Joeboy azataramira abazitabira “Kigali Fiesta Live Concert”  

Joseph Akinwale “Joeboy” uri mu bahanzi bagezweho muri Afurika no hanze yayo ategerejwe i Kigali mu gitaramo “Kigali Fiesta Live Concert” kizabera muri BK Arena, taliki 03 Ukuboza 2022.

Uyu muhanzi umenyerewe mu njyana za “AfroPop” na “RnB” agiye gutaramira i Kigali ku nshuro ya kabiri mu kirori kizabera mu nyubako ya BK Arena kuko yayiherukagamo taliki 23 Nyakanga 2022.

Nyuma y’amezi ane, Joeboy agiye kongera gutaramira abanyabirori b’i Kigali mu gitaramo cyateguwe na East African Promoters kizaba taliki 03 Ukuboza 2022.

Kugeza ubu ntiharatangazwa abahanzi bazafatanya n’uyu muhanzi wo muri Nigeria ukunzwe n’abatari bake mu Rwanda  aho yakoze igitaramo bwa mbere muri Gashyantare 2020 ubwo yari yatumiwe muri Kigali Jazz Junction.

Byinshi kuri Joeboy witezwe i Kigali

Joeboy ni umusore w’imyaka 25, yavutse ku wa 21 Gicurasi 1997 mu Mujyi wa Lagos muri Nigeria, akaba ari umwanditsi n’umuririmbyi.

Abarizwa mu nzu ifasha abahanzi ya “emPawa Africa” iyoborwa na Mr Eazi.

Yize muri Kaminuza ya Lagos izwi nka UNILAG aho yakuye Impamyabumenyi mu bijyanye n’Imicungire y’Abakozi.

Joeboy yatangiye kuririmba ubwo yari afite imyaka 16, ubwo yari afite imyaka 17 ni bwo yakoze indirimbo ye ya mbere yise “Gbeseyin”.

Amateka ye yahindutse nyuma yo gusubiramo indirimbo “Shape of You” ya Ed Sheeran yakiriwe n’abahanzi barimo Mr Eazi.

Mr Eazi yahise yemerera ubufasha Joeboy ndetse anamusinyisha mu nzu ye ifasha abahanzi ya “EmPawa Africa” akaba umuhanzi wa mbere wari winjiye mu mikoranire n’ iyi sosiyete ifite ibikorwa bitandukanye hirya no hino muri Afurika.

Umubyeyi wa Joeboy ni umucuranzi wa Piano na Guitar acurangira korali iririmbamo mukuru we, ni bo bamukundishije umuziki kubera ko yakundaga kubaherekeza kenshi bagiye kuririmba ahantu hatandukanye.

Indirimbo ye yakunzwe cyane  “Baby” yayikoze mu minota 45 gusa.

Joeboy akunda kumva umuziki wa “Rap” cyane , indirimbo ya mbere yakoze mu 2017 yayise “Realist” yari ihuriyemo urumvange rw’umuziki wa “Trap” na “RnB”.

Joeboy yamenyekanye mu ndirimbo zitandukanye nka  “Sip”, “Beginning”, “Baby” na  “Nobody”  yahuriyemo na Mr Eazi na Dj Neptune na we uheruka mu Rwanda mu minsi yavuba aha.