Igitaramo cya Korali Christus Regnat kitabiriwe n’Abagize Guverinoma

  • KAYITARE JEAN PAUL
  • Ugushyingo 20, 2023
  • Hashize amezi 3
Image

Igitaramo ‘I Bweranganzo’ cyateguwe na Korali Christus Regnat cyitabiriwe na bamwe mu bagize Guverinoma ndetse n’abandi bibaye mu nzego nkuru z’igihugu.

Ni igitaramo cyabereye muri Kigali Conference and Exhibition Village ahazwi nka Camps Kigali (KCEV) ku mugoroba w’ejo ku Cyumweru tariki 19 Ugushyingo 2023.

Mu bakitabiriye harimo Minisitiri w’Uburezi, Twagirayezu Gaspard na Minisitiri w’Ibidukikije Dr Mujawamariya Jeanne d’Arc.

Cyanitabiriwe kandi n’Intebe y’Inteko, Amb. Robert Masozera, Bernard Makuza wabaye Minisitiri w’Intebe na Dr Augustin Iyamuremye wabaye Perezida wa Sena y’u Rwanda.

Ni igitaramo kandi kitabiriwe n’abafite amazina akomeye mu muziki w’u Rwanda nka Masamba Intore, Jules Sentore.

Korali Christus Regnat yataramiye abakunzi bayo mu majwi y’urusobe mu ndirimbo zuje ubuhanga.

Yaririmbye indirimbo zahimbwe na bamwe mu basanzwe ari abaririmbyi bayo ndetse n’izindi ndirimbo gakondo zaririmbwe n’abandi bahanzi.

Mu ndirimbo 30 Korali Christus Regnat yaririmbye indirimbo zirimo; Uhoraho ni Umwami, Roho yanjye singiza uhoraho, Twarakuyobotse, Dore Umubyeyi, Igise, Zamina Mina, Igipimo cy’urukundo, Maman Shenge, Igisingizo cya Bikira Mariya n’izindi.

Mbarushimana Jean Paul, Perezida wa Korali Christus Regnat, yavuze ko hari hashize imyaka Itatu badataramira abakunzi babo biturutse ku mpamvu z’icyorezo cya Covid-19.

Yashimiye ubuyobozi bw’igihugu ku musanzu wabo mu gutuma bakora igitaramo batekanye mu mudendezo, anashimira ubuyobozi bwa Kiliziya Gatolika mu Rwanda by’umwihariko ubuyobozi bwa Paruwasi Regina Pacis.

Ubuyobozi bwa Korali Christus Regnat bwatangaje ko igitaramo ‘I Bweranganzo’ kigiye kuzajya kiba buri mwaka.

Mbarushimana, Perezida wa Korali, yagize ati “Iki gitaramo kuva uyu munsi kigiye kuba igitaramo ngarukamwaka, izina rizahora ari iri nk’uko twabisobanuye.

Turateganya rero n’ibikorwa byinshi birimo kongera ibihangano cyane cyane ku mbuga nkoranyambaga nka YouTube n’ibindi bikorwa dukora by’urukundo”.

Igitaramo ‘I Bweranganzo’ cyaririmbwemo n’umuhanzi Josh Ishimwe wamenyekanye mu ndirimbo zisingiza Imana mu njyana gakondo.

Andy Bumuntu na we yaririmbye muri iki gitaramo aho yaririmbye indirimbo ‘Mama Shenge’.

Korali Christus Regnat iteganya ibikorwa bitandukanye by’iyogezabutumwa, aho iteganya kuzajya kuririmbira mu Burundi nkuko ubuyobozi bwayo buherutse kubibwira itangazamakuru.

KAYITARE JEAN PAUL

  • KAYITARE JEAN PAUL
  • Ugushyingo 20, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE