Impamvu itangwa ry’ibihembo muri Grammy Awards ritavuzweho rumwe

  • MUTETERAZINA SHIFAH
  • Gashyantare 6, 2024
  • Hashize amezi 4
Image

Nyuma y’aho ku mugoroba wa tariki 04 Gashyantare 2024 mu nyubako ya Crypto Arena i Los Angles haberaga ibirori byo gutanga ibihembo bya Grammy Awards ku nshuro ya 66, ntibyavuzweho rumwe.

Ni ibirori byari byitabiriwe n’ibyamamare bitandukanye muri muzika, nkuko bisanzwe bigenda, ariko kandi harimo abataranyuzwe n’uko Recording Academy ifite mu nshingano gutegura no gutanga ibihembo muri Grammy Awards yabyitwayemo.

Ku ikubitiro abahanzi barimo umuraperi Jay -Z wari umaze kwakira igihembo “Dr. Dre Global Impact Award”, yanenze abategura ibi bihembo, abashinja kwirengagiza imirimo y’umugore we Beyonce.

Jay-Z yavuze ko bitumvikana uburyo ari we muhanzikazi wegukanye Grammy Awards nyinshi, ariko akaba ataregukana igihembo cy’umuzingo mwiza w’umwaka (Best Album of the Year).

Jay-Z utarariye iminwa kuri uwo munsi, yavuze ko Recording Academy, ijya irenganya abahanzi b’abirabura igihe bakwiye kwegukana ibi bihembo, atanga urugero rw’igihe mu 1989 Will Smith na Dj Yazzy bateye hejuru kubera ko itangwa ry’ibi bihembo mu cyiciro cy’injyana ya Rap, yari yihariwe n’abirabura bitatambukijwe kuri Television nk’ibindi, ahubwo bigatangwa rwihishwa.

Yavuze ko kandi bitumvikana uburyo, Recording Academy itanga ibihembo bidashingiye ku mibare, abasaba kugerageza kunoza imikorere yabo.

Yagize ati: “Turabakunda ariko nibura mujye mukoresha ukuri, umugore wanjye umwaka ushize yakoze amateka aba umuhanzikazi ufite ibihembo byinshi, ibyo n’ibintu bigaragara. Mwibaze ko atari yatwara igihembo cya album nziza, namwe erega mukoresheje imibare murabizi ko nta kuntu bishoboka ko atatwara icyo gihembo, mubitekerezeho.”

Uretse umuraperi Jay-Z, Recording Academy yanikomwe cyane n’abandi bahanzi, abafana ndetse n’abakunzi b’umuziki wa Nigeria muri rusange, batariyumvisha uburyo abahanzi babo bose uko ari batandatu, batashye nta gihembo na kimwe cya Grammy Awards 2024 batwaye.

Byaratunguranye kuba Burna boy atarabonye igihembo na kimwe mu bihembo 4 yahataniraga

Abanya-Nigeria n’abandi benshi hirya no hino ku Isi batunguwe no kubona abahanzi bakomeye mu njyana ya Afrobeats bubahwa ku mugabane w’Afurika, barimo Burna Boy, Davido, Ayra Starr, Tems, Asake, na Olamide, nta n’umwe muri bo wegukanye igihembo muri Grammy Awards 2024, kandi umwaka ushize, bose barakoze indirimbo n’imizigo album zakunzwe ndetse zinaca uduhigo muri Afurika no hanze yayo.

Mu bihembo uko ari bitatu umuhanzi Davido yari ahataniye, nta na kimwe yashoboye kwegukana, ni mu gihe Burna Boy nubwo yanditse amateka yo kuba umuhanzi wa mbere wa Afrobeats waririmbye mu itangwa rya Grammy Awards, ariko mu bihembo bine byose yari ahataniye atigeze agira na kimwe atahana.

Umuhanzikazi Teni na we ari mu bagaragaje ko batanyuzwe n’igikorwa abategura ibi bihembo bya Grammy Awards, bakoze cyo kutagira umunya-Nigeria n’umwe bagiha.

Mu butumwa abakunzi b’umuziki muri Nigeria bacishaga ku mbuga nkoranyambaga, bose bahurizaga ku kuba batarashimishijwe n’uko abategura Grammy Awards baratakarije umwanya abahanzi bakomoka muri Nigeria, bakabakoresha mu nyungu zabo bwite.

Kugeza ubu ntabwo aba bakunzi b’umuziki wa Nigeria bariyumvisha neza uburyo indirimbo zose uko ari ebyiri za Davido, ‘Unavailable’ yahuriyemo na Musa Keys ndetse na ‘Feel’ zakunzwe zigacurangwa hirya no hino ku mbuga nkoranyambaga, nta n’imwe yabashije kwegukana igihembo.

Ni na ko bimeze ku ruhande rwa Burna Boy, kuko mu ndirimbo ze zari zihatanye zirimo ‘City Boys,’ ‘Alone,’ ‘Sittin’ On The Top Of The World’ yafatanije na Tiwa Savage ndetse na album yise ‘I Told Them’ zose nta nta gihembo zahawe.

Indirimbo ya Asake ndetse na Olamide bise ‘Amapiano’ yabyinwe bigatinda, ‘Wait For You’ yahuriyemo Tems, Drake, na Future, hamwe na Rush y’umuhanzikazi Ayra Starr, na zo zavuyemo rugikubita.

Ayra Star uri mu bataranyuzwe no kutabona igihembo na kimwe
  • MUTETERAZINA SHIFAH
  • Gashyantare 6, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE