Impakanizi yasobanuye icyamuteye gukora indirimbo nshya yise Ingabe

  • MUTETERAZINA SHIFAH
  • Mata 2, 2024
  • Hashize ibyumweru 2
Image

Umuririmbyi akaba n’umubyinnyi w’injyana gakondo Iradukunda Yves uzwi nk’Impakanizi, yasobanuye imvano y’indirimbo nshya yise Ingabe avuga ko yatuye abana bose.

Uyu musore umenyerewe cyane mu Itorero Ibihame by’Imana, akaba agira n’ibyo abigisha mu mbyino zitandukanye bimwe byitwa intambwe cyangwa ibitego.

Avuga ko iyo ndirimbo ari igihozo yageneye umwana wese, kuko no mu mashusho agaragara ateruye umwana ukiri muto.

Ati: “Ni igihozo nahimbiye umwana mutoya, ibyo kandi bikagaruka ku muco wacu byari ibisanzwe kuririmbira abana batoya bakundaga kubaririmbira ibihozo cyane cyane abana b’abakobwa, abahungu babaga bafite ibyivugo.”

Akomeza agira ati: “Ibihozo babiririmbiraga abana batoya mu buryo bwo kubatetesha, ahari wenda ubu umuntu ashyiramo n’utuntu tw’ubu ariko ntibivuze ko uba wirengagije ibyo umuco wacu wavugaga, nayihimbye ngamije ko abantu bamenya ko umwana agomba guteteshwa akitabwaho kuko ari we soko y’ukomeye wese.”

Agaruka ku bijyanye no gukunda imvugo z’ahandi kugira ngo babashe kuririmba injyana benshi bakunda kwita ibishegu, Impakanizi avuga ko atari ngombwa, kuko no mu kinyarwanda harimo amagambo meza avuga buri kimwe.

Impakanizi avuga ko amatorero ahari menshi ko ababyeyi ari bo basabwa gukundisha abana kuyajyamo no kuyakuriramo

Ati: “Abanyarwanda ibintu byacu hari urundi rwego twabishyiraho, imitoma ikaririmbwa, ibishegu nabyo byabagaho bakabiririmba mu buryo bwo kuzimiza, aho byumvagwa n’abantu bakuru gusa, kubera ko ikinyarwanda cyacu ni kigari cyane, hari icyo tutazi ni nayo mpamvu twifashisha izindi ndimi, ariko uzi Ikinyarwanda cya nyacyo ubona uko ubivuga.”

Arongera ati: “Niba dukunda umuziki w’abanye Ghana tukanayikunda atari uko tuzi amagambo arimo, ariko ukayiga ukayamenya utitaye ku cyo bisobanuye kuki tutakora umuziki wa kinyarwanda, tugakomeza rwa rurimi rwacu, n’iki cyababuza kuwukunda, niba wagize amatsiko yo kumenya amagambo baririmba, n’iki cyatuma batamenya ay’Ikinyarwanda bakunze umuziki wacu.”

Uretse kuririmba uyu musore ukiri muto afite impano zitandukanye harimo kubyina no kuvuza ingoma, akaba byose abikora kinyamwuga, ibintu bidasanzwe ko izi mpano zose zagaragara ku muntu umwe.

Avuga ko izina Impakanizi arikomora ku bisigo nyabami, akanashimangira ko we yahisemo kuba Intore ubuzima bwe bwose, kandi ko Gakondo ariyo ye.

Impakanizi avuga ko muri iyi minsi atavuga ko amatorero nta yahari kuko hari amatorero menshi, ariko kandi ababyeyi ari bo batagituma abana bagira inyota yo kurikuriramo ngo yumva inzozi ze ari ukuzagera mu Itorero ry’Igihugu nk’uko byahozeho.

Uretse indirimbo ye nshya yise Ingabe akayikora mu buryo bw’igihozo, afite n’izindi zirimo Umunyabigwi hamwe n’iyindi yise Ingobyi.

  • MUTETERAZINA SHIFAH
  • Mata 2, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE