Kicukiro: Hafunguwe ikigo cyita ku bana bafite ubumuga

  • NTAWITONDA JEAN CLAUDE
  • Kamena 16, 2022
  • Hashize imyaka 2
Image

Mu Karere ka Kicukiro mu Murenge wa Gahanga hafunguwe ku mugaragaro Ikigo ‘Inshuti Zacu’ cy’abihaye Imana cyita ku bana bafite ubumuga, ku bufatanye n’umuryango utari uwa Leta ‘Hope and Homes For Children’.

Umunyamabanga wa Leta ushinzwe imibereho myiza muri Minisiteri y’Ubutegetsi bw’Igihugu Ingabire Assumpta, yashimye uburyo Akarere ka Kicukiro gafatanya n’abafatanyabikorwa mu bikorwa by’iterambere.

Yabigarutseho kuri uyu wa Kane taliki 16 Kamena 2022 ubwo hizihizwaga Umunsi w’Umwana w’Umunyafurika, wahuriranye no gufungura ku mugaragaro iki kigo.

Insanganyamatsiko y’uyu mwaka igira iti ‘Turengere umwana twubake u Rwanda twifuza’.

MINALOC itangaza ko abana batarabona imiryango ari 3,000. Ingabire agaragaza ko abenshi mu bana basigaye mu bigo, ari abafite ubumuga.

Ati: “Kugira ngo ubone Malayika Murinzi wakira umwana ufite ubumuga bisaba wa muntu ufite umutima udasanzwe”.

Ashishikariza ababyeyi kwihutira kugana ibigo nka ‘Inshuti zacu’ mu gihe babonye umwana atangiye kugira ubukererwe mu mikurire.

Ashima ko hari abana bakiriwe n’Ababikira bafite imyaka ine, ubu bakaba bamaze kumenya gukambakamba, kugenda, kwitamika batamufashije.

Asobanura ko gahunda ya tubarerere mu muryango ari gahunda Leta yashyizeho kugira ngo umwana wese arererwe mu muryango.

Akomeza agira ati: “Hanashyizweho gahunda ya ‘Malayika Murinzi’ igizwe n’ababyeyi bafite urukundo bashobora kwemera kurera abana batabyaye bakabitaho nk’ababo”.

Padiri Casmir Uwumukiza, igisonga cya Arikiyepiskopi wa Kigali avuga ko nubwo hari imiryango ifite ibibazo ariko ko umuryango atari ikibazo.

Ikigo cy’Abihaye Imana Inshuti z’Abakene, mu kigo cyabo batangije kitwa ‘Inshuti Zacu’ cyakira abana bafite ubumuga (Foto Kayitare J.Paul)

Ati: “Imiryango ifite ibibazo ariko umuryango si ikibazo kuko ni n’igisubizo, ni amahirwe kuko buri wese ni ho aba ashaka kuvukira, gukurira no gusazira. Ni yo mpamvu n’iyi gahunda ya Leta yo gushyira abana mu miryango nacyo ni ikintu cyiza”.

Habimfura Innocent, Umuyobozi wa Hope and Homes for Children mu Rwanda, kuri we asanga hakwiye gukurwaho impamvu zose zibangamira imibereho myiza y’umwana.

Ati: “Ubushakashatsi bwagaragaje ko umwana urerewe mu kigo cy’imfubyi agira ingaruka nyinshi zitari nziza ku mibereho ye cyane cyane ko abura rwa rukundo na bwa bushyuhe bw’ababyeyi. Umwana uri mu muryango yiga atabitojwe”.

Avuga ko iyo hashyizweho ibigo nk’ibi biba bivuze ko umwana asigaye ahantu hizewe, hari umutekano aho ari bufashirizwe ariko n’umubyeyi ngo agahabwa ubumenyi bwisumbuye bw’uburyo azita ku mwana.

Sr Nikuze Dative, uhagarariye Umuryango w’Abihayimana bazwi nka ‘Soeurs Inshuti z’abakane’ mu Rwanda asobanura ko iki kigo ku bufatanye na Hope and Homes For Children, yabubakiye ibiro, aho basuzumira abana, aho bashyira abana mu gihe barwaye, aho bigishirizwa bakoreshejwe imirimo n’ibindi”.

Iki kigo cyatangiye mu 2000 gitangirana n’abana baba mu kigo.

Nyuma yuko haje gahunda ya Leta yuko abana tubarerera mu muryango byabaye ngombwa ko abana basaga 20 basubizwa mu miryango, abandi 15 baguma mu kigo bakaba bagishakishirizwa imiryango.

Avuga ko nyuma y’aho Hope and Homes for Children ibafashije ikabubakira ikigo kigatangira gukora taliki 11 Werurwe 2022, ubu bakira abana bafite ubumuga.

Agira ati: “Byatugiriye akamaro, icya mbere byatumye twakira abana benshi. Bavuye mu bwigunge, ubu ni abana nk’abandi kandi n’ababyeyi birabafasha cyane kuko banabona umwanya wo kujya guhaha”.

Nyuma yo gufungura ku mugaragaro ikigo ‘Inshuti Zacu’, Hope and Homes For Children yashyikirije imodoka ikigo kita ku bana bafite ubumuga.

Bishimira ko imodoka bahawe izabafasha kugeza abana ku kigo bakahagera batavunitse kandi badakerewe.

Sr Nikuze yabwiye Imvaho Nshya ko imodoka bahawe izabafasha kugeza abana mu kigo kandi bakahagera batavunitse batanananiwe.

Habimfura Innocent, Umuyobozi wa Hope and Homes For Children mu Rwanda (Foto Kayitare J.Paul)
Umuryango utari uwa Leta Hope and Homes For Children wahaye imodoka ikigo Inshuti Zacu (Foto Kayitare J.Paul)
Ingabire Assumpta, Umunyamabanga wa Leta ushinzwe imibereho myiza muri MINALOC (Foto Kayitare J.Paul)
Sr Nikuze Dative (hagati) yavuze imodoka bahawe izafasha abana kutavunika no kudakererwa (Foto Kayitare J.Paul)
  • NTAWITONDA JEAN CLAUDE
  • Kamena 16, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE