Kamonyi: Abakekwaho gutega umumotari bakamwambura moto, bafashwe bari kuyishakira umukiliya

  • Sedar Sagamba
  • Gashyantare 21, 2022
  • Hashize imyaka 2
Image

Abapolisi bo mu ishami rishinzwe kurwanya ubujura (Crack down) ku wa Gatanu taliki ya 18 Gashyantare, bafashe Nkuriza Vincent w’imyaka 33, na Mushinzimana Emmanuel bakekwaho ubufanye mu kwiba moto ya Mushinzimana Alex umumotari wo mu Karere ka Bugesera mu Murenge wa Nyamata.

Aba bombi bafatiwe mu Karere ka Kamonyi, Umurenge wa Runda, Akagari ka Muganza, Umudugudu wa Nyagacyamo. Bafashwe barimo gushaka umukiliya ugura iyo moto.

Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire, yavuze ko gufatwa kwa bariya bantu uko ari babiri byaturutse ku makuru yatanzwe n’abaturage.

Yagize ati: “Hari umuturage wa  hariya i Runda bahaye amakuru Polisi ko hari umuntu urimo gushaka umukiliya ugura moto kandi afite amakuru ko iyo moto ari inyibano. Byakubitanye n’uko uwo muturage yari afite amakuru ko  Mushinzimana Alex yari yatezwe n’abantu bamwambura moto. Abapolisi bo mu ishami rishinzwe kurwanya ubujura bagendeye kuri ayo makuru bafata Nkuriza Vincent afatirwa iwe mu Karere ka Bugesera, Umurenge wa Nyamata naho Mushinzimana Emmanuel yafatiwe iwe mu Murenge wa Kigali Akarere ka Nyarugenge ahakunze kwitwa Norvege ari na ho moto yari ihishe.”

SP Kanamugire akomeza avuga ko Nkuriza amaze gufatwa yemeye ko koko mu ijoro rya taliki ya 14 Gashyantare we na Mushinzimana bateze Mushinzimana Alex baramukubita bamwambura moto yari atwaye. Mushinzimana Emmanuel ni we wahishe iyo moto iwe i Norvege Nkuriza ajya gushaka abakiriya bayigura.

Yagize ati: Nkuriza amaze gufatwa ntiyaruhanyije yemeye ko yafatanyije na Mushinzimana gutega Mushinzimana Alex bakamwambura moto. Mushinzimana yayibitse mu nzu ye we ajya kuyishakira abakiliya, hakurikiyeho gushaka Mushinzimana na we arafatwa amaze gufatwa yavuze ko yasabwe na Nkuriza kumubikira moto ariko ntiyari azi ko ari iyo yibye.”

Umuvugizi wa Polisi mu Ntara y’Amajyepfo yashimiye abaturage batanze amakuru anakangurira abantu kwirinda kurarikira iby’abandi abashishikariza gukora cyane kugira ngo bagere ku byo bashaka badakoze ibyaha. Yavuze ko Polisi ifatanyije n’abaturage n’izindi nzego batazahwema kurwanya ibyaha ariko hatangwe amakuru hakiri kare kugira ngo ibyaha bikumirwe bitaraba.

Mushinzimana Alex yashimiye inzego z’umutekano zafatanyije na Polisi n’abaturage bakabasha kugarura moto ye yari yibwe. Nkuriza na Mushinzimana Emmanuel bahise bashyikirizwa Urwego rushinzwe ubugenzacyaha(RIB)rukorera muri sitasiyo ya Polisi ya Bugesera kugira ngo bakorerwe idosiye.

Polisi ikorera mu Ntara y’Iburasirazuba imaze iminsi ifata bamwe mu bantu bakekwaho ubujura mu baturage cyane cyane bwibanda ku gutega abantu bakabambura za moto no gutobora amazu bakiba ibirimo.

  • Sedar Sagamba
  • Gashyantare 21, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE