Kwibohora 27: RCVD mu rugamba rwo kunoza serivisi z’ubuvuzi bw’amatungo

Yanditswe na NTAWITONDA JEAN CLAUDE

Ku ya 04-07-2021 saa 06:33:50
Abaganga b'amatungo mu Rwanda bishimira intambwe yatewe mu kwita ku buvuzi bw'amatungo mu myaka 27 ishize

Kunoza imitangire ya serivisi ni kimwe mu byaranze urugendo rutangaje rw’u Rwanda mu myaka 27 u Rwanda rumaze rwizihiza Isabukuru yo Kwibohora kw’Abanyarwanda.

Mu guharanira kugera ku mitangire ya serivisi inoze mu guharanira iterambere rirambye, hashyizweho ingamba zifasha kugera ku ntego Igihugu cyiyemeje kugeraho mu nzego zose zaba iza Politiki, iz’ubukungu n’imibereho myiza y’abaturage.

Urugaga rw’Abaganga b’Amatungo mu Rwanda (RCVD) ni rumwe muri izo nzego rwashyiriweho kugaragaza impinduka mu mitangire ya serivisi mu bworozi, no kugeza Urwego rw’ubworozi ku yindi ntera.

Urwo rugaga rwashyizweho n’itegeko N0 56/2013 ryo kuwa 09/08/2013, risohoka mu igazeti ya Leta N0 42 yo kuwa 21/10/2013. Kuva icyo gihe kugeza uyu munsi hagaragaye impinduka nziza nyinshi mu iterambere ry’ubworozi bw’u Rwanda, ahanini bishingiye ku buryo abavuzi b’amatungo bahinduye imikorere n’imikoranire n’abaturage na Leta y’u Rwanda muri rusange.

Dr Tumusabe Marie Claire, Umuyobozi Wungirije w’Urugaga rw’Abaganga b’Amatungo mu Rwanda, yatangarije Imvaho Nshya ko nk’uko inshingano nyamukuru yabo ari ukugeza serivisi nziza ku borozi, bishimira ko mu gihe urugaga rumaze rwagize uruhare mu kunoza serivisi zitangwa n’abanyamwuga.

Yashimangiye ko kuba haratekerejwe urwo rugaga ari intambwe ishimishije, agira ati: “Mu mwuga wacu hari byinshi byakozwe. Tuboneraho no gushima Ubuyobozi Bukuru bw’Igihugu kuba haratekerejwe no gushyiraho urwo rugaga, iyo yari intambwe ikomeye cyane.”

Kimwe mu by’ingenzi bimaze gukorwa ni ukwandika abanyamwuga. Ubu hamaze kwandikwa abanyamwuga 3 850 barimo abaganga b’amatungo 450, abafasha b’abaganga b’amatungo 3 200 n’impuguke mu bworozi 200.

Dr Tumusabe Marie Claire, Umuyobozi Wungirije w’Urugaga rw’Abaganga b’Amatungo mu Rwanda

Buri mwaka abanyamwuga bahabwa icyemezo cyo gukora (License) hakurikijwe umurimo cyangwa imirimo bemerewe gukora n’aho bemerewe kuyikorera. Dr. Tumusabe ati: “Ibi bituma tumenya abanyamwuga, aho bakorera n’ibyo bemerewe gukora, bigafasha Urugaga ndetse n’Inzego z’ibanze kubahuza n’aborozi.”

Abanyamwuga bahawe amahugurwa yimbitse mu mirimo bakora, harimo gutera intanga mu matungo (banafashwa kubona ibikoresho by’akazi birimo ibyo gutera intanga amatungo), gupima ko inka ihaka, kubaga bigamije gukiza (surgery), gupima hakamenyekana icyishe itungo, gupima inyama, gutegura imishinga yagezwa ku mabanki n’ibindi.

RCVD kandi ikora igenzura rihoraho ku banyamwuga bose aho bakorera hirya no hino mu Gihugu, bikaba bigenda bica ba magendu, byongera ireme ry’ibikomoka ku matungo bikoreshwa mu bantu, bikagenda binagabanya ibyago byo gutakaza ubudahangarwa ku miti imwe n’imwe yo mu matungo no mu bantu.

Mu gihe kandi urwo rugaga rumaze, rwubatse imikoranire myiza hagati yarwo n’amashuri yigisha abaveterineri, imikoranire n’izindi Ngaga zo mu Karere k’Afurika y’Iburasirazuba ndetse n’izo mu Muryango wa Commonwealth.

Abaturage bagenda bahindura imyumvire ku buvuzi bw’amatungo

Dr Tumusabe ashimangira ko hari intambwe imaze guterwa mu myumvire ku borozi n’abaturage muri rusange, ku bijyanye no kuvuza amatungo ndetse no gukurikirana ubuzima bwayo muri rusange.

Ati: “Kera abantu benshi ntibari bazi ko itungo rirwara ukitabaza muganga, twabaga tuzi ko niba inka yarwaye bagushakira wa muvuzi gakondo w’aho mu cyaro akaza akayivugutira ibyatsi akayiha, rimwe na rimwe ni ho wasangaga hari n’indwara ziba akarande mu matungo. Uyu munsi abaturage barasobanukiwe, iyo itungo ryarwaye ahamagara veterineri akayiha imiti ikwiye mu gihe gikwiriye.”

Imyumvire y’abaturarwanda mu kuvuza amatungo yarazamutse cyane

Yakomeje ashimira aborozi ko bagenda babona ko umwuga wo korora ari isoko y’ubukire igihe ukozwe neza, bakaba basobanukirwa n’uruhare rw’ubuvuzi bw’amatungo binyuze mu bukangurambaga bukorwa ku bufatanye n’izindi nzego zirimo Minisiteri y’Ubuhinzi n’Ubworozi, Ikigo RAB ndetse n’abafatanyabikorwa mu iterambere ry’ubworozi mu Rwanda.

Yakomeje agira ati: “Tubashishikariza ko ari ngombwa kwitabaza umuvuzi w’amatungo wabyigiye igihe bafite ikibazo mu bworozi bwabo. bagacika ku ngeso yo kwivurira, bagahamagara veterineri nyuma byabananiye, kuko kenshi bibatera igihombo mu bworozi bwabo.”

Abaturage bagenda basobanukirwa ko iyo batitabaje umuvuzi w’amatungo ngo abavurire ku buryo bwa kinyamwuga, usanga hari imiti ikoreshwa nabi bikagira ingaruka ku matungo no ku buzima bw’abarya ibiyakomokaho, kuko imiti itanzwe nabi ituma udukoko dutera indwara tugira ubudahangarwa ku miti yari isanzwe ivura (Antimicrobioresistance) yaba ku matungo ndetse no ku bantu.

Imitangire ya serivisi mu bihe bya COVID-19

Kimwe n’izindi nzego zita ku buzima, abanyamwuga bita ku buzima bw’amatungo na bo bakomeje gukora no mu bihe u Rwanda n’Isi yose bihanganye n’icyorezo cya COVID-19.

Dr Tumusabe yavuze ko Urugaga rufasha buri wese kubona abaveterineri b’umwuga, ashimira Leta y’u Rwanda yorohereje abatanga serivisi z’ubworozi muri ibi bihe bigoye, bakabasha kugera aho bagiye gutanga serivisi mu gihe bagaragaje ko bari mu kazi.

Buri muveterineri utanga serivisi zaba izo kuvura amatungo, gutera intanga, gucuruza imiti y’amatungo, gucuruza ibiryo by’amatungo n’ibindi aba afite icyemezo yahawe n’urugaga kigaragaza ko akora iyo mirimo (License card), bityo bikamworohereza kugera aho agiye mu kazi.

Ati: “Uyu ni umwanya mwiza wo kugira ngo tunamenyeshe aborozi ko ari uburenganzira bwabo gusaba umuveterineri ugiye kubaha serivisi ko yabereka icyo cyemezo, kugira ngo bagire icyizere ko bahawe serivisi n’umunyamwuga uzwi n’urugaga.”

Abo baveterineri basabwa kujya gutanga serivisi bubahirije amabwiriza yo kwirinda COVID-19, arimo kwambara agapfukamunwa, gukaraba intoki, guhana intera n’andi mabwiriza yose yashyiriweho kwirinda ikwirakwizwa ry’icyo cyorezo.

Abanyamwuga bafashwa kugendana n’ikoranabuhanga

Uhereye ku buryo bwo kwiyandikisha ukageza ku mitangire ya serivisi zitandukanye z’ubuvuzi bw’amatungo, ikoranabuhanga rigenda rihinduka. Muri RCVD biyemeje kudasigara inyuma mu rugendo rwo kwimakaza ikoranabuhanga mu koroshya no kunoza imitangire ya serivisi.

Dr. Nshimiyimana Alphonse M., Umunyamabanga Nshingwabikorwa wa RCVD, yavuze ko nanone kuri ubu harimo gutegurwa uburyo bw’ikoranabuhanga buzafasha aborozi kumenyekanisha ikibazo bagize bagahita bahabwa igisubizo cyihuse.

Ati: “Ni ikoranabuhanga ryifashishwa kuri telefone, yajya agira icyo atwoherereza tugahita tumuha ubufasha bw’ako kanya, ikibazo yaba ahuye na cyo (itungo, serivisi itari nziza, …) ku buryo gihita kimenyekana kigashakirwa igisubizo”.

Yanagaragaje kandi ko barimo gukorana na Minisiteri y’Ubuhinzi n’Ubworozi muri gahunda yo gukwirakwiza uburyo bushya bw’ibiranga amatungo bwo kwinjiza agakoresho gato k’ikoranabuhanga (RFID) mu gutwi kw’inka.

Abaganga b’amatungo bagenda bunguka ikoranabuhanga rishya ririmo n’iryo kubaga amatungo hagamijwe ubuvuzi

Ubutumwa bwihariye ku munsi wo Kwibohora

Abanyamwuga bose bo mu Rugaga rw’Abaganga b’Amatungo mu Rwanda bifatanyije na Nyakubahwa Perezida wa Repubulika y’u Rwanda, Abagize Inteko Ishinga Amategeko Imitwe yombi, Abagize Guverinoma, Ingabo na Polisi by’Igihugu n’Abanyarwanda bose, by’umwihariko aborozi, kwizihiza Umunsi wo Kwibohora ku nshuro ya 27.

Turakomeza kuzirikana ubwitange n’umurava byabayeho mu rugamba rwo kubohora Igihugu no mu iterambere ryabayeho, by’umwihariko mu bworozi, muri iyi myaka 27 ishize.

Abaveterineri bakomeje kubizeza serivisi nziza kandi yihuse, no muri ibi bihe bitoroshye twese dukomeza gufatanya mu ishyirwa mu bikorwa ry’ingamba zigamije kwirinda no kurwanya COVID-19.

Inka yari imaze kubagwa hagamjwe kuyivura uburwayi yari ifite

Aha abaganga b’amatungo bakoraga ubugenzuzi ku buzima bw’amatungo maremare

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.