Kenya: Pasiteri Victor Kanyari yiyamye abamwita umutekamutwe

  • MUTETERAZINA SHIFAH
  • Mata 17, 2024
  • Hashize ukwezi 1
Image

Umupasiteri wo muri Kenya witwa Victor Kanyari uzwi nka Bishop Mwangi Kanyari, yagaragaye ku mbuga nkoranyambaga ze yiyama abakomeje kumwita umutekamutwe, nyuma yo kugaragara avuga ko amaze igihe asaba abantu ibihumbi 310 by’amashiringi ya Kenya.

Uyu mukozi wiyita umukozi w’Imana aherutse gushyira amashusho hanze anenga abantu bahoze bamwoherereza ibihumbi 310 by’amashiringi y’amanya Kenya nk’amaturo, kugira ngo abasengere abasabire umugisha ku Mana, akanababwira ko niba utegereje gusarura ugomba no kubiba nkuko abisobanura.

Ati “Nakundaga kubabwira ko iyo ushaka umugisha w’Imana uba ugomba kwigomwa, yewe bamwe mu bagore bansabaga kubahishira simbibwire abagabo babo, gusa ariko ngatangazwa n’uko bizeraga ibyo nababwiraga, umugisha w’Imana ntugurwa, kuko hari n’abo ugeraho batayagira, burya namwe mujye mutekereza, ndabigaye pe, kandi ntimuzongere kuyampa nanjye ndicuza impamvu nayasabye.”

Uyu muvugabutumwa avuga ko icyamuteye gusaba abayoboke be amafaranga ari ubukene, ariko n’ubundi ntacyo yamugejejeho.

Ati: “Narebaga ubuzima bwo muri uyu Mujyi nkabona burakomeye, kandi ngasanga ubukene bumereye nabi cyane, nkareba ukuntu nzaza mu rusengero nta biryo biri mu rugo nkumva ntibishoboka, ariko sinkamenye ko Imana yampaye ubwenge, ubumenyi n’ubuzima ku buntu, nanjye nkwiye kuyikorera.”

Akimara kubivuga bamwe mu bakoresha imbuga nkoranyambaga bashimye ubunyangamugayo bwe, mu gihe abandi bamwamaganye kuba yarakoresheje urusengero rw’Imana mu butekamutwe nkuko  babivuga.

Akoresheje imbuga nkoranyambaga ze Pasiteri Kanyari, yasabye abantu kurekera aho kumwita umutekamutwe kuko nta muntu yibye, ko nta n’uwo yafatiyeho intwaro iyo ari yo yose ngo ayamuhe, ko bakwiye kubihagarika bagashishoza kuko umugisha w’Imana utagurwa.

Ati: “Ntabwo ndi umujura, sindi umutekamutwe, abantu nibarekere aho kunsebya, hari umuntu se nayatse ku ngufu? hari uwo nafatiyeho imbunda se? Nimuhagarike kumpa ayo mafaranga, kandi musobanukirwe ko umugisha w’Imana n’ubuntu bwayo bitagurwa. Ntushobora kuvuga ko nakize kubera gusaba amashiringi 310 mureke ibi bintu tubihagarike.”

Ibi bibaye mu gihe mu 2023 muri Kenya habonetse umupasiteri washutse abantu bagera mu 100 kwiyiriza ubusa iminsi 40, nk’uko Yesu yabigenje kugira ngo bazabone ijuru babone Imana.

  • MUTETERAZINA SHIFAH
  • Mata 17, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE