Kirehe: I Nyarubuye hashyinguwe mu cyubahiro imibiri 12

  • NTAWITONDA JEAN CLAUDE
  • Mata 14, 2022
  • Hashize imyaka 2
Image

Mu Karere ka Kirehe uyu munsi taliki ya 14 Mata 2022, habereye umuhango wo Kwibuka ku nshuro ya 28 Jenoside yakorewe Abatutsi mu 1994, hanashyingurwa mu cyubahiro imibiri 12.

Ni umuhnago witabiriwe na Guverineri w’Intara y’Iburasirazuba CG Gasana K. Emmanuel, Intumwa za rubanda, Abayobozi b’inzego z’umutekano, Ubuyobozi bw’Akarere n’abandi bifatanyije n’abaturage b’Akarere n’inshuti zabo kwibuka ku nshuro ya 28 Jenoside yakorewe Abatutsi mu 1994, bunamira imibiri y’Abatutsi basaga 58,000 ishyinguye mu rwibutso rwa Jenoside rwa Nyarubuye.

Umuyobozi w’Akarere ka Kirehe Rangira Bruno yihanganishije imiryango ifite ababo bazize Jenoside yakorewe Abatutsi mu 1994 bashyinguye mu rwibutso rwa Jenoside rwa Nyarubuye n’imiryango ifite ababo bari bashyinguwe mu cyubahiro uyu munsi, imibiri 12 yabonetse hirya no hino.

Yakomeje avuga ko ari iby’agaciro kwifataya n’imiryango y’ababuze ababo hibukwa inzirikarengane zavukijwe ubuzima kubera uko baremwe kandi zikicwa urw’agashinyaguro.

Yihanganishije abacitse ku icumu, ati: “Ndagira ngo twibuke twiyubaka  kandi ntimuheranwe n’agahinda kubera ko hari icyizere kigaragazwa n’Ubuyobozi bwacu. Aho bwahaye uburenganzira buri muturage kandi buharanira kurwanya ingengabitekerezo Jenoside”.

Ashima ko Urwibutso rwa Nyarubuye rwashyizwe mu nzibutso ku rwego rw’Igihugu, rukubakwa neza kandi byatanze igisubizo ku bafite ababo bashyinguye muri urwo rwibutso.

Meya Rangira yavuze kandi ko Jenoside yakorewe Abatutsi mu cyahoze ari Komine Rusumo cyane cyane mu Murenge wa Nyarubuye yakoranwe ubukana n’ubugome budasanzwe.

Uwavuze ku mateka ya Migongo,  Nkubiri yagaragaje uburyo Abatutsi batotejwe guhera kera ariko ko ashima ko ubuyobozi buba buri kumwe nabo ndetse ko aho bageze baba bifatanyije nabo, Leta nziza, abayobozi beza bariho ubu baharanira ubumwe bw’Abanyarwanda.

Yagize ati: “Mu Migongo abantu barabanaga nta kuvangura amoko, habaga hari inzu y’Abungura, y’Abacyaba, Abungura, Abasita, Abashambo,  umuntu yiyumvagamo ko ari abavandimwe”.

Yakomeje asobanura ko nyuma  y’imyaka ya  1959, 1960, 1963 ibintu byaje kudogera batwikira Abatutsi, 1961 abantu barahunze, ndetse ab’inshuti bakabakurikira bakabagemurira. 1962 batangiye kwica abantu, mu 1963, mu 1972, 1973 birakomeza, abanyeshuri barirukanwa, abakozi biba uko, Abatutsi barameneshwa, baricwa.

Undi wagarutse ku mateka ya Migongo, Rwagasana nawe yavuze ko Abanyarwanda babanaga neza batari bazi ubuhutu, ubututsi n’ubutwa. Ati: “Ndashima ko ubungubu dutekanye kuko dufite ubuyobozi bwiza, ntawigisha amacakubiri, ubu intero ni imwe ni Umunyarwanda”.

Uwarokokeye i Nyarubuye, mu buhamya bwe Abel Muhayemungu yagaragaje inzira igoye Abatutsi banyuzemo, urupfu rw’agashinyaguro bishwemo.

Ati: “Ku italiki ya 13 ni bwo iwacu bavuye mu rugo babonye hakurya imisozi bayitwitse, ababyeyi baratubwira ngo duhungiye kuri Paruwase Nyarubuye  kuko ho abahahungiye baticwa”.

Yakomeje asobanura ko atari ko byagenze ahubwo abakoraga Jenoside bari batangiye kuhagera. Ku ya 14 nka saa tanu zishyira saa sita babona umuntu uje yakomeretse cyane batangiye kwica i Nyarutunga.

Uwo munsi nka saa saba bagaruka kugerageza, abahari birwanaho ariko ku ya 15 nko mu ma saa tanu saa saba haje imodoka yuzuye Interahamwe nyuma haje imodoka hasohokamo uwari Burugumesitiri wa Rusumo abwira izo Nterahamwe ngo iyi mihoro muyikoreshe nigimba mutubwire tubazanire iyindi.

