukana Jenoside yakorewe Abatutsi yakoranywe.

Biragoye mu bwenge bwa muntu kumva ukuntu uwari ufite ubumuga bwo kutabona cyangwa n’ubundi bumuga yishwe, impinja zikicwa, ababyeyi bagafomozwa, ababyeyi bagakorerwa ibya mfura mbi n’ibindi.

Harya ubu wahera he uhakana ko Jenoside yakorewe Abatutsi itateguwe? Ibaze ko ingengabitekerezo ya jenoside yacengeye ikagera no mu bana b’imyaka 10? Ntibizongere!

Mu kiganiro Bizimana Christian, wari uhagarariye umuryango uharanira inyungu z’Abacitse ku Icumu IBUKA, yagaragaje ubukana bwa Jenoside yakorewe Abatutsi.

Yabigarutseho mu cyumweru gishize muri gahunda zo kwibuka ku nshuro ya 28 Jenoside yakorewe Abatutsi ahitwa mu Gahoromani mu murenge wa Masaka mu karere ka Kicukiro mu Mujyi wa Kigali.

Yakomoje ku mwana w’imyaka 10 mu ntara y’Amajyepfo wagize uruhare muri Jenoside.

Yagize ati “Ahantu hitwa ku Ibandiro i Nyanza (mu ntara y’Amajyepfo) mu karere ka Nyanza hiciwe abagore n’abana, hariyo umwana wimyaka 10 witwa Montfort wakoze Jenoside, yishe utwana dutoya tugenzi twe yari yaravutse mu 1984”.

Avuga ko mu 2020 ari bwo yamenye ko no mu bana bo ku muhanda bitwaga za mayibobo, na zo zishe ngenzi zazo ubwo Jenoside yakorerwaga Abatutsi.

Ati “Wa wundi udafite aho kuba, udafite icyo kurya, urwana n’ubuzima ariko afite inkota ahiga mugenzi we.

Muri gereza byarabaye, nakiriye umutangabuhamya wari uri i Nyanza, yambwiye umugabo witwa Fungaroho wishwe n’abanyururu bagenzi be muri gereza, bafunganywe, iyo ni yo jenoside yakorewe Abatutsi”.

Akomeza agira ati “Iyo twibuka Abatutsi bishwe mu gihe cya Jenoside, twibuka abo bari bo, twibuka ubumuntu bwabo, twibuka ubupfura bwabo, twibuka ibigwi n’amateka basize ku Isi, twibuka intego n’inzozi bari bafite ariko tukibuka uko twabanye, uko twagendanye […] Twebwe abana basize turi ishusho y’abacu”.

Avuga ko mu mateka y’Isi mu Rwanda ari bwo bwa mbere ku mpuzandengo abantu 10,000 bapfuye umunsi umwe ahantu hamwe mu gihugu kimwe.

Agaragaza ko tariki 21 Mata 1994, ariyo tariki yishweho abantu benshi mu Rwanda kandi bigakorwa umunsi umwe, abantu barenga ibihumbi 150 mu bice bitandukanye by’igihugu barishwe umunsi umwe.

Avuga ko kugira ngo bishoboke ari uko Jenoside yateguranywe ubukana bukomeye mu gihe cy’imyaka isaga 30.

Yagize ati “Leta ya Kayibanda na Habyarimana nta kindi bakoze kitari ugushora miliyaridi z’amadolari mu gutegura Jenoside, niyo mpamvu twayibonye imeze kuriya”.

Agaragaza ko abashinyaguzi bahakana bakanapfobya Jenoside yakorewe Abatutsi muri iyi minsi babaye benshi cyane, akavuga ko igitangaje bikorwa n’abana bavutse nyuma ya Jenoside.

Avuga ko bamwe mu babikora harimo n’abafite ababyeyi babo bagize uruhare muri jenoside.

Asobanura iyo ugeze ku rwibutso rwa Jenoside yakorewe Abatutsi ubona ibimenyetso bifatika ariko ko ikimenyetso kiruta ibindi kigaragaza ko jenoside yabayeho, ari abarokotse.

Asaba urubyiruko n’abakuru gukoresha imbugankoranyambaga mu kuvuga ibyo babonye muri jenoside no kwerekana imibiri itarashyingurwa mu cyubahiro aho iri kugira ngo ishyingurwe.

Ashimira Inkotanyi zahagaritse Jenoside yakorewe Abatutsi u Rwanda rukongera kugira ubuzima. Ati “Kuri twe Inkotanyi ni Ubuzima”.

  • NTAWITONDA JEAN CLAUDE
  • Mata 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE