Indirimbo icumi z’Abanyarwanda zagufasha kuryoherwa n’impera z’icyumweru

  • MUTETERAZINA SHIFAH
  • Werurwe 2, 2024
  • Hashize amezi 2
Image

Buri gihe ku munsi wa gatanu w’icyumweru, mu mutwe wa benshi hajyamo gutangira iminsi y’ikiruhuko isoza icyumweru.

Mu gihe harimo gutangirwa ukwezi kwa Werurwe hanatangira weekend, hari urutonde rw’indirimbo icumi z’abahanzi nyarwanda zagufasha kuruhuka no kurushaho kuryoherwa n’impera z’icyumweru (Weekend).

Wowe gusa
Ni imwe mu ndirimbo wakumva muri weekend. Wowe gusa n’indirimbo ya Ariel Wayz, imaze ibyumweru bike isohotse, aho avuga ko yifashishije ababyeyi be mu mashusho yayo, kugira ngo bitange ubutumwa ku bandi babyeyi, kuko gushyigikirwa n’ababyeyi mu bikorwa ukora bikugira umuntu ukomeye mu marangamutima. Ni indirimbo yanditswe na Boringo Paccy.

Bucura

Iyi ni ndirimbo y’umuhanzi Florien Uworizagwira uzwi nka Yampano, ni indirimbo ituje kandi umuntu yakumva aruhutse cyangwa adakeneye ibisakuza, ikaba imaze ibyumweru bigera kuri bitatu iri hanze.

Ndagukunda

Ni indirimbo y’abakobwa batutu bavindimwe, bagize itsinda Isonga rimenyerewe cyane mu njyana ya gakondo, ikaba imaze ibyumweru birenga bibiri kuko yasohotse ku munsi wa Saint Valentin.

Jugumila

Mu mpera z’icyumweru kandi ushobora kwizihirwa ubifashijwemo n’indirimbo zishyushye ndetse zibyinitse, bikagufasha kwizihirwa kurushaho.
Jugumila ni imwe mu ndirimbo zishobora kubigufashamo muri iyi weekend.

Ni indirimbo ihuriwemo n’abahanzi batatu b’abahanga kandi bakunzwe n’abatari bake mu gihugu, barimo Chriss Eazy, Dj Phill Peter ndetse na Kevin Kade, ikaba imaze iminsi igera ku icyenda hanze, gusa ejo hashize ikaba yari yakuwe kuri Youtube, aho yaregwaga kuba yaribwe, nyuma ikaza gusubizwaho.

Mu nda

Iyi ndirirmbo ikunzwe n’abatari bake, nayo ni imwe mu zagufasha kuryoherwa no kwizihirwa n’impera z’icyumweru, kuko abenshi mu bakunzi bayo bayikundira ukuntu ibyinitse, ikaba imaze amezi agera kuri atatu, ni iy’umuhanzi Kevin kade.

Bana

Bana ni indirimbo ikunzwe n’abantu b’ingeri zose, nayo ubaye ushaka kwizihirwa n’inshuti mu birori cyangwa mu rugo wayumva, kuko biragoye ko wumva injyana yayo ngo igusige ukiri mu mubare wabatizihiwe, ikaba imaze igihe kigera ku mezi ane, ihuriwemo n’umuhanzi Shaffy afatanyije na Chriss Eazy.

Sesa

Ni indirimbo ya Ross Kana, ikaba imaze igihe kigera mu byumweru bine, aho ikunzwe cyane, ku buryo abakunda indirimbo zikungahaye ku magambo meza ndetse zinabyinitse, badatinda kuyikurangira, cyangwa kuyishyira ku rutonde rw’indirimbo zaryoshya ikiruhuko cy’abakunzi b’imiziki.

God of miracles

Mu byiciro bya muzika byose hagaragaramo indirimbo nziza kandi zikunzwe zishobora kurushaho kugushimisha mu mpera z’icyumweru, ni muri urwo rwego no mu ndirimbo zo kuramya no guhimbaza Imana hagaragaramo indirimbo nshya kandi zikunzwe n’abatari bake, zimwe muri zo wakumva, harimo na God of miracles ya Aline Gahongayire, ikaba imaze ibyumweru bibiri gusa.

Sikiriza

Biragoye cyane ko wumva indirimbo zo kuramya no guhimbaza Imana ngo uzivemo utumvise Sikiriza, indirimbo nshya ya Israel Mbonyi, kuri ubu iri mu zakunzwe n’ingeri zose mu Rwanda, ndetse no mu mahanga, Sikiriza ni indirimbo yagufasha kwizihirwa mu mpera z’icyumweru, ku bantu bakunda indirimbo zo kuramya no guhimbaza Imana.

Ni indirimbo imaze ibyumweru Bibiri itanga umunezero ku bakunzi bizi njyana.

Niyo ndirimbo

Ku bakunzi b’indirimbo zo kuramya no guhimbaza Imana, nayo yaza mu ndirimbo zagufasha kuruhuka, zikanarushaho ku kuryohereza ikiruhuko cy’impera z’icyumweru, yaririmbwe na Meddy afatanyije na Adrien Misigaro, ikaba iya kabiri ya Meddy kuva yahagarika umuziki usanzwe akiyegurira indirimo zo kuramya no guhimbaza Imana.

Izi ni zimwe mu ndirimbo z’abahanzi b’Abanyarwanda zagufasha kuruhuka no kwizihirwa muri izi mpera z’icyumweru, unatangira neza ukwezi kwa Werurwe.

  • MUTETERAZINA SHIFAH
  • Werurwe 2, 2024
  • Hashize amezi 2
TANGA IGITEKEREZO
Wakafa says:
Werurwe 2, 2024 at 7:53 pm

Murakoze, Ubutaha uzajye duha na link zazo

Andika igitekerezo

AMATEGEKO AGENGA IYANDIKA RY'IGITEKEREZO CYAWE