Itorero Inyamibwa ryiteguye gutarama u Rwanda

  • KAYITARE JEAN PAUL
  • Werurwe 19, 2024
  • Hashize ukwezi 1
Image

Hashize imyaka 30 u Rwanda rwongeye kubona umucyo umurikira buri munyarwanda, muri iyi myaka ni bwo humvikanye intero igira iti ‘Umugore yasubijwe ijambo’, hagaruwe Itorero ry’igihugu, Umunyarwanda yongera kubaho ntawe umubaza ubwoko bwe ahubwo himakazwa Ndi Umunyarwanda.

Aha ni ho hashibutse igitaramo cy’Itorero Inyamibwa cyiswe ‘Inkuru ya 30’.

Ni igitaramo giteganyijwe ku wa Gatandatu tariki ya 23 Werurwe 2024 muri BK Arena mu Mujyi wa Kigali.  

Ubuyobozi bw’Itorero Inyamibwa bwavuze ko hari imyaka 30 Abanyarwanda bamaze mu bibazo.

Nyuma ya Jenoside yakorewe Abatutsi mu Rwanda haje ikindi gice gitandukanye n’imyaka 30 yabanjirije Jenoside.

Ibi byagarutsweho ku mugoroba w’ejo ku wa Mbere tariki 18 Werurwe 2024, mu kiganiro Inyamibwa zagiranye n’abanyamakuru.

Rusagara Rodrigue, Umuyobozi ushinzwe gukurikirana ibikorwa by’Itorero Inyamibwa, yavuze ko iri torero ryiteguye gutarama u Rwanda.

Yagize ati: “[…] dutarame kinyarwanda, dutarame u Rwanda, dutarame ibigwi cyangwa ibyishimo dufite mu Rwanda”.

Akomeza agira ati: “Uyu munsi hashize imyaka 23 inyamibwa zivutse. Ntabwo za nyamibwa zikigizwe n’abantu bigunze ahubwo ni inyamibwa zagutse”.

Itorero Inyamibwa ryatangiye mu 1998, rivukira mu yahoze ari Kaminuza y’u Rwanda.

Rusagara avuga ko intego kwari ukugira ngo abagize inyamibwa bikure mu bwigunge.

Ati: “Urugendo rw’inyamibwa rwabaye rurerure n’u Rwanda ruduha urubuga rwo gukoreramo ibintu byose.

Ntiwabyina abantu bari mu ntambara, ubyina ari uko abantu bari mu byishimo.

Igitaramo twateguye ni umwanya mwiza wo kwerekana aho itorero ryavuye kandi rishobora kuva muri ibyo bibazo”.

Ubuyobozi bw’Itorero Inyamibwa bwahishuye ko amatike y’abazinjira mu gitaramo hasigaye make, busaba ko utarayigura yakwihutira kuyigura kuko nizishira ngo nta zindi zizakorwa.

Abazitabira igitaramo babyinirwa imbyino zitandukanye; Igishakamba, Ikinimba, Ikinyemera, Amasare, Imishayayo n’izindi.

Rusagara yagize ati: “Igitaramo kizaba kigizwe n’ibintu bine birimo kubyina, imbyino ziturutse mu mpande zose, igice cya kabiri ni igice gito cy’amateka.

Igice kindi ni uko kigomba kurangira twese twishimye, icyo gice kizarangira abantu bose banezerewe”.

Impamvu igitaramo ‘Inkuru ya 30’ cyashyizwe ku itariki 23 Werurwe, yavuze ko kwari ukugira ngo habeho umwanya wo kwitegura kwibuka ku nshuro ya 30 Jenoside yakorewe Abatutsi.

Igitaramo ‘Inkuru ya 30’ cyatewe inkunga na Banki y’Iterambere ry’u Rwanda (BRD), Ikigega RNIT Iterambere Fund n’abandi bafatanyabikorwa.

Photo: Uwamariya Cécile

  • KAYITARE JEAN PAUL
  • Werurwe 19, 2024
  • Hashize ukwezi 1
TANGA IGITEKEREZO
Munyaneza Augustin says:
Mata 11, 2024 at 10:08 am

Mbashimiye imbaraga numuhati mugira mubyomukorabyose turabakundacyaneeee!!! Ahubwomuduhe number yanyu nubakeneye byumwihariko ababone.murakoze

Andika igitekerezo

AMATEGEKO AGENGA IYANDIKA RY'IGITEKEREZO CYAWE