Yakomeje avuga uburyo Abatusti bishwe hakoreshejwe kubarasa,  ibyuma, imihoro, impiri zirimo imisumari, imiborogo ikaba myinshi, uko abicaga bagarutse bakajya bateramo urusenda  kugira ngo barebe niba hari abakirimo akuka.

Leta y’Ubumwe yaduhaye kubaho, turi umwe

Muhayemungu yashimiye Leta y’Ubumwe cyane kuko yabasubije ubuzima nyuma yo kunyura mu rupfu rwari rwegereye umuntu kurusha kubaho.

Ati: “Ndashimira Leta y’Ubumwe bw’Abanyarwanda, kandi ntitujya tubasha kubona uko twayishima, ntitwari tuzi ko twakongera kugira ubuzima’.  

Yatanze icyifuzo cy’uko Akarere kakwita ku bana barokotse bari mu Murenge wa Nasho batabayeho neza.

Perezida wa Ibuka mu Karere ka Kirehe, Nduwimana Bonaventure yihanganishije Abanyarwanda muri rusange ariko by’umwihariko abarokotse Jenoside b’i Nyarubuye n’abafite ababo bashyinguwe mu cyubahiro. Yanashimiye Leta y’Ubumwe yabarokoye, Inkotanyi cyane cyane uwari uzirangaje imbere Perezida wa Repubulika Paul Kagame ndetse n’Akarere ka Kirehe uburyobita ku barokotse Jenside yakorewe Abatutsi mu 1994.

Yagize ati; “Turi gusubira mu mateka yaranze Abanyarwanda, amateka yabereye hano i Nyarubuye  Twapfuye rimwe ariko ntabwo tuzongera gupfa ukundi, nk’Abanyarwanda twagize umugisha twavuye mu mwijima ubu turi ahabona dufite igihugu cyiza, turi mu gihugu cyiza giha agaciro buri munyarwanda wese uko agakwiye.

Yongeyeho ati: “Turi umwe ntabwo tukiri ba nyakamwe, ubu turi umwe aho ntari n’undi arahari, ubu twunze ubumwe turi umwe ntawakemera ko undi aheranwa n’agahinda nta nubwo tuzemera ko abaho nabi”

Yagaragaje ibyifuzo by’abarokotse Jenoside kugira ngo imibereho yabo isigasirwe, birimo inzu zishaje kuba zasanwa, gukora ubushakashatsi bwimbitse ku itegurwa n’ishyirwa mu bikorwa rya Jenoside mu cyahoze ari Komini Rusumo ndetse na Nyarubuye, no gushyira ikimenyetso ku migezi n’ibiyaga aharoshywe Abatutsi bishwe muri Jenoside, ndetse hakandikwa n’amazina y’abahaguye.

Guverineri w’Intara y’Iburasirazuba CG Gasana K. Emmanuel yahumurije abarokotse.

Ati: “Nimukomere kandi nkuko mwahawe icyizere na Perezia Kagame aho yemeza ko Ighugu cyunze ubumwe, ko nubwo mwabuze abantu ariko mufite Igihugu cyiza kitarangwamo amacakubiri, kidaheza, cy’umuturage utekanye kandi ufite imibereho myiza, ni cyo cyerekezo. Nimuhumure nta Jenoside izongera kuba ukundi”.

Yashimye uburyo abaturage bitabiriye ibikorwa by’icyumweru cy’icyunamo n’ibiganiro byari biteganyijwe.

RPA Inkotanyi batubereye urugero bitangiye igihugu baritanze bihebuje barokora abahigwaga, babohora u Rwanda, bubaka Umunyarwanda, bubaka umuco n’ingandagaciro ndetse baduha icyizere cyo kubaho n’icyerekezo cyiza n’ibindi byinshi, ahasigaye ni ahacu Abanyarwanda ba none  kubaka u Rwanda twifuza, u Rwanda rushya rw’uyu munsi rufite icyerekezo.”

Yashimiye abarokotse ubutwari bagaragaza batanga imbabazi, ukudaheranwa, kwihangana. Leta na yo ikomeje kubaba hafi mu rwego rw’isanamitima ubumwe n’ubwiyunge no kwiyubakamo icyizere cy’ejo hazaza n’ibindi bibafasha kubaho.

Mu gusoza yibukije abari aho ko bagomba kwamaganira kure abagifite imyuvire y’amacakubiri n’ingengatekerezo ya Jenoside. Dukomeza gufasha abarokotse mu buryo bushoboka kandi Abanyarwanda bakagira ubutwari bwo kwerekana ahakiri imibiri y’Abatutsi itarashyingurwa mu cyubahiro.

Meya w’Akarere ka Kirehe Bruno Rangira, yavuze ko mu kubungabunga amateka ku bufatanye bw’Inzego zirimo MINUBUMWE, Akarere na Ibuka bari muri gahunda yo gukusanya amateka ngo  hakorwe igitabo n’amateka yaranze Jenoside yakorewe Abatutsi mu cyari Komine Rusumo.

Intara y’Iburasirazuba ubu hari inzibutso zirenga 38.

  • NTAWITONDA JEAN CLAUDE
  • Mata 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE