Kigali: Ibihugu 10 bizitabira iserukiramuco mpuzamahanga rya Filimi

  • NTAWITONDA JEAN CLAUDE
  • Ukwakira 1, 2022
  • Hashize imyaka 2
Image

Ubuyobozi bwa Urusaro International Women Film Festival bwatangaje ko mu Rwanda hagiye kubera iserukiramuco rya za Sinema ku nshuro ya Karindwi, rikazatangira tariki kuva tariki 04 kugeza 11 Ukwakira 2022.

Floriane Kaneza, Umuyobozi w’Urusaro Intenational Women Film Festival, asobanura ko iri serukiramuco rigamije gukomeza gushyigikira no guteza imbere abagore mu ruhando rwa Sinema mu Rwanda.

Avuga ko Urusaro Intenational Women Film Festival igira gahunda ngarukamwaka y’iserukiramuco rya za filimi zibara inkuru ifitanye isano n’abagore ariko zarakozwe n’izateguwe n’abagore cyangwa n’abagabo.

Iserukiramuco rigiye kuba rizahuza ibihugu bitandukanye byo ku mugabane w’Afurika birimo u Rwanda, Uganda, Sudan, Kenya, Senegal, Afurika y’epfo, Benin, Cameroon, Togo na Burkina Faso.

Ni mu gihe kandi filime 22 zizerekanwa, harimo filimi 4 z’inyarwanda arizo zizahatana.

Kaneza avuga ko abitabira iserukiramuco batishyuzwa ahubwo ko harebwa icyo bije kungura umugore uri muri Sinema mu Rwanda.

Ati “Tuzana abantu bagakorana n’abantu bose, hari abantu twumvise barimo bakorana n’abo muri Kenya  kandi barahuriye mu iserukiramuco ryacu. Ni inkuru nziza kuri twe, atari ku bagore gusa, ahubwo kuri Sinema nyarwanda muri rusange”.

Abagore bari mu ruhando rwa Sinema mu Rwanda barishimira urwego bamaze kugeraho, kuko rushimishije ugereranyije n’imyaka ishize.

Murekeyisoni Jacquéline, Umuyobozi w’umuryango uharanira iterambere rya Sinema mu Rwanda by’umwihariko wita ku bagore bakora umwuga wa Sinema (Cine Femme Rwanda) avuga ko batangiye gukora Sinema biri ku rwego rwo hasi.

Murekeyisoni Jacquéline, Umuyobozi Cine Femme Rwanda

Agaragaza ko nyuma hagiye haboneka abantu batanga amahugurwa bituma uruganda rwa Sinema rugenda ruzamuka kuko ngo rugeze ahashimishije.

Ati “Nubwo habonekaga amahugurwa y’igihe gito nk’icyumweru, bifite icyo byongeraga mu mutwe w’umuntu, ku buryo nk’uyu munsi aho bigeze tubona hari icyo bitanga, kuko bafite uko bahagaze mu mwuga wa Sinema, nta mubare ufatika dufite, kuko ntibaraba benshi.

Uko batangiye ntabwo ariko bameze uyu munsi, ubwiza bw’ibikorwa bakora ubona bifite aho byavuye naho bigeze uyu munsi”.

  • NTAWITONDA JEAN CLAUDE
  • Ukwakira 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE