Kicukiro: Hatashywe ibikorwa remezo birimo ibiro by’Akagari

  • NTAWITONDA JEAN CLAUDE
  • Gicurasi 4, 2022
  • Hashize imyaka 2
Image

Abaturage bo mu Kagari ka Rwimbogo mu Murenge wa Nyarugunga mu Karere ka Kicukiro mu Mujyi wa Kigali barishimira ibikorwa remezo biyubakiye, bakavuga ko bizabafasha mu rwego rw’isuku no guhabwa serivisi nziza.

Ku mugoroba wo kuri uyu wa Kabiri taliki 03 Gicurasi 2022, abaturage bo mu Kagari ka Rwimbogo batashye ibiro by’Akagari kabo, ibiro by’Umudugudu wa Rwinyange n’umuhanda biyubakiye ureshya n’ibirometero bitatu n’igice (3,5 Km).

Uwisize Aimé utuye mu Mudugudu w’Umushumba Mwiza yishimira ibikorwa by’indashyikirwa babikoze babikunze.

Ati: “Ibi bikorwa twishimira ko abaturage twabigizemo uruhare rukomeye cyane dutanga imbaraga zacu kubera gukunda Igihugu”.

Kuba bafite ibiro by’Akagari kandi byiza ngo bigiye gutuma bahabwa serivisi nziza kurushaho.

Gahima Martin, umuturage wo mu Kagari ka Rwimbogo, yishimira ibikorwa by’indashyikirwa bagezeho birimo ibikorwa remezo n’inyubako nziza y’akagari.

Avuga ko abaturage ba Rwimbogo ari intore zo ku Isonga kuko ngo batajya bashyirwamo imbaraga nyinshi mu kwikorera ibikorwa bibateza imbere.

Mukankusi Judith, Umunyamabanga Nshingwabikorwa w’Akagari ka Rwimbogo, yagaragaje ko abaturage bagize uruhare mu bikorwa by’iterambere ryabo (Foto Kayitare J.P)

Ati: “Twamaze gusobanukirwa ko ibikorwa byose abaturage bagizemo uruhare ari ibyabo, ntabwo tugomba kubishyirishwamo agahato. Turabikangurirwa tukabishishikarizwa tukumva ko igikenewe gukorwa kandi cyagirira akamaro abaturage n’Igihugu muri rusange tugomba kugikora”.

Mukankusi Judith, Umunyamabanga Nshingwabikorwa w’Akagari ka Rwimbogo mu murenge wa Nyarugunga, asobanura ko igikorwa cy’indashyikirwa cyo kwiyubakira ibiro by’Akagari, Umudugudu ndetse n’imihanda yo muri karitsiye ari ibikorwa byagizwemo uruhare n’abaturage.

Agira ati: “Ibi ni ibikorwa abaturage bikorera mu mbaraga zabo”.

Avuga ko imitangire ya serivisi igiye kwihuta kuko ngo iyo Akagari gafite ibiro kabasha kwakira abaturage ku buryo nta muturage wabura umwakira.

Akomeza agira ati: “Imihanda ni ibikorwa by’iterambere abaturage bikoreye. Iyi mihanda igiye gukuraho imyanda, dufite gahunda ko Akagari kacu kagiye kugira imihanda igezweho y’iterambere ifite amatara bityo umuturage akagenda ahantu heza hatari ibyondo”.

Aha ni ho ahera avuga ko ari byiza ko umuturage aho atuye haba harangwa n’isuku.

Asaba abaturage gukomeza gukorera hamwe kandi ko buri mwaka bihaye umuhigo wo kugira ibikorwa bakora kandi bakabimurikira abaturage.

Ibiro by’Akagari byuzuye bitwaye miliyoni zisaga 20 z’amafaranga y’u Rwanda. Akagari ka Rwimbogo abagatuye bafashije abantu 500 mu gihe cya Guma mu rugo.

Abaturage batuye Akagari ka Rwimbogo ni 7,072 n’ingo 2,357 nkuko byatangajwe na Perezida w’Inama Njyanama y’aka Kagari.

  • NTAWITONDA JEAN CLAUDE
  • Gicurasi 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE