Bamwe mu banyemari bakomeye ku mugabane wa Afurika, inzobere mu bukungu n’abayobozi bakomeye bahoze mu nzego za Leta bateraniye i Kigali mu mwiherero wa gatatu wiswe “African Renaissance Group (ARG) Retreat”, ugamije kungurana ibitekerezo ku bibazo byugarije ubukungu bwa Afurika no gushaka ibisubizo byihutisha iterambere rirambye ry’umugabane.
Muri uwo mwiherero uteraniye i Kigali guhera ku wa Gatanu tariki ya 20 kugeza kuri iki Cyumweru tariki ya 22 Ugushyingo 2026, hagaragayemo Aliko Dangote, washinze ikigo cy’ubucuruzi cya Dangote Group, Mo Ibrahim washinze Mo Ibrahim Foundation, na Ngozi Okonjo-Iweala, Umuyobozi Mukuru w’Umuryango Mpuzamahanga w’Ubucuruzi (WTO).
Abandi bayitabiriye barimo Hailemariam Desalegn wahoze ari Minisitiri w’Intebe wa Ethiopia; Fred Swaniker washinze akaba n’Umuyobozi Mukuru wa Sand Technologies; Acha Leke, Umufatanyabikorwa Mukuru muri McKinsey; Vera Songwe, Umuyobozi Mukuru wa Liquidity and Sustainability Facility (LSF) na Roman Tesfaye, umugore wa Hailemariam Desalegn.
Nk’uko byatangajwe na Ngozi Okonjo-Iweala mu butumwa yashyize ku rubuga nkoranyambaga rwa X ku wa Gatandatu tariki ya 21 Ugushyingo 2026, iyi nama yahuje abantu bafite inshingano zikomeye mu nzego za Leta n’iz’abikorera muri Afurika, bagamije kuganira ku cyakorwa kugira ngo ubukungu bw’umugabane butere imbere, by’umwihariko hongerwa ubucuruzi.
Ibiganiro by’uwo mwiherero byibanda ku bibazo bikomeye Afurika ihanganye na byo, harebwa uburyo ibihugu byayo byarushaho gufatanya, gukoresha neza amahirwe bihuriyeho no gushyiraho ingamba zageza umugabane ku iterambere rirambye.
‘African Renaissance Retreat’ ni urubuga rwashyizweho n’Umuherwe Aliko Dangote kugira ngo ruhuze abanyemari, abayobozi b’inzego zitandukanye, imiryango y’abagiraneza n’abandi bantu bafite uruhare rukomeye mu iterambere ry’Afurika, baganire ku cyerekezo cy’ubukungu bw’umugabane no ku bisubizo by’ibibazo byawo.
Iyi ni inshuro ya gatatu uyu mwiherero ubereye i Kigali. Umwiherero wabaye ku nshuro ya kabiri wabaye kuva ku wa 14 kugeza ku wa 16 Ugushyingo 2025, witabirwa na Perezida wa Repubulika y’u Rwanda, Paul Kagame, Thabo Mbeki wahoze ari Perezida wa Afurika y’Epfo, Olusegun Obasanjo wahoze ari Perezida wa Nigeria na Ellen Johnson Sirleaf wahoze ayobora Liberia.
Uwo mwiherero kandi wari witabiriwe n’abandi banyemari bakomeye barimo Tony Elumelu, Patrice Motsepe, Tidjane Thiam, Abdul Samad Rabiu, Mohammed Dewji, Naguib Sawiris, Femi Otedola na James Mwangi.
Mu biganiro byo mu 2025, hanagarutswe ku mahirwe y’ishoramari muri Afurika, umutekano w’ingufu n’ibiribwa, ubucuruzi, imbogamizi z’imyenda n’uburyo umugabane warushaho gukurura ishoramari ry’igihe kirekire.
Guhuriza hamwe abantu bafite ubunararibonye mu miyoborere, ishoramari n’ubukungu muri Afurika bifatwa nk’amahirwe yo kungurana ibitekerezo no gushaka ingamba zihuriweho zo gukemura ibibazo byugarije umugabane.







Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE