Kayonza: Abaturage bishimira aho bamaze kugera bishakamo ibisubizo

  • NTAWITONDA JEAN CLAUDE
  • Mata 7, 2022
  • Hashize imyaka 2
Image

Umuyobozi w’Akarere ka Kayonza John Bosco Nyemazi yashimiye abaturage uburyo bishakamo ibisubizo, bakaba bariyubakiye ibiro by’Umudugudu wa Kamahoro n’irerero.

Meya yabigarutseho mu nteko y’Abaturage yateranye kuri uyu wa Kabiri taliki ya 05 Mata 2022, ashishikariza abaturage kwitabira gahunda ziteganyijwe mu gihe cyo kwibuka ku nshuro ya 28 Jenoside yakorewe Abatutsi mu 1994. Yanabasabye gukomeza kugira imyitwarire myiza muri ibi bihe.

Yasabye abaturage kwirinda imvugo zisesereza, n’izipfobya Jenoside. Muri iyi nteko y’Abaturage, Umuturage yagabiye mugenzi we inka mu rwego rwo gushyigikira gahunda y’ubumwe n’ubwiyunge.

Umuyobozi w’Akarere ka Kayonza John Bosco Nyemazi yitabiriye inteko y’Abaturage mu Murenge wa Ndego, Akagari k’Isangano, ahatashywe ibikorwa abaturage bagizemo uruhare, birimo ibiro by’Umudugudu wa Kamahoro abaturage biyubakiye, n’irerero ryubatswe ku bufatanye n’umufatanyabikorwa w’Akarere AEE.

Umuyobozi w’Akarere yashimye Abaturage uruhare bagira mu kwitabira gahunda za Leta no kwishakamo ibisubizo, abasaba kurinda ibi bikorwa ndetse n’ibindi bahabwa n’Ubuyobozi muri gahunda yo kugira umuturage utekanye kandi uteye imbere.

Yagize ati: “Turabasaba kurinda ibi bikorwa ndetse n’ibindi muhabwa n’ubuyobozi muri gahunda yo kugira umuturage utekanye kandi uteye imbere.”

Umukuru w’Umudugudu wa Kamahoro, Bimenyimana Joseph yashimiye abaturage imyumvire bafite isobanutse mu kwitabira gahunda zitandukanye abaturage badahwema kugiramo uruhare.

Ati: “Turishimira ko Abaturage bacu bumva gahunda za Leta, nka Mituweli twarangije kwishyura 100%, aya mafaranga tuyizigamira mu masibo.”

Ibyo biro by’umudugudu byatashywe bigizwe n’icyumba cy’inama, icyumba ntangamakuru cy’imihigo n’icyumba cy’ibiro by’Umukuru w’Umudugudu.

Irerero ryo rigizwe n’ibyumba bitatu by’amashuri, ibiro by’umuyobozi w’irerero, ibyicungo by’abana n’ikibuga cy’aho bakinira. Abana baba bari muri iryo rerero bahabwa amata.

  • NTAWITONDA JEAN CLAUDE
  • Mata 7, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE