Kuba u Rwanda rukiriho ni uko intwari zakomeje kubaho-CHENO

  • Sedar Sagamba
  • Gashyantare 1, 2022
  • Hashize imyaka 2
Image

Ubuyobozi bw’Urwego rushinzwe Intwari z’Igihugu, Imidari n’ Impeta by’Ishimwe (CHENO) buvuga ko kuba u Rwanda rukiriho ari uko rwagize intwari kuva kera; rwahanzwe n’abana barwo, bararwitangira, bararurinda, bararwagura, baruteza imbere kugeza n’uyu munsi.

Ni muri urwo rwego kuri iyi taliki ya 1 Gashyantare, Abanyarwanda bizihiza  Umunsi ngarukamwaka w’Intwari z’u Rwanda, bazirikana  ibikorwa byazo ntagereranywa. Insanganyamatsiko y’uyu mwaka igira iti: “Ubutwari mu Banyarwanda, Agaciro kacu”.

Kuzirikana Intwari z’Igihugu bituma Abanyarwanda bakomeza umuco wo kunga ubumwe, gukunda Igihugu cyabo no guharanira iterambere ryacyo.

Mu kiganiro n’Imvaho Nshya, Umunyamabanga Nshingwabikorwa wa CHENO Nkusi Deo yavuze ko Abanyarwanda bakwiye gukomeza kwimakaza umuco w’ ubutwari mu byo bakora byose, bagaharanira ko Igihugu cyabo kitazima.

Yagize ati: “Ntabwo twifuriza abana bacu ko Igihugu cyazazima, turashaka ko bakomeza kuba intwari bakitangira Igihugu cyabo. Igihugu kitagira intwari kirazima”.

Yakomeje agira ati: “Ubutwari ni umuco, buri mu muco w’Abanyarwanda kandi mwiza, baranavuga bati nta gihugu kitagira intwari, n’ikitazifite kirazirema.  Mu Rwanda tugira amahirwe kuko intwari si ikintu dushakisha, si ikintu tugomba kurema kuko Abanyarwanda kuva kera bazwiho ubutwari. Ubutwari mu Banyarwanda si ubwa none si ubw’ejo, ni ubw’igihe kirekire kuva u Rwanda rwakwitwa u Rwanda”.

Nkusi avuga ko ubutwari Abanyarwanda  babushyiraga imbere cyane, indangagaciro zabwo zikagendana n’izindi zizishamikiyeho; nk’ubumwe, gufatanya, bagashyira Igihugu imbere. 

Ati: “…kandi bigakorwa bihereye hejuru; umwami ubwe akitangira Igihugu, ibikomangoma bikakitangira, hakaba abacengeri b’abatabazi batabariraga Igihugu bakaba bazi ko bagiye kumena amaraso yabo kugira ngo kizatere imbere. Mu ngeri zose z’Abanyarwanda, mu bice byose by’Igihugu habaga amatorero, abantu b’intwari batabarira Igihugu. Mu gihe cya kera bari abagabo gusa ariko ubu abagore n’abakobwa barimo”.

Nkusi avuga ko amateka y’u Rwanda abantu badakwiye kuyahera hafi aha ku mwaduko w’abazungu baje bakigisha ibyabo, Abanyarwanda bakabyemera bikabasenya, bo ubwabo bakisenya.

 Ati: “Ibi bikwiye kudufasha kuba twatekereza, tugakosora  ibyo bagiye bagoreka mu mateka kugira ngo twubake igihugu gikomeye, gifite umuzi ukomeye, kandi biragaragara ko uwo muzi wari muremure kuko iyo utaba muremure u Rwanda ntiruba rukiriho, kuba rugeze aho rugeze ubu ni uko ab’intwari bakomeje kubaho”.

Ahamagarira buri wese by’umwihariko urubyiruko guharanira kugera ikirenge mu cy’izo ntwari, ibyo bakora byose bakabikorana ubutwari.

Ati: “Mu bintu byose umuntu akora habamo indangagaciro nyinshi zikomeye, umurimo ukora iyo uwukoze neza ukawunoza, ugatanga urugero rwiza, ukagirira akamaro benshi, ukagirira akamaro Igihugu, Afurika  n’Isi kiba ari igikorwa cy’ubutwari, bitavuze ngo ubaye Intwari y’Igihugu, koko ariko uba ukoze igikorwa cy’ubutwari”.

Indangagaciro z’ubutwari

Nkusi Deo yagarutse kuri izo ndangagaciro (indangagaciro remezo zifite izizishamikiyeho) z’ubutwari agira ati: “Iyo tuvuze indangagaciro remezo zemejwe mu nzego zitandukanye ku rwego rw’Igihugu; iya mbere ni ugukunda igihugu (igihugu cya mbere ni abantu, icya kabiri ni ahantu, icya gatatu ni ibintu), iya kabiri ni ukunga ubumwe kandi iyo abantu bashyize hamwe bagera kuri byinshi, iya gatatu ni umurimo unoze utanga umusaruro”.

Avuga ko indangagaciro ya kane ari ukurangwa n’ubupfura, ingeso nziza. 

Akomeza agira ati: “Indangagaciro dusanga mu muco w’u Rwanda ni zo zubaka umuryango zikawukomeza ukagira ubudasa, ukaba intangarugero, buri wese agize izo ndangagaciro imibereho myiza n’iterambere ntawashidikanya ko abantu babigeraho”.

Yakanguriye urubyiruko kumenya umuco nyarwanda, ururimi n’ indangagaciro z’ubutwari kandi rukazishyira mu mibereho ya buri munsi, rukubakira  kuri uwo musingi, ibindi byose ruzajya gushaka birimo ubumenyi, ikoranabuhanga bikaza biwubakiraho.  

Intwari z’Igihugu zifatwa nk’icyitegererezo

Intwari z’Igihugu zifatwa nk’icyitegererezo  ziboneka mu nzego eshatu:

Imanzi

Muri uru rwego harimo Maj. Gen. Fred Gisa Rwigema n’Umusirikare utazwi Izina uhagarariye Ingabo zitangiye Igihugu zikagwa ku rugamba mu bihe byashize, iby’ubu n’ibizaza.

Maj. Gen. Fred Gisa Rwigema aho yabaye hose yarwanyije akarengane, arwanya ikibi atitaye ku ngaruka byamugiraho. Yari azi ubukana bw’intambara ariko ntiyatinya kuyobora iyari iruhije kurusha izindi ari yo yo kubohora u Rwanda.

Imena

Muri iki cyiciro habarizwamo:

Mutara III Rudahigwa Charles Leon Pierre wabaye umwami w’u Rwanda mu 1931-1959. Yagize umutima ukomeye kandi ucyeye, ntiyatinya guhangana n’Ababiligi bari bamufiteho ububasha bukomeye, aharanira ubwigenge bw’Igihugu cyane cyane nyuma y’umwaka wa 1952. Yaharaniye ubumwe bw’Abanyarwanda.

Michel Rwagasana wabaye Umunyamabanga w’Inama Nkuru y’Igihugu cy’u Rwanda n’Umunyamabanga w’Umwami Mutara III Rudahigwa. Yabaye umukozi wa Leta Mbiligi muri Teritwari ya Ruanda-Urundi mu biro bishinzwe abakozi kavukire i Bujumbura. Yagaragaje gukunda Igihugu, yari ku isonga mu baharaniye ubwigenge bwacyo.

Uwiringiyimana Agathe wabaye Minisitiri w’Intebe kuva muri Nyakanga 1993 kugeza muri Mata 1994. Yagaragaje ubwitange mu murimo yakoraga, yahangaye gukuraho akarengane mu mashuri, icyo gihe abashinze icyo bise “iringaniza” bari bagitegeka Igihugu.

Niyitegeka Felicité wakoze imirimo itandukanye yo kwigisha, kurera, gucunga umutungo no gufasha abatishoboye. Yabaye indakemwa mu mibereho ye, yagize umutima ukunda abantu kugeza ubwo apfana n’abamuhungiyeho  mu  gihe  cya Jenoside yakorewe Abatutsi mu 1994.

Abanyeshuri b’i Nyange bigaga mu mwaka wa 5 n’uwa 6 w’amashuri yisumbuye banze kwitandukanya tariki ya 18 Werurwe 1997 ubwo baterwaga n’abacengezi, bakavuga ko bose ari Abanyarwanda.

Ingenzi 

Muri iki cyiciro nta muntu wari washyirwamo.

Ubuyobozi bwa CHENO buvuga ko bukora ubushakashatsi buri mwaka ku bandi bantu bashyirwa muri ibi byiciro by’intwari hakurikijwe ibikorwa by’ubutwari bakoze nyuma y’ubusesenguzi bw’Inzego nkuru z’Igihugu.  

Abemejwe bahabwa impeta n’imidari by’ishimwe n’Umukuru w’Igihugu cyangwa undi yagena uhagarara mu mwanya we. Kugeza ubu abakozweho ubushakashatsi hategerejwe ko bemezwa barenga 100.

Impeta z’ishimwe zitangwa ni Uruti (Impeta yo kubohora Igihugu), Umurinzi (Impeta yo kurwanya Jenoside), Impeta y’ubucuti (yitwa Igihango), Impeta y’agaciro (Icyubahiro), Impeta y’umurimo (Indashyikirwa), Impeta y’umuco (Indangamirwa) n’Impeta y’Ubwitange (Indengabaganizi).

Abanyeshuri b’i Nyange
Rwagasana Michel
Niyitegeka Felicité
  • Sedar Sagamba
  • Gashyantare 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE